Read dyu Koow daminɛ kitabu 49 Bible Online

Koow daminɛ kitabu 49 - dyu bible

Koow daminɛ kitabu 49

¹Yakuba ye cii sama a dencɛw ma k'u ka na. U nana tuma min na, a ko u ka lajɛn a kɔrɔ. Koo min bena kɛ u la sini, ale b'o fɔ u ye.

²A ko: «Yakuba deenw, aw ye gwɛrɛ ka mɛnni kɛ. Aw k'aw tulo malɔ aw faa Isirayɛli ka kuma na.

³Urubɛn, i ye ne deen fɔlɔ ye, ne kɔnna ka min sɔrɔ ne ka kanbelenya waati la. Fanga b'i la kosɔbɛ, see fana b'i ye kosɔbɛ.

⁴I be i n'a fɔ jii, min be bugubugu, i tena to ɲafɛ tugu, bari i lara n'i faa ka muso dɔ ye. I ye ne ɲagami.

⁵Simiŋɔn ni Levi ye dɔgɔ ni kɔrɔ ye, olu be jɛn ka koo farimanw kɛ. [1]

⁶U b'u yɛrɛ dogo ka ɲɔgɔn ye koo minw na, ne t'a fɛ ka n seen don o la. Ne t'a fɛ ka taga u ka ɲɔgɔnyeyɔrɔ la. Bari u dimina, ka mɔgɔw faga. U ye turaw kɔfɛsen fasaw tigɛ u yɛrɛ sago la.

⁷U ka dimi kosɔn, u danganin be, bari u ka fari fɔɔ ka tɛmɛ a daan kan. U ka dimikojugu kosɔn, u danganin be, bari u te hinɛ. Ne bena u ka mɔgɔw yɛrɛkɛ Yakuba kɔmɔgɔw cɛma, ne bena u jɛnsɛn Isirayɛlidenw cɛma.

⁸Zuda, i fadenw bena i tanu. I bena i bolo la i juguw tɔngɔrɔ la. I fadenw bena u kunbiri gwan i kɔrɔ.

⁹ Zuda, i be i ko jaraden. Ne deen, i bɔtɔ filɛ i ka sogo minɛyɔrɔ la. E be ɲɔngiri, ka la i ko jara. I be i ko jaramuso, jɔn be se ka fanga l'a kan k'a wili?

¹⁰Masaya tena bɔ Zuda ka somɔgɔw bolo, masabere tena bɔ u bolo, fɔɔ ni a tigi yɛrɛ yɛrɛ nana, siyaw ka kan ka sɔn ale min ta ma.

¹¹A ben'a ka fali siri *ɛrɛzɛnsun la, a ben'a ka faliden siri ɛrɛzɛnsunɲuman la. A ben'a ka faniw ko ɛrɛzɛnji la, a ben'a ka foroca ko ɛrɛzɛnji wuleman la.

¹²A ɲakisɛ bena wulen ka tɛmɛ duvɛn kan, a ɲiin bena gwɛ ka tɛmɛ nɔnɔ kan. [2]

¹³Zabulɔn ka sigiyɔrɔ bena kɛ kɔgɔjida la. Kurunw bena lɔ yen. A ka mara danyɔrɔ bena se fɔɔ Sidɔn dugu faan fɛ.

¹⁴Isakari ye fali barikaman ye, min lanin be begɛnso ɲanaman kɔnɔ.

¹⁵A y'a ye ko a ka lafiɲɛyɔrɔ ka ɲi, ko a ka mara ka di. A sɔnna ka doni ta, a y'a yɛrɛ bila jɔnyabaara la.

¹⁶Dan ben'a ka mɔgɔw mara ni hɔrɔnya ye, a bena jati a fadenw kɔmɔgɔw cɛma.

¹⁷Dan bena kɛ i n'a fɔ saa, sira kan, a bena kɛ fɔnfɔnni ye siradennin kan, min be soo cin a senju la fɔɔ ka sotigi ben a kɔɔ kan.

¹⁸Masaba, ne be i ka kisili makɔnɔ.

¹⁹Kɛlɛdenw bena girin Gadi kan, nga ale bena u kunbɛn k'u gwɛn.

²⁰Dumunifɛn caaman bena sɔrɔ Asɛri ka mara la, dumunifɛnɲuman bena sɔrɔ a ka mara kɔnɔ, min ka kan ni masacɛ ye.

²¹Nɛfutali ye mankalanin labilanin ye, mankalanin lo, min be deen cɛɲumanw wolo.

²²Yusufu ye tura kɛɲɛnin ye, tura kɛɲɛnin lo, jii bɔyɔrɔ daa la. A be kogo sago dumunikɛyɔrɔ la. [3]

²³Kalabonbagaw y'a sɛgɛn kosɔbɛ. U y'a bon n'u ka biɲɛw ye, k'a tɔɔrɔ.

²⁴O bɛɛ n'a ta, a y'a ka kala minɛ ka ɲa, a bolo barikamanw ma ja Yakuba ka Ala, Setigi barika la. Ale lo be Isirayɛlidenw mara i ko sagadɛndɛbaga b'a ka sagaw mara cogo min na. Isirayɛlidenw jigi lanin b'a kan bari a be i ko kabakuru.

²⁵I bolo barikamanw ma ja i faa ka Ala barika la, min b'i dɛmɛ, Setigi Ala barika la, min be koɲuman kɛ i ye. A bena sanji d'i ma ka bɔ sankolo la. A bena jii d'i ma ka bɔ dugukolo kɔnɔ. A bena deen caaman, ni begɛn caaman d'i ma.

²⁶Hɛrɛ min be bɔ fɔlɔfɔlɔ kuluw kunna, fɛnɲuman minw be sɔrɔ tintinkɔrɔw kan, denfa ka duba be tɛmɛ o kan, ne be min kɛra i ye. Ala ka duba nunu bɛɛ minɛ Yusufu ye, ale min be a fadenw kunna.

²⁷Bɛnzamɛn ye warajugu ye. Sɔgɔma, a b'a ka sogo dumu. Wulafɛ, a ye fɛɛn min sɔrɔ, a b'o tilantilan.»

²⁸Isirayɛli ka deen tan ni fila n'u kɔmɔgɔw lo ye o u ye. U faa ye duba minw kɛ u ye, o le ye nunu ye. A ye duba nunu kɛ k'a kɛɲɛ u kelen kelen bɛɛ ma.

²⁹O kɔ, Yakuba y'a fɔ a deenw ye ko: «Ne bena taga n faaw fɛ. Ni ne sara, aw ka ne suu don n faaw gɛrɛfɛ, iticɛ Efurɔn ka foro kuluwo kɔnɔ,

³⁰ Makipela foro kɔnɔ Manbure gɛrɛfɛ, Kanaan jamana na. Ibrayima tun ye min san iticɛ Efurɔn fɛ k'a kɛ sudonyɔrɔ ye.

³¹ Ibrayima n'a muso Sara suuw donna o yɔrɔ la, Isiyaka n'a muso Erebɛka suuw fana donna yen, ne ye Leya fana suu don yen.

³²Ibrayima ye foro ni kuluwo nin san itiw fɛ.»

³³ Yakuba tilara o fɔli la a dencɛw ye tuma min na, a lar'a ka dilan kan, a nii bɔra, a tagar'a faaw fɛ.