Read dyu Koow daminɛ kitabu 50 Bible Online

Koow daminɛ kitabu 50 - dyu bible

Koow daminɛ kitabu 50

¹Yusufu biril'a faa suu kan, ka kasi k'a yɛrɛ tereketereke a kan.

²O kɔ, a y'a fɔ a ka dɔkɔtɔrɔw ye ko u k'a suu labɛn ni fura dɔ ye janko a kana toli. Olu y'o kɛ.

³U ye tile bi naani dafanin kɛ o la, bari o tun be to k'a kɛ o tile daa le kɔnɔ. Ezipitikaw y'a suu kasi tile bi wolonwula kɔnɔ.

⁴A suu kasilonw tɛmɛnin kɔ, Yusufu y'a fɔ Ezipiti masacɛ ka mɔgɔw ye ko: «Ni ne koo diyara aw ye, ne b'aw daali ko aw ka kuma masacɛ fɛ ne ye, k'a fɔ a ye ko

⁵ ne faa ye n wajibiya ka kali. A ko a bena sa, ko a ye kaburu min labɛn a yɛrɛ ye Kanaan jamana na, ko ne ka ta'ale suu don o yɔrɔ la. Ayiwa, ne be sira daali ka taga ne faa suu don ka kɔsegi ka na.»

⁶Masacɛ ko: «I faa y'i wajibiya ka kali koo min na, ta'a suu don ka kɛɲɛ n'o ye.»

⁷Yusufu tagar'a faa suu don. Masacɛ ka jamana ɲamɔgɔw bɛɛ: mɔgɔbaba minw tun be baara kɛ a ka soo kɔnɔ, ni Ezipiti faamaw bɛɛ, u bɛɛ y'a bila sira ka taga.

⁸Yusufu ka somɔgɔw n'a fadenw ani a faa ka somɔgɔw bɛɛ tagara fana. Mɔgɔ si ma to Gosɛn mara la fɔɔ u ka denmisɛnw n'u ka begɛnw.

⁹Wotorow ni sotigiw fana tagara n'u ye. Jama min tagara, jamaba tun lo.

¹⁰U sera Atadi ka sumangosikɛnɛ na Zurudɛn baji kɔfɛ tuma min na, u y'a suu kasi yen ni mankanba ye. Yusufu ye tile wolonwula kɛ a faa sanga la.

¹¹Kanaanw ye sanga nin kɛcogo ye Atadi ka sumangosikɛnɛ na minkɛ, u ko: «O ye sangaba ye Ezipitikaw fɛ dɛ!» O le y'a to, u b'o wele Abɛlimisirayimu, [1] o yɔrɔ min be Zurudɛn baji kɔfɛ.

¹²Yakuba tun ye min fɔ a dencɛw ye, u y'a kɛ ten.

¹³ U tagara n'a suu ye Kanaan jamana na. Ibrayima tun ye foro ni kuluwo min san iticɛ Efurɔn fɛ Manbure gɛrɛfɛ, k'a kɛ sudonyɔrɔ ye, n'o tɔgɔ ko Makipela, u y'a suu don o kuluwo nin kɔnɔ.

¹⁴Yusufu y'a faa suu don ka ban tuma min na, a segira ka taga Ezipiti, a n'a fadenw ni mɔgɔ minw bɛɛ tagara n'a ye sudonyɔrɔ la.

¹⁵Yusufu fadenw y'a ye ko u facɛ sara tuma min na, u ko: «N'a sɔrɔ Yusufu bena an kɔniya k'an ka kojugu ɲɔgɔn kɛ an na.»

¹⁶O la, u ye cii bila a ma ko: «San'i faa ka sa, a y'a fɔ ko

¹⁷an k'a fɔ i ye ko i ka yafa i fadenw ma u ka kojugu nunu kosɔn, u ye minw kɛ i la. Sisan an b'i daali i k'i faa ka Ala ka jɔɔnw ka kojuguw yafa.» Yusufu y'o kuma mɛn tuma min na, a kasira.

¹⁸O kɔ, a fadenw nan'a sɛgɛrɛ k'u kunbiri gwan a kɔrɔ k'a fɔ ko: «An ye i ka jɔɔnw ye.»

¹⁹Yusufu y'a fɔ u ye ko: «Aw kana siran. Yala ne bilara Ala nɔɔ na wa?

²⁰Aw kɔni tun y'a latigɛ ka kojugu kɛ ne la, nga Ala y'a ta k'a yɛlɛma k'a kɛ koɲuman ye janko min kɛra bii, o ka se ka kɛ, mɔgɔ caaman nii ka kisi.

²¹Sisan, aw kana siran, ne bena aw, ni aw deenw balo.» A y'u hakili sigi ni kumaɲuman ye.

²²Yusufu n'a faa ka somɔgɔw tora Ezipiti. A ye saan kɛmɛ ni tan sɔrɔ,

²³a ye mamadenw ni tulomasamaw sɔrɔ a deen Efarayimu fɛ, ani Manase dencɛ Makiri deenw fana wolol'a ɲana.

²⁴Yusufu y'a fɔ a balimaw ye ko: «Ne satuma surunyana. Nga siga t'a la, Ala bena na aw dɛmɛ. A ye layidugwɛlɛn ta Ibrayima ni Isiyaka ani Yakuba ye, ko a bena jamana min di u ma, a bena taga n'aw ye o yɔrɔ la.»

²⁵ Yusufu ye Isirayɛli deenw wajibiya ka kali. A ko: «Ni Ala nana aw dɛmɛ tuma min na, aw ye ne kolow ta ka taga n'u ye.»

²⁶Yusufu sara a saan kɛmɛ ni tannan na. U y'a suu labɛn ni fura dɔ ye janko a kana toli, k'a bila sukɛsu kɔnɔ Ezipiti.