Read dyu Koow daminɛ kitabu 44 Bible Online

Koow daminɛ kitabu 44 - dyu bible

Koow daminɛ kitabu 44

¹Yusufu y'a fɔ a ka soo kuntigi ye ko a ka mɔgɔ nunu ka bɔɔrɔw fa suman na, u be se ka min ta, ani ko a k'u kelen kelen bɛɛ ka wari segi k'o don u ka bɔɔrɔw kɔnɔ suman sanfɛ.

²Ko a k'ale ka minfilen warigwɛlaman don u bɛɛ dɔgɔnin ka bɔɔrɔ kɔnɔ suman sanfɛ, ani a ka suman san wari. Yusufu y'a fɔ a ka soo kuntigi ye cogo min na, ale fana y'a kɛ ten.

³Dugu gwɛra dɔrɔn, sɔgɔma joona, u ye sira di mɔgɔ nunu ma. U tagara n'u ka faliw ye.

⁴U ye sira minɛ ka taga, u bɔra dugu kɔnɔ dɔrɔn, u tun ma janfa kosɔbɛ, Yusufu y'a fɔ a ka soo kuntigi ye ko a ka wili ka mɔgɔ nunu sɛgɛrɛ, ko n'a y'u sɔrɔ yɔrɔ min na, a k'a fɔ u ye ko: «Mun na aw ye koɲuman sara ni kojugu ye?

⁵Ne kuntigi be minni kɛ ni filen min ye ani a be to ka lagwɛli kɛ n'a ye, aw y'a ta, aw ye kojugu kɛ dɛ.»

⁶Yusufu ka soo kuntigi tugura u kɔ ka taga u sɔrɔ, ka kuma nunu fɔ u ye ten.

⁷U y'a jaabi ko: «Mun na an kuntigi be kumana ten? I ka baaradenw te sɔn k'o koo ɲɔgɔn kɛ!

⁸An tun ye wari minw ye an ka bɔɔrɔw kɔnɔ suman kan, an ma segi ka na n'o ye ka bɔ Kanaan jamana na wa? An do ben'a kɛ cogo di ka wari, walima sanu soɲa i kuntigi ka soo kɔnɔ?

⁹I ka baaraden nunu cɛma, ni fɛɛn nin yera an min kun, o tigi be faga le, an tɔw fana be kɛ i ka jɔɔnw ye.»

¹⁰Soo kuntigi nin y'a fɔ u ye ko: «Ayiwa, aw ye min fɔ a bena kɛ ten, n'a yera mɔgɔ min fɛ, o tigi bena kɛ ne ka jɔɔn ye, aw tɔw be taga.»

¹¹O yɔrɔnin bɛɛ, u kelen kelen bɛɛ y'u ka bɔɔrɔw jigi k'u daa foni.

¹²Soo kuntigi nin y'a daminɛ ka to ka filɛli kɛ u ka bɔɔrɔw kɔnɔ, k'a daminɛ kɔrɔcɛ ma fɔɔ ka taga se u bɛɛ dɔgɔnin ma. Filen nin yera Bɛnzamɛn ka bɔɔrɔ kɔnɔ.

¹³U y'u ka faniw faranfaran, o kɔ, u y'u ka doniw ta k'u la u ka faliw kan ka segi ka don dugu kɔnɔ tugu.

¹⁴Zuda n'a balimaw sera Yusufu ka soo, o y'a sɔrɔ Yusufu tun be yen a ma bɔ fɔlɔ. U y'u kunbiriw gwan duguma Yusufu ɲakɔrɔ.

¹⁵Yusufu y'a fɔ u ye ko: «Aw ye mun koo le kɛ yan ten? Aw m'a lɔn ko mɔgɔ min be i n'a fɔ ne, a be se ka lagwɛli kɛ ka koo lɔn wa?»

¹⁶Zuda y'a fɔ a ye ko: «An be se ka mun le fɔ ne matigi ye? Kuma jumɛn le be an daa la k'a fɔ? An te se ka foyi fɔ min be se k'an kunmabɔ. Ala yɛrɛ le y'i ka baaradenw ka kɛwalijugu yira kɛnɛkan. Filen nin yera mɔgɔ min fɛ, ani an tɔw, an bɛɛ kɛra i ka jɔɔnw ye.»

¹⁷Yusufu ko: «Abada, ne t'o kɛ, filen nin yera mɔgɔ min fɛ, ale lo bena kɛ ne ka jɔɔn ye. Aw tɔw k'aw ka minanw ta ka kɔsegi ka taga aw facɛ fɛ hɛrɛ la.»

¹⁸Zuda gwɛrɛla Yusufu la k'a fɔ ko: «I hakɛ to ne matigi, sabali ka i ka baaraden to a be kuma dɔɔni fɔ i ye. E ni Ezipiti masacɛ bɛɛ ka kan. O bɛɛ n'a ta, i kana dimi ne kɔrɔ.

¹⁹Ne kuntigi, ele tun y'i ka baaradenw ɲininga ko: ‹Facɛ b'aw fɛ wa? Ani dɔgɔnin wa?›

²⁰Ne matigi, an y'i jaabi ko an facɛ kɔrɔla, ani dɔgɔcɛfitini b'an fɛ. A ye min sɔrɔ a ka cɛkɔrɔbaya waati la, olu tun ye deen fila ye u baa fɛ. Kɔrɔcɛman sara, a tora ale kelen, a koo fana ka di an facɛ ye kosɔbɛ.

²¹O kɔ, i y'a ɲini i ka baaradenw fɛ ko an ka na n'a ye i k'a filɛ.

²²Ne matigi, an y'a fɔ i ye ko a ka gwɛlɛ kanbelen nin ka bɔ an faa kɔrɔ, n'a bɔra yen an faa bena sa.

²³I y'a fɔ i ka baaradenw ye fana ko ni an dɔgɔninfitini ma na n'an ye, an kana ye i ɲakɔrɔ.

²⁴«An fana segira ka taga se an facɛ, i ka baaraden fɛ tuma min na, an ye ne matigi ka kuma nin fɔ a ye.

²⁵An facɛ y'a ɲini an fɛ ko an ka kɔsegi ka na suman san tugu.

²⁶An y'a jaabi ko an te se ka segi ka taga yen tugu, fɔɔ ni an dɔgɔnin nin be n'an ye. N'o tɛ, an te se ka taga lɔ cɛɛ nin ɲakɔrɔ, a ɲaa ka la an kan ni an dɔgɔnin te n'an ye.

²⁷I ka baaraden an facɛ y'a fɔ an ye ko an y'a lɔn k'ale ka muso nin ye deen fila dama le sɔrɔ ale fɛ.

²⁸Ko kelen nin bɔr'a fɛ ka taga, a ma segi ka na, ko a lanin b'a la ko wara y'a minɛ, bari ale ɲaa ma l'a kan tugu halibi.

²⁹Ko n'an ye nin kelen nin minɛ ale fɛ ka taga n'a ye, ko ni fɛɛn dɔ y'a sɔrɔ, ko an bena kɛ sababu ye ale cɛkɔrɔbatɔ nin be sa dusukasi bolo.

³⁰«Sisan ni ne segira ka taga i ka baaraden ne facɛ sɔrɔ ni kanbelen nin te n'anw ye, k'a sɔrɔ a jigi bɛɛ be ale lo kan,

³¹n'a y'a ye ko kanbelen nin te n'an ye, a bena sa. A kɛra ten, i ka baaradenw bena kɛ sababu ye i ka baaraden an facɛ cɛkɔrɔbalaman be sa dusukasi bolo.

³²I ka baaraden y'a daa di a facɛ ma ko ni a ma kɔsegi ka na ni kanbelen nin ye fewu, ko a facɛ hakɛ be ale kan tuma bɛɛ.

³³Sisan ne b'i daali ko i ka sɔn ne ka to kanbelen nɔɔ na, ka kɛ i ka jɔɔn ye, kanbelen nin ka taga n'a kɔrɔw ye soo.

³⁴Ne be se ka segi ka taga cogo di ne facɛ fɛ, ni kanbelen nin te ni ne ye? Ne kɔni t'a fɛ n ɲaa ka la n facɛ ka dusukasi kan abada!»