Read dyu Samuyɛli ka kitabu filanan 10 Bible Online

Samuyɛli ka kitabu filanan 10 - dyu bible

Samuyɛli ka kitabu filanan 10

¹Waati dɔ nana se, amoniw ka masacɛ sara, a dencɛ Anun sigir'a nɔɔ na.

²Dawuda y'a fɔ ko ale bena koɲuman kɛ Naasi dencɛ Anun ye, i n'a fɔ a facɛ tun y'a kɛ ale ye cogo min na. O la, a ye cidenw ci k'u ka ta'a faa ka sangafoli kɛ. Dawuda ka cidenw sera u ka jamana na dɔrɔn,

³amoniw ka ɲamɔgɔw y'a fɔ u kuntigi Anun ye ko a kan'a miiri ko Dawuda ye mɔgɔ nunu bila janko u ka na a jigi tugu ka boɲa la a facɛ kan dɛ. Ko a y'u ci a fɛ janko u ka na dugu nin yaala k'a kɔlɔsi, o kɔ, u ben'a minɛ.

⁴O la, Anun ye Dawuda ka ciden nunu minɛ k'u bonbosi tilan kelen kelen li, ka tila k'u ka faniw tigɛ u jukunna yɔrɔ la, ka sɔrɔ ka sira d'u ma.

⁵Dawuda y'o mɛn tuma min na, a ye mɔgɔw bila ka taga u kunbɛn, bari u tun maloyanin be kosɔbɛ. Masacɛ y'a fɔ ko u k'a fɔ u ye ko u ka to Zeriko yanni u bonbosi be falen, k'o kɔ, u be sɔrɔ ka na.

⁶Amoniw y'a ye ko Dawuda tun te se k'u ka koo nin muɲu tugu minkɛ, u wilila ka taga mɔgɔw ta kɛlɛdenya la. U tagara mɔgɔ waa mugan (20 000) ta Sirikaw fɛ Bɛtirewɔbu mara la ani Soba mara la fana, ka mɔgɔ waa kelen (1 000) ta Maaka mara masacɛ fɛ, ani ka mɔgɔ waa tan ni fila (12 000) ta Tɔbukaw fɛ.

⁷Dawuda y'o mɛn dɔrɔn, a ye Zowabu ci u kama ni kɛlɛdenŋanaw bɛɛ.

⁸Amoniw bɔra ka lɔ u ka dugu donda la kɛlɛ kama. Sirika minw bɔra Soba mara la, ni Erewɔbu mara taw, ani minw bɔra Tɔbu ni Maaka mara la, olu tora kongo kɔnɔ danna.

⁹Zowabu y'a ye ko a juguw bena to k'a kɛlɛ a ɲafɛ n'a kɔfɛ minkɛ, a ye kɛlɛden dɔw woloma ka bɔ Isirayɛlidenw ka kɛlɛdenŋanaw cɛma ka olu ɲaa sin Sirikaw ma,

¹⁰ka kɛlɛden tɔw di a dɔgɔcɛ Abisayi ma, janko olu k'u ɲaa sin amoniw ma.

¹¹A y'a fɔ a ye ko: «N'a kɛra ko Sirikaw barika boɲana ne ma, i ka na n dɛmɛ. N'a fana sɔrɔla ko amoniw le ta boɲana i fana ta ye, ne bena na i dɛmɛ.

¹²Jija, an k'an ka jagwɛlɛya yira an ka siya kosɔn, ani an ka Ala ka duguw kosɔn. Fɛɛn min ka di Masaba ye, a bena o le kɛ.»

¹³Zowabu n'a ka mɔgɔw wilila ka taga k'u be Sirikaw kɛlɛ, u bolila Zowabu ɲa.

¹⁴Amoniw y'a ye ko Sirikaw be bolila minkɛ, olu fana bolila Abisayi ɲa ka taga don dugu kɔnɔ. O la, Zowabu bɔra kɛlɛyɔrɔ nin na ka kɔsegi ka na Zeruzalɛmu.

¹⁵Sirikaw y'a ye ko Isirayɛlidenw sera u kɔrɔ. O la, u bɛɛ ye ɲɔgɔn lajɛn.

¹⁶Adadezɛri ye mɔgɔw bila ka taga Sirikaw wele Efarati baji kɔrɔn fɛ. U wilila ka na se fɔɔ Elamu. Adadezɛri ka kɛlɛdenw kuntigi Sobaki le tun be u ɲa.

¹⁷U nana o kibaruya fɔ Dawuda ye. A ye Isirayɛlidenw bɛɛ lajɛn ka taga Zurudɛn baji tigɛ, ka taga fɔɔ Elamu. Sirikaw y'u yɛrɛ labɛn Dawuda kɛlɛ kama, u ye kɛlɛ daminɛ.

¹⁸Nga Sirikaw bolila Isirayɛlidenw ɲa. Dawuda y'u ka wotorotigi kɛmɛ wolonwula faga, ni sotigi waa bi naani (40 000). A y'u ka kɛlɛdenw kuntigi Sobaki faga fana o yɔrɔ la.

¹⁹Adadezɛri tun be masacɛ minw bɛɛ mara, olu y'a ye ko Isirayɛlidenw sera olu kɔrɔ minkɛ, u bɛnna ni Isirayɛlidenw ye, ani k'u yɛrɛ majigi ka baara kɛ u ye. O kɔ, Sirikaw ma sɔn k'a fɔ k'olu be amoniw dɛmɛ tugu.