Read dyu Koow daminɛ kitabu 41 Bible Online

Koow daminɛ kitabu 41 - dyu bible

Koow daminɛ kitabu 41

¹Saan fila tɛmɛnin kɔ, Ezipiti masacɛ ye siko dɔ kɛ. O siko la, a y'a yɛrɛ ye Nili baa daa la.

²Misi ɲanaman wolonwula bɔra baa kɔnɔ, u tun ka bonbon, u y'a daminɛ ka ɲimini kɛ.

³Misi wolonwula wɛrɛ bɔra baa nin kɔnɔ ka tugu dɔ nunu kɔ ka lɔ u gɛrɛfɛ bada la. U filɛ man di, u fasanin be kosɔbɛ.

⁴Misi wolonwula minw ma ɲi, n'u fasanin be kosɔbɛ, olu ye misi belebeleba nunu ɲimi. O yɔrɔ la, a kununna.

⁵O kɔ, a segira ka sinɔgɔ. A ye siko dɔ wɛrɛ kɛ tugu. O siko nin na, a ye suman dɔ ye min ye kuun wolonwula barikaman bɔ kisɛ be minw na kosɔbɛ.

⁶O kɔ, kuun wolonwula dɔ wɛrɛ bɔra ka tugu dɔ nunu kɔ, olu tun ka misɛn kosɔbɛ, u ɲaga fana tun jara fɔɲɔ fɛ.

⁷Kuun misɛnman nunu ye kunbaba nunu tunu. O waati la, a kununna tugu. A y'a ye ko siko tun lo.

⁸ Dugu gwɛra, masacɛ hakili ɲagamina, a y'a ka jamana kɔnɔ lagwɛlikɛlaw ni lɔnnikɛlaw bɛɛ wele ka siko nunu fɔ u ye, nga u si ma se k'u kɔrɔ fɔ a ye.

⁹O tuma na, masacɛ ka dɔrɔ dibagaw kuntigi y'a fɔ a ye ko: «Bii kɔni, ne ka kan ka ne ka kojugu lɔn k'a fɔ.

¹⁰Faama, e tun dimina i ka baaradenw kɔrɔ waati dɔ la, i ye ne n'i ka buru dilanbagaw kuntigi don kaso la i kɔlɔsibagaw kuntigi be min kunna.

¹¹K'an to kaso la yen, an fila bɛɛ sikora suu kelen na, kɔrɔ tun be siko nunu kelen kelen bɛɛ la.

¹²An tun be ɲɔgɔn fɛ ni eburukanbelen dɔ ye kaso la, i kɔlɔsibagaw kuntigi ka jɔɔn lo. An y'an ka siko nunu lakali a ye, a y'u kɔrɔ fɔ an ye.

¹³A ye min fɔ, o le kɛra. Faama, i ye ne ta baara la tugu, ka dɔ nin dulon.»

¹⁴Masacɛ k'u ka na ni Yusufu ye. U y'a bɔ teliman na kaso la k'a kuun li, a ye fani wɛrɛ don, ka taga faama fɛ.

¹⁵Masacɛ y'a fɔ Yusufu ye ko: «Ne ye siko kɛ, mɔgɔ si ma sɔrɔ min be se k'o kɔrɔ fɔ ne ye. Ne y'a mɛn ko ni mɔgɔ y'a ka siko fɔ i ye, ko i be se k'o kɔrɔ fɔ.»

¹⁶Yusufu y'a fɔ masacɛ ye ko: «Ne tɛ, Ala le bena jabiɲuman d'i ma.»

¹⁷Masacɛ y'a fɔ Yusufu ye ko: «Siko la, ne y'a ye ko ne be Nili baa daa la.

¹⁸Ka ne to o yɔrɔ la, ne ye misi wolonwula ye. U bɔra baa kɔnɔ ka to ka biin ɲimi, u tun ka bonbon, u fana ka ɲi kosɔbɛ.

¹⁹O kɔ, ne ye misi wolonwula wɛrɛ ye tugu, olu fasanin tun be kosɔbɛ, u ma ɲi hali fitini. Ne yɛrɛ m'u ɲɔgɔn ye fɔlɔ Ezipiti jamana kɔnɔ. Olu bɔra baa kɔnɔ fana ka tugu fɔlɔta nunu kɔ.

²⁰Misi wolonwula minw fasanin be, n'u ma ɲi, olu ye misi belebele nunu ɲimi, minw tun kɔnna ka bɔ.

²¹U ye belebeleba nunu ɲimi ka ban tuma min na, mɔgɔ tun te se ka l'a la k'olu le ye u ɲimi, bari u cogoya ma yɛlɛma hali fitini. U tora u cogokɔrɔ nin na yen. O tuma na, ne kununna.

²²«O kɔ, ne ye siko dɔ kɛ tugu. O siko nin na, ne ye suman dɔ ye. A ye kuun wolonwula bɔ, minw fara kisɛ la ani u ka ɲi kosɔbɛ.

²³Kuun wolonwula wɛrɛ bɔra ka tugu dɔ nunu kɔ, kisɛ tun te olu la, o fana tun ma bonbon, fɔɲɔ tun ye olu ɲaga ja.

²⁴O kuun minw ma bonbon, olu ye kunbaba nunu tunu. Ne y'a ɲafɔ an ka lagwɛlikɛlaw ye, nga u si ma se k'u kɔrɔ fɔ ne ye.»

²⁵Yusufu y'a fɔ masacɛ ye ko: «Faama, e ye siko minw kɛ u be fɛɛn kelen le fɔ. Ala b'a fɛ ka fɛɛn min kɛ, a y'o le yira e la ten.

²⁶Misi wolonwula minw ka ɲi, olu ye saan wolonwula ye. Suman kuun wolonwula minw ka ɲi, olu fana ye saan wolonwula ye, siko kelen lo.

²⁷Misi wolonwula minw bɔra dɔ nunu kɔfɛ n'u fasanin lo, n'u ma ɲi, olu ye saan wolonwula ye, kisɛ te suman kuun wolonwula minw na, ni u ɲaga jara fɔɲɔ fɛ, olu fana ye saan wolonwula kɔngɔ ye.

²⁸I n'a fɔ ne y'a fɔ ka ban e, masacɛ ye cogo min na, Ala b'a fɛ ka koo min kɛ, a ye o le yira i la.

²⁹Ayiwa, saan wolonwula kɔnɔ suman bena sɔrɔ kosɔbɛ Ezipiti jamana yɔrɔ bɛɛ la.

³⁰O kɔ, kɔngɔ bena don jamana kɔnɔ saan wolonwula kɔnɔ fɔɔ an bena ɲinɛ ni saan wolonwula sɔrɔ ye Ezipiti jamana kɔnɔ. Jamana mɔgɔw bena sɛgɛn a bolo.

³¹Kɔngɔ bena juguya fɔɔ an bena ɲinɛ ko an tun ye sɔrɔli kɛ jamana nin kɔnɔ.

³²Ni masacɛ y'a ye ko a ye siko nin kɛ siɲɛ fila, o kɔrɔ ko Ala ye o koo nin latigɛ ka ban, a tena mɛn k'o kɛ.

³³«Sisan yɛrɛ masacɛ ka banba ka mɔgɔ hakilitigi kolɔnbaga dɔ ɲini k'a sigi Ezipiti jamana kunna.

³⁴Masacɛ ka banba ka mɔgɔ dɔw sigi fana minw bena to ka suman kafo jamana kɔnɔ, mɔgɔw bena suman min sɔrɔ, o be tilan sigiyɔrɔ duuru, kelen be minɛ, sanɲuman wolonwula nunu kɔnɔ.

³⁵U ka suman bɛɛ kafo o sanɲuman nunu kɔnɔ, masacɛ k'a ɲini u fɛ u ka suman mara dugubabaw kɔnɔ, e masacɛ ka to o kunna.

³⁶Kɔngɔ bena don saan wolonwula minw kɔnɔ, a bena kɛ ɲasigi ye waasa kɔngɔ kana na digi jamana na.»

³⁷Yusufu ye min fɔ, o diyara masacɛ n'a ka kuntigiw bɛɛ ye kosɔbɛ.

³⁸O la, masacɛ y'a fɔ u ye ko: «An be se ka mɔgɔ dɔ wɛrɛ sɔrɔ, Ala Nii be ni min ye i n'a fɔ kanbelen nin wa?»

³⁹A y'a fɔ Yusufu ye ko: «Ala sɔnna ka o lɔnniya nin bɛɛ d'i ma minkɛ, mɔgɔ wɛrɛ te yan min hakili n'a ka lɔnniya sera i ta ma.

⁴⁰ Ne b'i sigi ne ka soo kunna. Jamanadenw bɛɛ bena mɛnni kɛ i fɛ, ne ka masasigilan dama le bena ne ni ele daan bɔ ɲɔgɔn na.»

⁴¹A y'a fɔ a ye tugu ko: «Ne be Ezipiti jamana bɛɛ kuntigiya don i bolo.»

⁴² O kɔ, masacɛ y'a ka bololanigɛ bɔ a yɛrɛ bolo k'a don Yusufu bolo, ka tila ka fani ɲanaman don a kaan na, ani kɔnnɔkisɛ sanulaman fana.

⁴³Wotoro min be tugu ale masacɛ ta kɔ, Yusufu yɛlɛla o kɔnɔ. Mɔgɔ dɔw tun bilar'a ɲa ka to ka pɛrɛn ko: «Aw y'aw kunbiri gwan duguma!» A kɛra ten, masacɛ y'a sigi k'a kɛ Ezipiti jamana bɛɛ kuntigi ye.

⁴⁴A y'a fɔ Yusufu ye tugu ko: «Ne ye masacɛ ye, n'i m'a fɔ ko min ka kɛ, mɔgɔ si te se k'o kɛ Ezipiti jamana bɛɛ kɔnɔ.»

⁴⁵Masacɛ ye tɔgɔ la Yusufu kan ko Safinatipaneya. U ka dugu dɔ be yen, min tɔgɔ ko Ɔni, a y'o dugu nin murutigi Potifari denmuso Asenati d'a ma furu la. Yusufu bɔra ka Ezipiti jamana yɔrɔ bɛɛ yaala.

⁴⁶Yusufu tagara Ezipiti masacɛ fɛ tuma min na, a sii tun ye saan bi saba ye. A ye sira ɲini a fɛ ka taga jamana yɔrɔ bɛɛ yaala.

⁴⁷O sanɲuman wolonwula nunu kɔnɔ, suman sɔrɔla jamana kɔnɔ kosɔbɛ.

⁴⁸Suman minw sɔrɔla Ezipiti o saan wolonwula nunu kɔnɔ, Yusufu y'o bɛɛ lajɛn k'a mara dugubabaw kɔnɔ, ka dugudenninw taw ta ka na n'u ye dugubabaw kɔnɔ k'u mara yen.

⁴⁹A ye suman lajɛn, a cayara fɔɔ k'a dama tɛmɛ, u yɛrɛ tun t'a suma k'a jati tugu cayakojugu fɛ.

⁵⁰Yanni kɔngɔ donsan ka se, Yusufu tun ye dencɛ fila sɔrɔ ka ban a muso Asenati fɛ, n'o ye Ɔni dugu jotigi Potifari denmuso ye.

⁵¹A ye deen fɔlɔ tɔgɔ la ko Manase, bari a ko Ala y'ale kɛ a ɲinɛn'a ka sɛgɛn n'a ka bɔnɔ ye k'a facɛ ka soo la.

⁵²A ye deen filanan tɔgɔ la ko Efarayimu, ko: «Ala ye ne sɔn deenw na ne ka tɔɔrɔyɔrɔ la.»

⁵³Suman tun sɔrɔla Ezipiti jamana kɔnɔ saan wolonwula minw kɔnɔ, olu tɛmɛna tuma min na,

⁵⁴ kɔngɔ bena don saan wolonwula minw kɔnɔ, olu sera i n'a fɔ Yusufu tun y'a fɔ cogo min na. Kɔngɔ donna jamana tɔw bɛɛ la, nga dumuni tun be sɔrɔ Ezipiti yɔrɔ bɛɛ la.

⁵⁵ Kɔngɔ fana nana se Ezipiti yɔrɔ bɛɛ la tuma min na, jamanadenw kasira Ezipiti masacɛ nɔɔ fɛ janko a ka dumuni d'u ma. Masacɛ y'a fɔ u bɛɛ ye k'u ka taga Yusufu fɛ, ko n'a ye fɛɛn min fɔ u ye, u k'o kɛ.

⁵⁶Kɔngɔ sera jamana yɔrɔ bɛɛ la. Yusufu ye sira di k'u ka bondow bɛɛ dayɛlɛ dugubabaw bɛɛ la janko ka suman feere Ezipitikaw ma. Kɔngɔ fana juguyara Ezipiti jamana na.

⁵⁷Mɔgɔ bɛɛ tun be taga Ezipiti ka suman san Yusufu fɛ, bari kɔngɔ tun juguyara diɲɛ faan bɛɛ la.