Read dyu Koow daminɛ kitabu 9 Bible Online

Koow daminɛ kitabu 9 - dyu bible

Koow daminɛ kitabu 9

¹ Ala ye hɛrɛ kɛ Nuhun n'a dencɛw ye, k'a fɔ u ye ko: «Aw ka deenw wolo ka caya ka dugukolo fa.

²Dugukolo kan seen naani fɛɛnw, ni kɔnɔw, ani fɛɛn o fɛɛn be fofo dugukolo kan, ani jigɛw, olu bɛɛ bena siran aw ɲa kosɔbɛ. U bɛɛ b'aw bolo.

³Nimanfɛn o fɛɛn be dugukolo kan, olu bena kɛ aw ka dumufɛn ye. Ne b'u bɛɛ di aw ma, i n'a fɔ ne tun ye biin di aw ma cogo min na.

⁴ Nga aw kana sogo dumu n'a joli b'a la, min sababu la a be nii na.

⁵Siga t'a la, ne bena ɲiningali kɛ aw joli koo la, min ye aw nii ye. Ne bena sogow bɛɛ fana ɲininga o koo la, ka mɔgɔ fana ɲininga a mɔgɔɲɔgɔn nii koo la.

⁶ «Ni min ye mɔgɔ faga, mɔgɔ le bena o tigi faga, bari ne, Ala ye mɔgɔ dan n yɛrɛ jaa la.

⁷ «Aw kɔni, aw ka deenw wolo caaman. Aw ka deenw wolo ka caya dugukolo kan.»

⁸Ala y'a fɔ Nuhun n'a dencɛw ye tugu ko:

⁹«Ne be ɛn n'aw ye ani aw kɔmɔgɔw.

¹⁰Nimanfɛn minw bɛɛ tun be n'aw ye: kɔnɔw, begɛnw, ani kongosogow, fɛɛn minw bɛɛ bɔra kurun kɔnɔ, u bɛɛ, nimanfɛn minw bɛɛ be dugukolo kan, ne be bɛn ni olu bɛɛ ye fana.

¹¹Ne bena bɛn n'aw ye k'a fɔ ko sanjiba tena nimanfɛnw bɛɛ halaki tugu fewu. Jii tena na ka dugukolo halaki tugu.

¹²Ne ye bɛɛn min kɛ n'aw ye, ni waati nataw mɔgɔw ye, ani nimanfɛnw bɛɛ ye, minw be n'aw ye, o taamasiɲɛ filɛ nin ye.

¹³Ne be n ka muru bila sankaba kan, o le bena kɛ taamasiɲɛ ye k'a yira ko bɛɛn be ne ni dugukolo cɛ.

¹⁴Ayiwa, ni ne y'a kɛ saan finna dugukolo sanfɛ, ni sanmuru bɔra sankaba la,

¹⁵ne hakili bena jigi an ka bɛɛn na, min be ne ni aw cɛ, ani nimanfɛn sifa bɛɛ cɛ. O saan tena kɛ jiba ye tugu ka na dugukolo kan ka nimanfɛnw bɛɛ halaki tugu abada.

¹⁶Sanmuru mana bɔ sankaba la, ne bena o ye ka n hakili jigi an ka bɛɛn na, min te cɛn fewu, min be ne, Ala ni dugukolo kan nimanfɛnw bɛɛ cɛ.»

¹⁷Ala y'a fɔ Nuhun ye ko: «Ne ye bɛɛn min kɛ ne ni dugukolo kan nimanfɛnw bɛɛ cɛ, o taamasiɲɛ lo.»

¹⁸Nuhun dencɛ minw bɔra kurun kɔnɔ, olu ye Sɛmu ni Kamu ani Zafɛti ye. Kamu tun ye Kanaan faa ye.

¹⁹Nuhun dencɛ saba nunu sababu la, mɔgɔw kɔsegira ka caya dugukolo kan.

²⁰Nuhun le kɔnna ka sɛnɛ kɛ. A ye *ɛrɛzɛnforo bɔ.

²¹Loon dɔ, a ye duvɛn min ka fa, ka taga la a ka fanibugu kɔnɔ a farilakolon.

²²Kanaan faa Kamu y'a facɛ ye, a fari lakolon lo. A bɔra ka ta'a fɔ a balima fila ye kɛnɛma.

²³Sɛmu ni Zafɛti ye fani dɔ ta k'a bila u gaman kan ka taga n'u kɔɔ ye ka ta'a biri u facɛ fari lakolon kan. U tun tagara n'u kɔɔ ye, u m'a fari lakolon ye.

²⁴Duvɛn bɔra Nuhun ɲaa na tuma min na, a deen laban ye min kɛ a la, a y'o mɛn.

²⁵A y'a fɔ ko: «Kanaan dangana! A bena kɛ a fadenw ka jɔɔnw ka jɔɔn ye!»

²⁶A y'a fɔ tugu ko: «Masaba, Sɛmu ka Ala ka tanu, Kanaan ka kɛ Sɛmu ka jɔɔn ye.

²⁷Ala ka Zafɛti kɔmɔgɔw jiidi. Sɛmu ka fanibuguw ka kɛ a ka sigiyɔrɔ ye, Kanaan ka kɛ Zafɛti ka jɔɔn ye.»

²⁸Jiba tɛmɛnin kɔ, Nuhun ye saan kɛmɛ saba ni bi duuru kɛ tugu.

²⁹Nuhun sii bɛɛ lajɛnnin tun ye saan kɛmɛ kɔnɔntɔn ni bi duuru ye, o kɔ, a sara.