Read dyu Samuyɛli ka kitabu filanan 12 Bible Online

Samuyɛli ka kitabu filanan 12 - dyu bible

Samuyɛli ka kitabu filanan 12

¹ Masaba ye Natan ci Dawuda fɛ. Natan tagar'a fɛ k'a fɔ a ye ko: «Mɔgɔ fila tun be dugu dɔ la, kelen ye nafolotigi ye, kelen ye fantan ye.

²Saga ni misi caaman tun be nafolotigi nin fɛ.

³Foyi tun te fantan nin fɛ fɔɔ sagaden kelen, a tun ye min san, n'a b'a balola. A tun be boɲan'a fɛ n'a deenw ye. A tun be to k'a ka dumuni dɔ le di sagaden nin ma, n'a yɛrɛ ka minji dɔ, a ka filen kɔnɔ. Sagaden nin tun be to ka la n'a ye. Cɛɛ nin tun y'a kɛ i n'a fɔ a denmuso.

⁴Loon dɔ, lonancɛ dɔ nana jigi nafolotigi fɛ. Nafolotigi tun b'a fɛ ka dumuni tobi a ka lonancɛ ye, nga a tun t'a fɛ ka dɔ bɔ a ka sagaw n'a ka misiw la minkɛ, a ye fantan nin ka sagaden nin minɛ a fɛ k'a tobi a ka lonancɛ ye.»

⁵Dawuda dimina kosɔbɛ o cɛɛ kɔrɔ k'a fɔ Natan ye ko: «Masaba kosɔn, cɛɛ min y'o kɛ, ale ka kan ka faga!

⁶A ka kan ka sagaden naani di, a ka kɛwali nin kosɔn, ani a ka makaritanya kosɔn.»

⁷O la, Natan y'a fɔ a ye ko: «O cɛɛ nin ye ele yɛrɛ yɛrɛ le ye! Masaba, Isirayɛli ka Ala y'a fɔ ko: ‹Ne y'i woloma ka kɛ masacɛ ye Isirayɛlidenw kunna, ne y'i bɔsi Sayuli bolo.

⁸Ne y'i kuntigi ka soo d'i ma, k'a ka musow d'i ma fana, ka Zuda kɔmɔgɔw ka soo ni Isirayɛliden tɔw, d'i ma. N'a kɛra k'olu tun ka dɔgɔ i fɛ, ne tun be se ka dɔ fara o kan.

⁹Mun na i ma ne Masaba ka kuma bato, i ye kojugu kɛ n ɲakɔrɔ? I ye iticɛ Uri faga k'a ka muso ta k'a furu. E y'a di amoniw ma u y'a faga ni murujan ye.

¹⁰Sisan, murujan bena to ka halakili kɛ i ka soo kɔnɔ tuma bɛɛ, bari i ye ne mafiɲɛya, ani ka iticɛ Uri ka muso ta k'a furu.›

¹¹ Masaba y'a fɔ ko ale ben'a to i be sigɛn sɔrɔ ka bɔ i yɛrɛ ka somɔgɔw fɛ. Ko ale bena i ka musow ta k'u di mɔgɔ wɛrɛ ma i yɛrɛ ɲana, ale be la n'u ye, dogo te sɔrɔ a la.

¹²Ko ele y'i ta kɛ dogo la, ko ale ben'a to o be kɛ Isirayɛlidenw bɛɛ ɲana tilefɛ.»

¹³Dawuda y'a fɔ Natan ye ko ale ye Masaba hakɛ ta. Natan y'a fɔ a ye ko Masaba yafar'a ma, ko a tena sa tugu.

¹⁴Nga ko a y'a kɛ Masaba juguw y'a tɔgɔ cɛnyɔrɔ sɔrɔ koo nin kama minkɛ, k'o la, i deen nin bena sa.

¹⁵Natan tɛmɛna ka ta'a ka soo. Uri ka muso ye deen min wolo Dawuda ye, Masaba y'a kɛ ale banana kosɔbɛ.

¹⁶Dawuda ye Ala daali deen nin ye. A ye suun don. N'a donna soo kɔnɔ sufɛ, a be la duguma.

¹⁷A ka soo kɔnɔ cɛkɔrɔbaw y'a daali kosɔbɛ ko a ka wili ka bɔ duguma, nga a ma sɔn, a fana ma sɔn ka dumuni kɛ n'u ye.

¹⁸Tile wolonwulanan loon, deen nin sara. Dawuda ka dakɔrɔsigiw tun be siran k'a fɔ a ye. Bari u tun b'a fɔra ko deen nin tun ma sa fɔlɔ, k'olu kuman'a fɛ ka dɛsɛ, a ma olu lamɛn. Sisan k'olu be se k'a fɔ a ye cogo di ko deen nin sara. Ko a be se ka kojugu kɛ a yɛrɛ la.

¹⁹Dawuda y'a ye ko u be ŋunuŋununa ɲɔgɔn fɛ, a y'a faamu ko deen nin sara. A y'u ɲininga ko: «Deen nin sara wa?» Olu y'a jaabi ko a sara.

²⁰Dawuda wilila duguma ka ko, ka tulu kasadiman kɛ a yɛrɛ la, ka fani wɛrɛw don, ka bɔ ka taga Masaba ka soo kɔnɔ k'a bato. A bɔra o yɔrɔ la ka na a ka soo tuma min na, a y'a ɲini u fɛ k'u ka na ni dumuni ye. A ye dumuni kɛ.

²¹O la, a ka dakɔrɔsigiw y'a fɔ a ye ko: «O kɔrɔ ye mun ye? Deen tun be nii na tuma min na, i tora ka suun don ani ka kasi. Sisan a sara, i wilila ka dumuni kɛ!»

²²A y'u jaabi ko: «Deen nin tun be nii na tuma min na, ne tun be to ka suun don ani ka kasi, bari ne tun b'a miiri ko n'a sɔrɔ Masaba bena makari ne la ka deen nin to a kana sa.

²³Sisan, a do sara ka ban, mun na ne bena suun don tugu? Ne be se k'a kɛ a be segi ka kunun wa? Ne le bena ta'a fɛ, a tena na ne fɛ tugu.»

²⁴Dawuda tagar'a ka muso Batiseba ladi k'a jigi tugu. O kɔ, a lara n'a ye. Muso nin ye dencɛ sɔrɔ. A y'o tɔgɔ la ko Solomani. O deen nin koo diyara Masaba ye.

²⁵A ye kira Natan ci k'o yira Dawuda la. A y'a tɔgɔ la ko Yedidiya, o kɔrɔ ko a koo ka di Masaba ye.

²⁶Zowabu tun be amoniw ka masadugu Araba kɛlɛla, a ye see sɔrɔ a kan.

²⁷O la, a ye mɔgɔw bila ka ta'a fɔ Dawuda ye ko ale ye Araba kɛlɛ, ko a sera ka ban kɔdalacin kɔrɔ.

²⁸Ko a ka wili sisan ka kɛlɛden tɔw lajɛn ka na dugu nin datugu k'a minɛ, janko ale kana se a kɔrɔ a yɛrɛ ma, k'o tɔgɔ sɔrɔ.

²⁹Dawuda ye jama bɛɛ lajɛn ka taga Araba kama, k'a kɛlɛ, ka se a kɔrɔ.

³⁰A ye dugu nin masacɛ ka fugulan bɔ a kuun na. Fugulan nin birila Dawuda kuun na. A gwiliya tun sera sanu kilo bi saba ni kɔ, ani kabakuru sɔngɔgwɛlɛnw tun nɔrɔnin b'a gɛrɛn na. Dawuda ye dugumɔgɔ nunu bolofɛnw ta caaman ka taga n'u ye.

³¹A ye dugumɔgɔ nunu minɛ ka taga u bila yiritigɛbaara la ni kakanan ye, ani kabakurulɛsɛ la, ni jendebaara la, ani birikigosi la. A ye amoniw ka duguw bɛɛ kɔnɔ mɔgɔw kɛ ten. O kɔ, Dawuda n'a ka mɔgɔw bɛɛ kɔsegira ka taga Zeruzalɛmu.