Read dyu Koow daminɛ kitabu 43 Bible Online

Koow daminɛ kitabu 43 - dyu bible

Koow daminɛ kitabu 43

¹Kɔngɔ tun be juguyara ka taga Kanaan jamana na.

²U tun ye suman minw sɔrɔ Ezipiti ka na n'u ye, o banna tuma min na, Yakuba ko a deenw ma: «Aw ye taga suman dɔɔni san tugu.»

³Zuda y'a fɔ u facɛ ye ko: «Cɛɛ nin y'a fɔ an ye k'a gwɛlɛya kosɔbɛ ko: ‹N t'a fɛ k'aw ye n ɲana tugu n'aw dɔgɔcɛfitini nin te n'aw ye.›

⁴N'i be sɔn k'an dɔgɔcɛ bila a ka taga n'an ye, an bena taga suman san i ye.

⁵N'i te sɔn a be taga n'an ye, an fana tena taga, bari cɛɛ nin y'a fɔ ko an man kan ka ye ale ɲafɛ, n'an dɔgɔcɛ nin te n'anw ye.»

⁶Yakuba y'a fɔ u ye ko: «Mun le y'a to aw ye nin baarajugu nin ɲɔgɔn kɛ ne la ten, k'a fɔ cɛɛ nin ye ko dɔgɔcɛ b'aw fɛ?»

⁷U y'a jaabi ko: «Cɛɛ nin tun y'an dɛrɛ ni ɲiningaliw ye, a y'an ɲininga an yɛrɛ ka koo la k'an ɲininga an ka somɔgɔw la fana. A ko: ‹Aw facɛ be sii la halibi wa? Balimacɛ wɛrɛ b'aw fɛ wa?› An do tun ka kan k'a jaabi o la. An yɛrɛ tun be se k'a lɔn ko a ben'a fɔ ko an ka na n'a ye wa?»

⁸Zuda y'a fɔ a faa Yakuba ye ko: «N'i sɔnna kanbelen nin be taga ni ne ye, an bena taga sisan sisan janko an ka kisi saya ma, an ani ele yɛrɛ ani anw deenw.

⁹Ne yɛrɛ le be lɔ n'a kunko ye. Ni ne ma segi n'a ye ka n'a d'i ma fewu, i ka ne ɲininga a la. Ni a ma kɔsegi fewu ka na, i hakɛ be ne le kan tuma bɛɛ.

¹⁰A filɛ sa, n'an tun ma to munumunu na, an tun bena segi ka ban a siɲɛ filanan na.»

¹¹O la, u facɛ Yakuba y'a fɔ ko: «O tuma na, aw ye an ka jamana kɔnɔ fɛnɲuman dɔw ta aw bolo ka taga o di cɛɛ nin ma. Yiriji kasadiman sifa dɔw, ni lii dɔɔni, ani pisitasiyiridenw, ni amandiyiridenw fana.

¹²Aw ye wari dɔ wɛrɛ ta, ani wari minw yera aw ka bɔɔrɔw kɔnɔ fana, n'a sɔrɔ u tun filila le.

¹³Aw ye aw dɔgɔnin minɛ ka taga, aw ye segi ka taga n'a ye cɛɛ nin fɛ.

¹⁴Setigi Ala ka cɛɛ nin karaba aw ye, a ka sɔn Simeyɔn ni Bɛnzamɛn ka segi ka na n'aw ye. Ne kɔni, hali ni ne ka kan ka to dentanya la, ne bena to a la.»

¹⁵Deen nunu ye boɲafɛnw ta, ka wari dɔ wɛrɛ ta, ka Bɛnzamɛn fana minɛ ka taga Ezipiti, Yusufu fɛ.

¹⁶Yusufu ye Bɛnzamɛn ye n'u ye tuma min na, a y'a fɔ a ka soo kuntigi ye ko a ka mɔgɔ nunu ladon soo kɔnɔ ka begɛn dɔ faga ka dumuni labɛn, ko bari mɔgɔ nunu bena dumuni kɛ ni ale ye tilefɛ.

¹⁷Yusufu ye min fɔ a ka soo kuntigi ye, a y'o kɛ, a ye mɔgɔ nunu ladon Yusufu ka soo kɔnɔ.

¹⁸U y'a ye ko u ye u minɛ ka don n'u ye Yusufu ka soo kɔnɔ tuma min na, u siranna kosɔbɛ. U tun b'a miirila ko wari minw tun yera u ka bɔɔrɔw kɔnɔ u ka taama fɔlɔ la, ko u b'a fɛ k'u minɛ, olu ni u ka faliw bɛɛ, k'u tɔɔrɔ ani k'u kɛ jɔɔnw ye o wari kosɔn.

¹⁹U gwɛrɛla Yusufu ka soo kuntigi la soo daa la, ka kuma a fɛ ko:

²⁰«I hakɛ to matigi, an nana yan siɲɛ kelen ka suman san.

²¹An taanin kɔ, an sera yɔrɔ dɔ la an tun ka kan ka lɔ yɔrɔ min na, o yɔrɔ la, an y'an ka bɔɔrɔw daa foni. An kelen kelen bɛɛ ye an ka wariw dafanin sɔrɔ suman kan bɔɔrɔw kɔnɔ. An kɔsegira n'o ye.

²²An fana nana ni wari wɛrɛw ye janko ka suman san. An m'a lɔn mɔgɔ min tun ye an ka wari nunu don an ka bɔɔrɔw kɔnɔ.»

²³Yusufu ka soo kuntigi y'a fɔ u ye ko: «Aw k'aw hakili sigi, aw kana siran foyi la. Aw faaw ka Ala min ye aw ka Ala ye, ale lo ye nafolo d'aw ma aw ka bɔɔrɔw kɔnɔ. N'o tɛ, aw ka wari sera ne ma.» O kɔ, u nana ni Simeyɔn ye u fɛ.

²⁴Cɛɛ nin ye Yusufu balima nunu ladon Yusufu ka soo kɔnɔ, ka senkoji d'u ma, ani ka dumuni di u ka faliw ma.

²⁵Yusufu balima nunu ye u ka boɲafɛnw labɛn n'u be Yusufu makɔnɔna tilefɛ. Bari u tun y'a mɛn ko u bena dumuni kɛ n'a ye.

²⁶Yusufu nana soo tuma min na, u ye u ka boɲafɛn nunu ta k'o d'a ma, ani k'o kunbiri gwan a ɲakɔrɔ.

²⁷O kɔ, Yusufu y'u ɲininga ko u ka kɛnɛ wa. A ko tugu: «Aw facɛ cɛkɔrɔba nin aw tun ye min koo fɔ ne ye, a ka kɛnɛ wa? Halibi a be sii la wa?»

²⁸U y'a jaabi ko: «I ka baarakɛla an facɛ kɔni be sii la. A ka kɛnɛ fana.» O kɔ, u y'u kunbiri gwan a ɲakɔrɔ k'a boɲa.

²⁹Yusufu y'a ɲaa kɔrɔta k'a baden Bɛnzamɛn filɛ. A y'a fɔ u ye ko: «Aw tun ye aw dɔgɔnin min koo fɔ ne ye, ale lo ye nin ye wa?» O kɔ, a y'a fɔ tugu ko: «Ala ka makari i la, n dɔgɔnin.»

³⁰A dɔgɔnin nin makari y'a minɛ fɔɔ a ɲaji tun b'a fɛ ka bɔ, o la, a wilila joona joona ka don a ka layɔrɔ la ka kasi yen.

³¹O kɔ, a y'a ɲaa ko ka bɔ. A ye fanga la a yɛrɛ kan k'a fɔ k'u ka na ni dumuni ye.

³²U ye Yusufu ka dumuni d'a ma danna, k'a balimaw ta d'u ma danna. Ezipitika minw tun be yen, u ye olu ta fana d'u ma danna. Bari Ezipitikaw tun te sɔn ka dumuni kɛ ni eburuw ye, o ye tana ye olu fɛ.

³³U ye sigiyɔrɔ di Yusufu balima nunu ma a ɲafɛ ka tugu ɲɔgɔn na, k'a daminɛ kɔrɔ ma fɔɔ ka n'a laban ni dɔgɔnin ye. U kabakoyara kosɔbɛ ni u be to ka ɲɔgɔn filɛ.

³⁴Dumuni min tun be Yusufu kɔrɔ, a y'o dɔ di a balima nunu ma, nga Bɛnzamɛn ta tun ka ca ni tɔ nunu ta ye fɔɔ siɲɛ duuru. Yusufu korila ka duvɛn min n'u ye ɲɔgɔn fɛ.