Read dyu Samuyɛli ka kitabu filanan 15 Bible Online

Samuyɛli ka kitabu filanan 15 - dyu bible

Samuyɛli ka kitabu filanan 15

¹O kɔ, Abisalɔn nana kɛlɛkɛwotoro ni soow, ani mɔgɔ bi duuru sɔrɔ, minw tun be to ka bila a ɲa ka to ka boli.

²A tun be to ka wili sɔgɔmada joona ka taga lɔ sirada la, dugu donda la. Ni mɔgɔ min ye kitiko sɔrɔ n'o tigi be nana masacɛ le fɛ janko k'o koo ɲanabɔ, a tun be to k'o tigi nin wele k'a ɲininga ko ale bɔra dugu jumɛn na. N'o tigi y'a fɔ ko ale bɔra nin mara kɔnɔ Isirayɛlidenw ka maraw cɛma,

³a b'a fɔ a ye ko koo nin ma cɛn a fɛ, ko nga mɔgɔ te yen masacɛ fɛ k'a lamɛn.

⁴A tun be to k'a fɔ ko ni ale tun ye jamana nin ka koow ɲanabɔbaga ye, ko ni mɔgɔ dɔ ye kitiko sɔrɔ, k'o ka na ale fɛ, ko ale tun b'o ɲanabɔ ka ɲa.

⁵Ni mɔgɔ min tun ko a be gwɛrɛ k'a kunbiri gwan a ɲakɔrɔ, a tun b'o tigi bolo minɛ k'a fo kosɔbɛ.

⁶Isirayɛliden minw bɛɛ tun be taga masacɛ fɛ janko ka se k'u ka koow ɲanabɔ, Abisalɔn tun be to k'o ɲɔgɔn le kɛ olu ye. A kɛra ten, a ye Isirayɛlidenw sɔrɔ.

⁷Saan naani tɛmɛnin kɔ, Abisalɔn y'a fɔ masacɛ ye ko: «Sira di ne ma, janko ne be taga Eburɔn, ne tun ye dajuru ta Masaba ye koo min na, n k'o kɛ.

⁸Bari k'i ka baaraden to Gɛsuri, Siri mara la, ne tun ye dajuru ta ko ni Masaba y'a kɛ n sera ka kɔsegi Zeruzalɛmu, ko ne ben'a bato.»

⁹Masacɛ y'a fɔ a ye ko a ka taga hɛrɛ la. Abisalɔn wilila ka taga Eburɔn.

¹⁰Abisalɔn ye mɔgɔw bila ka taga Isirayɛlideen tan ni fila nunu ka maraw bɛɛ la dogo la k'a fɔ u ye ko n'u ye buru fiyɛkan mɛn tuma min na, ko u k'a fɔ ko Abisalɔn kɛra masa ye Eburɔn.

¹¹A tun ye mɔgɔ kɛmɛ fila wele ka bɔ Zeruzalɛmu ka tugu a kɔ ka na. Olu kɔni tun nana dɔrɔn, u tun te foyi kala ma koo nin na.

¹²Ka Abisalɔn to n'a be sarakaw bɔra, a ye mɔgɔ bila ka taga Giloka Ayitofɛli wele Gilo. Dawuda ladibaga tun lo. Jama tora ka boɲa ka taga Abisalɔn kɔ. Janfa ye barika sɔrɔ.

¹³Mɔgɔ dɔ nan'a fɔ Dawuda ye ko Isirayɛlidenw ka miiriya yɛlɛmana ka taga Abisalɔn fɛ.

¹⁴Dawuda ka dakɔrɔsigi minw bɛɛ tun be n'a ye Zeruzalɛmu, a y'a fɔ olu ye ko: «An ka wili ka boli! Bari kisiyɔrɔ t'an fɛ Abisalɔn bolo. An ka wili joona joona ka bɔ, bari a tena mɛn ka se yan, a bena tɔɔrɔ lase an ma ka dugu nin halaki ni murujan ye.»

¹⁵Masacɛ ka dakɔrɔsigiw y'a fɔ a ye k'olu ben'a ka fɔta kɛ.

¹⁶Masacɛ wilila ka bɔ seen na. A ka mɔgɔw bɛɛ tugur'a kɔ. A y'a ka gɛrɛfɛmuso tan to soo kɔnɔ olu ka to ka soo kɔlɔsi.

¹⁷Masacɛ bɔra seen na, jama bɛɛ tugur'a kɔ. U tagara lɔ soow bɛɛ daan na.

¹⁸A ka baaradenw bɛɛ tɛmɛn'a ɲafɛ: n'a kɔlɔsibagaw bɛɛ, ani Gatikaw mɔgɔ kɛmɛ wɔɔrɔ minw tun be tugur'a kɔ, olu bɛɛ.

¹⁹Masacɛ y'a fɔ Gatika Itayi ye ko: «Mun na ele be wili fana ka tugu ne kɔ? Kɔsegi ka taga to ni masacɛ dɔ nin ye, bari i ye lonan ye, i bɔra jamana wɛrɛ la le.

²⁰I nana kunu dɔrɔn, bii ne ben'a kɛ i be munumunu wa? Ne yɛrɛ te n taayɔrɔ lɔn. Kɔsegi n'i balimaw ye. Ala ka to i fɛ k'i dɛmɛ.»

²¹Itayi y'a fɔ masacɛ ye ko: «Masaba kosɔn, ani ka masacɛ, ne matigi to sii la! Ele masacɛ, ne matigi mana taga yɔrɔ o yɔrɔ, saya lo wo, hɛrɛ lo wo, ne, e ka baaraden be tugu e kɔ.»

²²O la, Dawuda y'a fɔ a ye ko a ka tɛmɛ. Gatika Itayi n'a ka kɛlɛdenw bɛɛ tɛmɛna n'u ka somɔgɔw bɛɛ ye.

²³Mɔgɔ bɛɛ le tun be kasira ka to ka kule, kɛlɛdenw tɛmɛtuma na. Sira min be taga kongokolon kɔnɔ, masacɛ ni jama bɛɛ ye Sedirɔn kɔɔ tigɛ k'o ta.

²⁴Sadɔki fana tun be yen. Ala ka layidu taamasiɲɛ kɛsu tun tanin be Levi kɔmɔgɔw minw bɛɛ fɛ, olu fana tun be yen. U ye kɛsu nin bila. Abiyatari ye sarakaw bɔ fɔɔ jama bɛɛ bɔra dugu kɔnɔ ka ban tuma min na.

²⁵Masacɛ y'a fɔ Sadɔki ye ko: «Kɔsegi ni Ala ka layidu taamasiɲɛ kɛsu ye dugu kɔnɔ. Ni Masaba b'a fɛ ka ɲa ne ma, a bena ne kɔsegi ani k'a to ne be kɛsu nin ye tugu, ani ale ka sigiyɔrɔ.

²⁶Nga n'a fana ko a mako te ne la, fɛɛn min ka d'a ye, a k'o kɛ ne la.»

²⁷Masacɛ y'a fɔ tugu sarakalasebaga Sadɔki ye ko: «A filɛ kɛ. Kɔsegi dugu kɔnɔ n'i deen Ayimasi ye hɛrɛ la, ani Abiyatari dencɛ Zonatan.

²⁸Ne bena to kongokolon kɔnɔ kɔɔ tigɛyɔrɔw la fɔɔ ne be kibaruya sɔrɔ aw fɛ.»

²⁹O la, Sadɔki ni Abiyatari ye Ala ka layidu taamasiɲɛ kɛsu ta ka kɔsegi n'a ye Zeruzalɛmu ka to yen.

³⁰Dawuda tun be yɛlɛla Olivuyirikulu kan n'a be kasira. Fani tun birinin b'a kuun na, n'a be taama senlakolon. Mɔgɔ minw tun be n'a ye, olu bɛɛ tun ye faniw biri u kuunw na n'u be kasira ka to ka yɛlɛ kulu kan.

³¹U nan'a fɔ Dawuda ye ko Ayitofɛli niin be Abisalɔn ka janfa nin na. O la, Dawuda ye Masaba daali ko a k'a kɛ Ayitofɛli ka ladili kana tilen.

³²Dawuda sera kulu nin sanfɛ tuma min na, Alabatoyɔrɔ nin na, arikicɛ Usayi y'a kunbɛn. A ka fani farannin be, buguri b'a kuun na.

³³Dawuda y'a fɔ a ye ko: «N'i tugura ne kɔ, i bena kɛ doni ye ne fɛ.

³⁴Nga kɔsegi dugu kɔnɔ k'a fɔ Abisalɔn ye ko: ‹Masacɛ, ne bena baara kɛ i ye, ne tun y'i facɛ ka baaraden ye fɔlɔ, sisan ne bena baara kɛ i ye.› O la, i bena se ka Ayitofɛli ka ladiliw cɛn ne makoɲa kama.

³⁵Sarakalasebaga Sadɔki ni Abiyatari bena kɛ n'i ye. N'i ye fɛɛn min mɛn masacɛ ka soo kɔnɔ, i b'o fɔ olu ye.

³⁶U deen fila be n'u ye yen, Sadɔki dencɛ Ayimasi ni Abiyatari dencɛ Zonatan. Aw ye fɛɛn o fɛɛn mɛn, aw bena olu ci ka na ne fɛ n'o ye.»

³⁷Dawuda tericɛ Usayi kɔsegira ka don dugu kɔnɔ tuma min na, o waati yɛrɛ lo Abisalɔn fana sera Zeruzalɛmu.