Read dyu Koow daminɛ kitabu 47 Bible Online

Koow daminɛ kitabu 47 - dyu bible

Koow daminɛ kitabu 47

¹Yusufu segira ka ta'a fɔ Ezipiti masacɛ ye ko: «N facɛ ni n balimaw nana ka bɔ Kanaan jamana na n'u ka begɛnw, n'u ka minanw bɛɛ ye. U be Gosɛn mara la.»

²A ye mɔgɔ duuru bɔ a balimaw cɛma k'u yira masacɛ la.

³Masacɛ y'u ɲininga ko: «Aw be mun baara le kɛ?» U y'a jaabi ko: «I ka baarakɛlaw ye begɛnmaralaw ye i n'a fɔ an faaw tun be cogo min na.»

⁴U tilara k'a fɔ ko: «Kɔngɔ juguyanin be Kanaan. I ka baarakɛlaw ka begɛnw ka dumuni te sɔrɔla yen tugu. O la, an nana yan ka sigi lonanya la aw fɛ. Yala, an be se ka sigi Gosɛn mara la wa?»

⁵Masacɛ y'a fɔ Yusufu ye ko: «E facɛ n'i balimaw nana i fɛ.

⁶Ayiwa, Ezipiti jamana b'i bolo, a yɔrɔ min ka ɲi, i faa n'i balimaw bila o yɔrɔ la. U ka sigi Gosɛn mara la. I b'a filɛ i badenw cɛma, minw ka kisɛ, u bena kɛ ne yɛrɛ ka begɛnw kɔlɔsiko ɲafɛ.»

⁷Yusufu tagara n'a facɛ Yakuba fana ye masacɛ fɛ, k'a yira a la. Yakuba y'a fo kosɔbɛ.

⁸Masacɛ y'a ɲininga ko ale Yakuba sii be saan joli bɔ.

⁹Yakuba y'a jaabi ko: «N saan kɛmɛ ni bi saba ye nin ye ni n be yaala la jamanaw ni jamanaw cɛ. O man ca, ne ye tɔɔrɔ sɔrɔ o kɔnɔ. Ne sii ma se n faaw ta ɲɔgɔn ma fɔlɔ o taama nin kɔnɔ.»

¹⁰O kɔ, Yakuba ye masacɛ fo kosɔbɛ ka sɔrɔ ka taga.

¹¹Yusufu tagara Ezipiti jamana yɔrɔɲuman di a facɛ n'a balimaw ma Aramusɛsi mara la i n'a fɔ masacɛ y'a laɲini cogo min na.

¹²Yusufu lɔra n'a facɛ n'a balimaw n'a faa ka somɔgɔw bɛɛ ka dumuniko ye ka kɛɲɛ n'u ka denbaya mɔgɔ daa ye.

¹³Kɔngɔ nin juguyara fɔɔ dumuni tun te sɔrɔla yɔrɔ si tugu. Kanaankaw ni Ezipitikaw m'a lɔn u bena min kɛ.

¹⁴Yusufu ye suman feere Ezipitikaw ni Kanaankaw ma k'o wari bɛɛ ladon Ezipiti masacɛ ka soo.

¹⁵Wari tununa pewu ka bɔ Kanaan ni Ezipiti jamana na. Ezipitikaw bɛɛ nana Yusufu fɛ k'a fɔ a ye ko: «Dumuni di an ma. Mun na i b'a to an be sa i ɲana kɔngɔ bolo waritanya kama?»

¹⁶Yusufu y'u jaabi ko: «Ni wari t'aw bolo, aw ye na n'aw ka begɛnw ye, ne bena dumuni di aw ma.»

¹⁷U nana n'u ka begɛnw ye Yusufu fɛ, ale ye dumuni d'u ma u ka soow, ni begɛnmisɛnw, ni misiw, ani faliw nɔɔ na. A ye dumuni di u ma o saan kɔnɔ, k'o falen u ka begɛnw bɛɛ la.

¹⁸O saan banna, u nana Yusufu fɛ tugu k'a fɔ a ye ko: «An matigi, an tena tiɲɛ dogo i la, wari kɔni tununa pewu, an ka begɛnw fana kɛra e ta ye. An yɛrɛw n'an ka forow le tora sisan.

¹⁹Mun na i b'a to an be sa i ɲana? N'anw te yen, an ka forow bena to yen gwansan. O tuma na sa, anw, n'an ka forow san ka dumuni di an ma, an ka kɛ Ezipiti masacɛ ka jɔɔnw ye. An t'a fɛ ka sa. Sumansi di an ma waasa an ka se ka to nii na. N'o tɛ n'an sara, yɔrɔ bena to lakolon.»

²⁰A kɛra ten, Yusufu ye Ezipiti dugukolo bɛɛ san masacɛ ye. Ezipitikaw kelen kelen bɛɛ y'u ka forow feere, bari kɔngɔ nin tun juguyara u ma kosɔbɛ.

²¹Yusufu ye jamanadenw bila jɔnyabaara la jamana faan bɛɛ.

²²Nga a tun ma murutigiw ka forow san. Bari masacɛ tun y'a latigɛ k'olu ka balo ka bɔ ale yɛrɛ le fɛ. U ka dumuni tun be bɔ o yɔrɔ la, o le y'a to olu ma sɔrɔ k'u ka forow feere.

²³Yusufu y'a fɔ jamanadenw ye ko: «Ne ye aw n'aw ka forow san masacɛ ye bii. N bena sumansi di aw ma waasa aw ka se ka sɛnɛ kɛ.

²⁴Ni suman mɔna, aw b'aw ta tilan sigiyɔrɔ duuru, tilan kelen be kɛ masacɛ ta ye, a tɔɔ naani be kɛ sumansi ye, ani aw n'aw ka somɔgɔw balota ye.»

²⁵U y'a jaabi ko: «I y'an kisi. I ye ɲumanya kɛ an ye. O la, an fana be sɔn ka kɛ masacɛ ka jɔɔnw ye.»

²⁶Yusufu ye sariya sigi ten, min be seen kan halibi Ezipiti jamana na. Jamana kɔnɔ suman tilan duurunan ka kan ka di masacɛ ma. Murutigiw dama ka forow le ma kɛ a ta ye.

²⁷Isirayɛlidenw tora Gosɛn mara la Ezipiti jamana na. U ye deenw sɔrɔ ka caya kosɔbɛ, o yɔrɔ nana kɛ u ta ye.

²⁸Yakuba ye saan tan ni wolonwula le kɛ Ezipiti jamana na. A sii bɛɛ kɛra saan kɛmɛ ni bi naani ni wolonwula ye.

²⁹ Yakuba y'a lɔn ko a saya tuma surunyana minkɛ, a y'a deen Yusufu wele k'a fɔ a ye ko: «N'o y'a sɔrɔ ne koo ka di e ye, e k'i ka ɲumanya n'i ka kantigiya yira ne la, k'i bolo don ne woto kɔrɔ k'a yira ko i b'i daa di ko i tena ne suu don Ezipiti jamana na.

³⁰Ni ne sara tuma min na, i ka bɔ ni ne suu ye yan ka taga n suu don n faaw ka kaburu kɔnɔ.» Yusufu y'a jaabi ko: «I y'a fɔ cogo min na, ne ben'a kɛ ten.»

³¹Yakuba y'a fɔ tugu ko: «I kali.» Yusufu kalila. O kɔ, Yakuba biril'a ka dilan kuun sanfɛla la.