Read dyu Koow daminɛ kitabu 7 Bible Online

Koow daminɛ kitabu 7 - dyu bible

Koow daminɛ kitabu 7

¹Masaba y'a fɔ Nuhun ye ko: «Don kurun kɔnɔ, e n'i ka somɔgɔw bɛɛ, bari ne y'a ye ko i tilennin lo bii mɔgɔw cɛma.

²Seen naani fɛɛn minw ka ɲi ne fɛ, i ka cɛman wolonwula ni musoman wolonwula minɛ olu sifa bɛɛ la. Minw ma ɲi ne fɛ, i ka fila fila minɛ olu sifaw bɛɛ la fana, cɛman kelen ni musoman kelen.

³I ka cɛman wolonwula ni musoman wolonwula bɔ kɔnɔ sifaw bɛɛ la fana janko u sii kana tunu dugukolo kan.

⁴Bari yanni tile wolonwula, ne ben'a kɛ sanji be ben dugukolo kan tile bi naani kɔnɔ. Ne ye fɛɛn ɲanaman minw bɛɛ dan, ne bena olu bɛɛ halaki k'u ban dugukolo kan.»

⁵Masaba ye min fɔ Nuhun ye, a y'o bɛɛ kɛ.

⁶Nuhun tun ye saan kɛmɛ wɔɔrɔ sɔrɔ sanni jiba ka na dugukolo kan.

⁷ Nuhun n'a muso, n'a dencɛw ani a biranmusow donna kurun kɔnɔ janko ka se ka kisi jiba ma.

⁸Seen naani fɛɛn minw ka ɲi ne fɛ, ni minw ma ɲi, ani kɔnɔw, ni fɛɛn minw be fofo dugukolo kan,

⁹u bɛɛ fila fila, cɛman ni musoman, donna Nuhun fɛ kurun kɔnɔ i n'a fɔ Ala tun y'a fɔ Nuhun ye cogo min na.

¹⁰Tile wolonwula tɛmɛnin kɔ, jiba nana dugukolo kan.

¹¹ Nuhun sii saan kɛmɛ wɔɔrɔnan kalo filanan tile tan ni wolonwulanan loon, dugukolo kɔnɔ jii bɔyɔrɔw bɛɛ daa yɛlɛla, sanfɛ jii ta fana daa yɛlɛla.

¹²Sanji nana dugukolo kan tile bi naani kɔnɔ.

¹³O loon kelen na, Nuhun n'a dencɛ Sɛmu ni Kamu ani Zafɛti, ani a muso, n'a biranmuso saba donna kurun kɔnɔ.

¹⁴U donna ni kongosogo sifa bɛɛ ye, ani fɛɛn minw be fofo dugukolo kan, olu sifa bɛɛ, ani kɔnɔw sifa bɛɛ, gaman be fɛɛn minw bɛɛ fɛ.

¹⁵Ninakili be fɛɛn o fɛɛn na, u bɛɛ fila fila donna kurun kɔnɔ Nuhun fɛ.

¹⁶Fɛɛn sifa bɛɛ cɛman n'u musoman donna i ko Ala tun y'a fɔ Nuhun ye cogo min na. O kɔ, Masaba ye kurun daa tugu.

¹⁷Jiba nin nana dugukolo kan tile bi naani kɔnɔ. Jii cayara ka kurun kɔrɔta sanfɛ. A tora jii sanfɛ.

¹⁸Jii boɲana dugukolo kan kosɔbɛ, kurun tora jii sanfɛ.

¹⁹Jii boɲana dugukolo kan kosɔbɛ fɔɔ ka diɲɛ kɔnɔ kulujanjanw bɛɛ tunu.

²⁰Jii ye kuluw tunu fɔɔ ka se mɛtɛrɛ wolonwula ni kɔ ma.

²¹Nimanfɛn minw bɛɛ tun be dugukolo kan, olu bɛɛ sara: kɔnɔw, begɛnw, kongosogow, ani nimanfɛn fɛɛn o fɛɛn be dugukolo kan, ani adamadenw bɛɛ.

²²Fɛɛn o fɛɛn be dugukolo janin kan n'u be ninakili, olu bɛɛ sara.

²³Nimanfɛn minw bɛɛ tun be dugukolo kan, Ala y'u bɛɛ halaki pewu: mɔgɔw, begɛnw, fɛɛn fofotaw, ani kɔnɔw bɛɛ halakira ka ban dugukolo kan. Nuhun ani minw tun be kurun kɔnɔ n'a ye, olu dama le kisira.

²⁴Jii caaman nin tora dugukolo kan tile kɛmɛ ni bi duuru kɔnɔ.