Read dyu Koow daminɛ kitabu 42 Bible Online

Koow daminɛ kitabu 42 - dyu bible

Koow daminɛ kitabu 42

¹Yakuba y'a mɛn ko suman be sɔrɔ Ezipiti minkɛ, a ko a deenw ma: «N'aw sigira ka to ka ɲɔgɔn filɛ, aw bena mun le sɔrɔ o la sa?

² Ne y'a mɛn ko suman be sɔrɔ Ezipiti. Aw ye taga yen ka dɔ san ka na n'a ye janko an kana sa.»

³Yusufu kɔrɔcɛ tan tagara Ezipiti janko u ka suman san.

⁴Yakuba tun ma sɔn ka Yusufu dɔgɔnin Bɛnzamɛn bila ka taga n'u ye, bari a tun be siran ko kojugu dɔ kan'a sɔrɔ.

⁵Yakuba deenw tagara waasa u ka suman san ni mɔgɔ dɔw ye, bari kɔngɔ barika tun boɲana Kanaan jamana na fana.

⁶Yusufu le tun be jamana kunna, ale lo tun be suman feere jamanadenw bɛɛ ma. A kɔrɔw sera tuma min na, u y'u kunbiri gwan a kɔrɔ k'u ɲaa biri duguma.

⁷A y'a kɔrɔ nunu ye dɔrɔn, a y'u lɔn, nga a y'a yɛrɛ kɛ i n'a fɔ mɔgɔ wɛrɛ u faan fɛ, k'a ka kuma gwɛlɛya u ma, k'a fɔ u ye ko: «Aw bɔra min?» Olu y'a jaabi ko: «An bɔra Kanaan jamana na ka na yan janko ka suman san.»

⁸Yusufu tun ye olu lɔn, nga olu ma Yusufu lɔn.

⁹ A hakili jigir'a ka siko nunu na, a tun ye minw kɛ a kɔrɔ nunu ka koo la, a y'a fɔ u ye ko: «Aw kɛra yɔrɔkɔlɔsibagaw ye! Aw nana janko barika te jamana yɔrɔ min na, aw k'o lɔn.»

¹⁰U y'a jaabi ko: «Ayi an matigi, i ka baarakɛlaw nana janko u ka se ka suman san.

¹¹An bɛɛ ye faa kelen deenw ye. An kɔnɔ gwɛnin lo, i ka baarakɛlaw te dogora ka jamana kɔlɔsi.»

¹²A y'a fɔ u ye tugu ko: «Tiɲɛ tɛ! Aw nana janko ka jamana nin dɛsɛyɔrɔ filɛ k'o lɔn.»

¹³U y'a fɔ a ye tugu ko: «I ka baarakɛlaw tun ye mɔgɔ tan ni fila ye u faa fɛ. A siginin be Kanaan jamana na. An bɛɛ dɔgɔ tora n'an faa ye soo, mɔgɔ kelen te yen tugu.»

¹⁴Yusufu segira k'a fɔ u ye ko: «Ne y'a fɔ ka ban aw ye ko aw be dogora ka jamana kɔlɔsi!

¹⁵Aw bena kɔrɔbɔ cogo min na, o filɛ nin ye: Ka Ezipiti masacɛ to sii la, aw tena sira sɔrɔ ka bɔ yanni aw dɔgɔcɛ nin ma na.

¹⁶Aw ye mɔgɔ kelen bɔ aw cɛma k'a ci a be taga aw dɔgɔnin nin minɛ ka na n'a ye. Aw tɔw bena to kaso la. O la, aw ka kuma bena sɛgɛsɛgɛ yala ni tiɲɛ lo. Ne b'a fɔ masacɛ tɔgɔ la ko aw be dogora ka jamana kɔlɔsi!»

¹⁷A y'u bɛɛ bila kaso la fɔɔ tile saba.

¹⁸A tile sabanan loon, a y'a fɔ u ye ko: «Ne bena min fɔ aw ye, aw k'o kɛ, janko aw nii ka kisi, bari ne be siran Ala ɲa.

¹⁹N'aw kɔnɔ gwɛnin lo, aw dɔ ka to kaso la yan, tɔw ka taga suman di aw ka somɔgɔw ma, minw sigɛnnin be kɔngɔ bolo.

²⁰O kɔ, aw k'aw dɔgɔcɛ nin minɛ ka na n'a ye. O la, a bena lɔn ko aw ka kuma nunu ye tiɲɛ ye, o la, aw tena sa tugu.» U y'a kɛ ten.

²¹U tora k'a fɔ ɲɔgɔn ye ko: «Waati min na an tun y'a ye ko an dɔgɔcɛ tɔɔrɔnin lo, a y'an daali ka dɛsɛ, an ma sɔn. An tun ye kojugu kɛ, o juru le be sarala an na.»

²² O tuma na, Urubɛn y'a fɔ u ye ko ale tun m'a fɔ u ye wa, ko u kana deen nin hakɛ ta, ko u tun ma sɔn ka mɛnni kɛ a fɛ, ko a filɛ sa, ko a fagako ma kɛ u bɛɛ kunko ye wa.

²³U tun m'a lɔn ko Yusufu b'u ka kuma nunu mɛnna, bari Yusufu tun be kuma u fɛ mɔgɔ wɛrɛ b'a yɛlɛma u ye.

²⁴A bɔra u kɔrɔ ka taga kasi, o kɔ ka na kuma u fɛ, ani ka sɔrɔ ka Simeyɔn minɛ k'a siri u ɲana.

²⁵Yusufu y'a ɲini a ka baarakɛlaw fɛ ko u k'u ka bɔɔrɔw fa suman na, ka tila k'u kelen kelen bɛɛ ka wari don bɔɔrɔ nunu kɔnɔ tugu, ka sira kan dumuta di u ma fana. U y'a kɛ ten.

²⁶U y'u ka sumanw ta k'u la u ka faliw kan ka taga.

²⁷U tagara se yɔrɔ dɔ la ka la o yɔrɔ la, mɔgɔ kelen y'a ka bɔɔrɔ daa foni ko a be suman dɔ di a ka fali ma. A ye wari ye suman sanfɛ.

²⁸A ko a balimaw ma: «U ye ne ka wari segi ne ma, a filɛ suman sanfɛ.» U hakili cɛnna kosɔbɛ fɔɔ u be yɛrɛyɛrɛ. U y'a fɔ ɲɔgɔn ye ko: «Ala b'a fɛ ka mun le kɛ an na sa?»

²⁹U tagara se u facɛ Yakuba fɛ tuma min na Kanaan jamana na, koo min ye u sɔrɔ, u y'o bɛɛ lakali a ye, u ko:

³⁰«Mɔgɔ min ye o jamana nin kuntigi ye, a ye kuma gwɛlɛmanw fɔ an ye dɛ. A ko an kɛra jamana kɔlɔsibagaw ye.

³¹An y'a yira a la ko an te dogora ka yɔrɔ kɔlɔsi, ko an kɔnɔ gwɛnin lo.

³²An tun ye mɔgɔ tan ni fila ye an facɛ fɛ, mɔgɔ kelen kɔni te yen tugu, an dɔgɔcɛfitini tora n'an facɛ ye Kanaan jamana na.

³³A segira k'a fɔ an ye ko n'an b'a fɛ ale ka la an na, ko an ka mɔgɔ kelen to a fɛ yen, ka suman ta ka taga o di an ka somɔgɔw ma, minw sigɛnnin be kɔngɔ bolo,

³⁴ka sɔrɔ k'an dɔgɔcɛfitini nin minɛ ka na n'a ye. K'o la, ale ben'a lɔn ko an te yɔrɔkɔlɔsibagaw ye, ko an kɔnɔ gwɛnin lo, ani ko ale bena an balimacɛ nin bila, ka sira di an ma k'an ka koo ɲanabɔ jamana nin kɔnɔ.»

³⁵O kɔ, u y'a daminɛ k'u ka sumanw yɛlɛma tuma min na, u kelen kelen bɛɛ y'u ka wari nunu sirinin ye u ka bɔɔrɔw kɔnɔ. U n'u facɛ y'o ye tuma min na, u siranna.

³⁶U facɛ Yakuba y'a fɔ u ye ko: «Aw b'a fɛ ne ka bɔnɔ n deenw na! Yusufu te yen tugu, Simeyɔn fana te yen, aw b'a fɛ ka taga ni Bɛnzamɛn fana ye. O koo bɛɛ dabɔra ne le kama!»

³⁷O la, Urubɛn y'a fɔ a facɛ ye ko: «Ni ne ma kɔsegi ka na n'i deen Bɛnzamɛn ye fewu ka n'a d'i ma, i ka ne dencɛ fila nunu faga. A di ne ma, ne bena segi ka na n'a ye k'a d'i ma.»

³⁸Yakuba ko: «Ne deen nin tena taga n'aw ye abada, a kɔrɔcɛ sara, a tora ale kelen. Ni fɛɛn dɔ y'a sɔrɔ sira kan, aw bena kɛ ne cɛkɔrɔbatɔ be sa dusukasi la.»