Read dyu Samuyɛli ka kitabu filanan 14 Bible Online

Samuyɛli ka kitabu filanan 14 - dyu bible

Samuyɛli ka kitabu filanan 14

¹Seruya dencɛ Zowabu y'a ye ko Abisalɔn ka koo be masacɛ Dawuda kɔnɔ.

²O la, a ye mɔgɔ ci ka taga muso dɔ wele Tekowa. Hakili tun be o muso nin fɛ kosɔbɛ. A y'a fɔ muso nin ye ko: «I yɛrɛ kɛ dusukasibaga ye ka dusukasifaniw don. Kana tulu mɔ i yɛrɛ la, i yɛrɛ kɛ i n'a fɔ muso min be sanga na n'a be kasira kabini tumajan.

³Taga masacɛ fɛ ten ka kuma nin fɔ a ye.» Zowabu y'o kuma nin don muso nin daa la.

⁴Tekowa muso nin tagara kuma masacɛ fɛ. A tagar'a kunbiri gwan duguma k'a ɲaa biri, k'a fɔ masacɛ ye ko: «Masacɛ, ɲa n ma!»

⁵Masacɛ y'a ɲininga ko: «Mun le kɛra?» A ko: «Ne ye firiyamuso ye, ne cɛɛ sara.

⁶Dencɛ fila tun be n fɛ. O deen fila nunu ye ɲɔgɔn sɔrɔ kɛlɛ la kongo kɔnɔ. Mɔgɔ tun te yen k'u bɔ ɲɔgɔn na minkɛ, kelen y'a tɔɲɔgɔn bugɔ k'a faga.

⁷Sisan, fadenyabolo bɛɛ wilila e ka baaraden kama, k'a fɔ ko n deen min y'a baden nin faga, ko n k'ale di, u b'a faga a baden nin fagali kosɔn, k'o la, u bena cɛntala faga k'a bɔ yen. N'a kɛra ten, u bena ne jigi tigɛ, ani ka kɛ sababu ye ne cɛɛ kɔmɔgɔw be ban, a tɔgɔ be tunu diɲɛ na.»

⁸Masacɛ y'a fɔ muso nin ye ko a ka ta'a ka soo. Ko ale bena kangari la a ka koo la.

⁹Tekowa muso nin y'a fɔ a ye ko: «Masacɛ, ne matigi, cɛnni nin ye ne ni n ka somɔgɔw ta ye, masacɛ n'a somɔgɔw niin te o la sa.»

¹⁰Masacɛ y'a fɔ a ye ko: «Ni mɔgɔ dɔ ye kumajugu fɔ i ye, i ka na n'o tigi ye yan. O tigi tena se i ma tugu.»

¹¹Muso nin y'a fɔ tugu ko: «Masacɛ, kali Masaba i ka Ala tɔgɔ la, janko jurusarabaga kana ne deen faga ka dɔ fara cɛnni kan.» Masacɛ y'a fɔ ko: «Masaba kosɔn, foyi tena se i deen ma.»

¹²O kɔ, muso nin y'a fɔ ko: «Masacɛ, ne matigi, a to i ka baaraden be kuma kelen fɔ i ye.» Masacɛ y'a fɔ ko a k'a fɔ.

¹³Muso nin y'a fɔ ko: «Mun na e ye nin baara nin ɲɔgɔn kɛ Ala ka jama na ten? E masacɛ ye min fɔ sisan, e b'i yɛrɛ jalakira le, bari i tun ye mɔgɔ min gwɛn, i ma o tigi kɔsegi.

¹⁴An bɛɛ bena sa loon dɔ, ka kɛ i n'a fɔ jii min bɔnna duguma, n'a te se ka cɛ tugu. Nga Ala t'a fɛ o ɲɔgɔn ka kɛ tigi min gwɛnna na. A b'a fɛ a be kɔsegi le a ɲakɔrɔ.

¹⁵Ni masacɛ, n matigi y'a ye ne nana kuma nin fɔ e ye, mɔgɔw le ye siranya bila ne la. E ka baaraden ko a bena kuma ele masacɛ fɛ, n'a sɔrɔ masacɛ ben'a ka baaraden ka fɔta kɛ.

¹⁶A bena sɔn k'a ka baaraden bɔsi mɔgɔ bolo, min b'a fɛ ka ne ni n deen halaki, k'an niin bɔ Ala ka mɔgɔw la.

¹⁷ Sisan, i ka baaraden b'a fɔ ko masacɛ, a matigi ka kuma ka kɛ hɛrɛ ye a ma. Bari masacɛ, a matigi be i n'a fɔ Ala ka mɛlɛkɛ, a be kojugu ni koɲuman lɔn ka bɔ ɲɔgɔn na. Masaba i ka Ala ka to i fɛ.»

¹⁸Masacɛ y'a fɔ muso nin ye ko: «Ne bena koo min ɲininga i fɛ, kana foyi dogo ne la.» Muso nin y'a fɔ ko masacɛ ka kuma.

¹⁹Masacɛ y'a fɔ ko: «I be fɛɛn min bɛɛ fɔra, o te Zowabu nɔɔ ye fewu?» Muso nin y'a jaabi ko: «K'i to sii la masacɛ, ne matigi, i ye fɛɛn min fɔ, o lo tigitigi. I ka baaraden Zowabu le y'o kuma bɛɛ don n daa la.

²⁰A tun b'a fɛ koo nin ka yɛlɛma. O la, a y'a kɛ ten. Nga ne matigi be koo lɔn i n'a fɔ Ala ka mɛlɛkɛ, koo minw bɛɛ be kɛ dugukolo kan, a b'o lɔn.»

²¹O la, masacɛ y'a fɔ Zowabu ye ko a ye min fɔ, ko ale sɔnna, ko a ka taga kanbelen Abisalɔn minɛ ka na n'a ye.

²²Zowabu y'a kunbiri gwan k'a ɲaa biri duguma, ka duba kɛ masacɛ ye. O kɔ, a y'a fɔ ko bii a ka baaraden y'a lɔn ko a koo ka di masacɛ, a matigi ye, ko bari masacɛ sɔnna k'a ka baaraden ka fɔta kɛ.

²³O kɔ, Zowabu tagara Gɛsuri, ka Abisalɔn minɛ ka na n'a ye Zeruzalɛmu.

²⁴Nga masacɛ y'a fɔ ko Abisalɔn ka taga to a yɛrɛ ka soo kɔnɔ, ko a kan'a to ale masacɛ ɲaa k'a ye fewu. A tagara to a ka soo kɔnɔ, a ɲaa ma la masacɛ kan.

²⁵Isirayɛlidenw bɛɛ cɛma, Abisalɔn ɲɔgɔn tun te yen cɛɲa na, ani kodiya la. K'a ta a seen na, fɔɔ ka ta'a bila a kuun na, fiɲɛ tun t'a la.

²⁶A tun be to k'a kuun li saan o saan, bari a kunsigi tun be gwiliya. A kunsigi nin gwiliya tun be se kilo fila ni kɔ ma.

²⁷Abisalɔn ye dencɛ saba sɔrɔ ani denmuso min tɔgɔ ko Tamari. Ale tun cɛɛ ka ɲi haali.

²⁸Abisalɔn tora Zeruzalɛmu saan fila, a ɲaa ma la masacɛ kan.

²⁹A ye mɔgɔ ci Zowabu fɛ ko a ka na bari a tun b'a fɛ k'a ci masacɛ fɛ, nga Zowabu ma sɔn ka na. A ye mɔgɔ ci a siɲɛ filanan na, Zowabu ma sɔn ka na.

³⁰O la, Abisalɔn y'a fɔ a ka baaradenw ye ko: «N ko Zowabu ka foro be ne ta gɛrɛfɛ kɛ, suman fana b'a kɔnɔ? Aw ye taga tasuma don a la.» A ka baaraden nunu tagara tasuma don foro nin na.

³¹Zowabu wilila ka taga Abisalɔn fɛ, k'a fɔ a ye ko: «Mun na e ka baaradenw ye tasuma don n ka foro la?»

³²Abisalɔn y'a fɔ Zowabu ye ko: «Ne tun y'i wele ko i ka na, ne tun b'a fɛ k'i ci masacɛ fɛ k'a fɔ a ye ko: ‹Mun na ne bɔra Gɛsuri ka na yan? A tun ka fisa ne ma ne ka to yen!› Ne b'a fɛ ka masacɛ ye sisan, n'a y'a sɔrɔ ne ye kojugu kɛ, a ka ne faga.»

³³Zowabu tagara o fɔ masacɛ ye. O kɔ, masacɛ ye Abisalɔn wele. A nana masacɛ fɛ k'a kunbiri gwan, k'a ɲaa biri duguma a ɲakɔrɔ. Masacɛ ye Abisalɔn minɛ k'a bolo meleke a la.