Read dyu Samuyɛli ka kitabu filanan 17 Bible Online

Samuyɛli ka kitabu filanan 17 - dyu bible

Samuyɛli ka kitabu filanan 17

¹Ayitofɛli y'a fɔ Abisalɔn ye ko: «A to n be mɔgɔ waa tan ni fila (12 000) woloma ka Dawuda kɔgwɛn bii suu nin na yɛrɛ.

²Ne bena taga bali a la, a sɛgɛnninba, a barika bannin. Ne bena siranya bila a la kosɔbɛ, o la, jama min be n'a ye, olu bɛɛ bena boli, ne be sɔrɔ ka masacɛ kelen faga.

³O kɔ, ne bena bila jama bɛɛ ɲa ka na n'u ye i fɛ. E b'a fɛ ka mɔgɔ min faga, n'ale sara, mɔgɔ bɛɛ be segi ka na. O la, jama bɛɛ bena to hɛrɛ la.»

⁴O kuma nin diyara Abisalɔn ni Isirayɛli cɛkɔrɔbaw bɛɛ ye.

⁵Abisalɔn ko u ka arikicɛ Usayi fana wele, k'u bena ale fana lamɛn.

⁶Usayi sera Abisalɔn fɛ tuma min na, a ye Ayitofɛli ka kuma fɔ a ye, ka tila k'a ɲininga k'u ka kan k'o kɛ wa, ko n'o tɛ, ko a ka dɔ fɔ.

⁷Usayi y'a fɔ ko: «Ayitofɛli ye ladili min di sisan, o ma ɲi.

⁸I yɛrɛ b'i facɛ n'a ka mɔgɔw lɔn. Cɛfariw lo. U ka fari i n'a fɔ waraba, u ye min deen minɛ. I facɛ be kɛlɛ ɲaa lɔn, a tena sɔn ka la sufɛ n'a ka jama ye.

⁹Nin waati yɛrɛ la, a dogonin be sɔrɔ kuluwo dɔ kɔnɔ, walima yɔrɔ dɔ la. N'a kɛra k'u sera k'a daminɛ ka mɔgɔ dɔw faga ka ban an cɛma, o bena mɛn joona joona k'a fɔ ko Abisalɔn ka mɔgɔ dɔw sara.

¹⁰Hali mɔgɔ min jaa ka gwɛlɛ i n'a fɔ jara ta, ale bena siran kosɔbɛ. Bari Isirayɛlidenw bɛɛ b'a kala ma ko i facɛ ye cɛfari ye, ko a ka mɔgɔw fana jaa ka gwɛlɛ.

¹¹O la, ne b'i ladi ko Isirayɛlidenw bɛɛ ka ɲɔgɔn lajɛn i gɛrɛfɛ, k'a ta Dan mara la kɔgɔdugu faan fɛ fɔɔ ka taga se Bɛriseba, worodugu faan fɛ. U ka caya i n'a fɔ kɔgɔjida la cɛncɛn. I yɛrɛ be wili ka taga kɛlɛ la.

¹²A be yɔrɔ o yɔrɔ, an ben'a sɔrɔ. An be ben a kan i n'a fɔ komiji be ben dugukolo kan cogo min na. U si tena kisi, ale yɛrɛ n'a kɔmɔgɔw bɛɛ.

¹³N'a tagara don dugu dɔ la, Isirayɛlidenw bɛɛ be juruw ta o dugu kama, an bena dugu nin sama fɔɔ ka taga se kɔda la, fɔɔ kabakuru si tena to.»

¹⁴Abisalɔn ni Isirayɛlidenw bɛɛ y'a fɔ ko arikicɛ Usayi ka ladili le ka ɲi ka tɛmɛ Ayitofɛli ta kan. K'a sɔrɔ Masaba le tun y'a latigɛ ka Ayitofɛli ka ladiliɲuman nin cɛn, janko ka se ka kojugu lase Abisalɔn ma.

¹⁵O kɔ, Usayi y'a fɔ sarakalasebagaw Sadɔki ni Abiyatari ye ko Ayitofɛli tun ye ladili nin le di Abisalɔn ni Isirayɛli cɛkɔrɔbaw ma, ko ale fana ye nin ni nin le fɔ.

¹⁶A ko sisan u ka mɔgɔ ci ka ta'a fɔ Dawuda ye joona joona ko a kana la sufɛ Zurudɛn baji tigɛyɔrɔ la kongo kɔnɔ, ko a k'a tigɛ wajibi, janko masacɛ n'a ka jama bɛɛ kana halaki.

¹⁷O y'a sɔrɔ Zonatan ni Ayimasi tun be Ɛnrogɛli. Baaraden musoman dɔ tun ka kan ka taga kibaruya d'u ma, olu ka sɔrɔ ka taga masacɛ Dawuda lasɔmi, bari u tun man kan ka don dugu kɔnɔ janko mɔgɔ kana u ye.

¹⁸Nga kanbelen dɔ y'u ye, ale tagara o fɔ Abisalɔn ye. Zonatan ni Ayimasi teliyara ka taga. U tagara se Bawurimu, cɛɛ dɔ ka soo. Kɔlɔn tun be ale ka luu kɔnɔ, u jigira o kɔnɔ.

¹⁹O cɛɛ nin ka muso ye birifani ta k'a la kɔlɔn nin datugunan kan k'a ka suman yɛrɛkɛ o kan, janko mɔgɔ kana miiri ko fɛɛn dɔ be o yɔrɔ la.

²⁰Abisalɔn ka cidenw donna soo kɔnɔ muso nin fɛ k'a ɲininga ko Ayimasi ni Zonatan be min. Muso nin y'a fɔ u ye k'u tɛmɛna ka kɔdennin tigɛ. Ciden nunu y'u ɲini yɔrɔ bɛɛ, u ma u ye, u segira ka taga Zeruzalɛmu.

²¹U taanin kɔ, Ayimasi ni Zonatan bɔra kɔlɔn nin kɔnɔ. U tagara masacɛ Dawuda lasɔmi. U y'a fɔ a ye ko: «Aw ka wili joona joona ka kɔɔ nin tigɛ.» Ayitofɛli tun ye min fɔ u kama, u y'o fɔ a ye.

²²O la, Dawuda n'a ka jama bɛɛ wilila ka Zurudɛn baji tigɛ. Yanni sɔgɔma be se, o y'a sɔrɔ mɔgɔ bɛɛ tigɛra ka ban, mɔgɔ si tun te sɔrɔ baa kɔfɛ tugu.

²³Ayitofɛli y'a ye k'u te ale ka ladili batora minkɛ, a wilila k'a ka fali labɛn ka yɛlɛ a kan ka ta'a yɛrɛ ka dugu la. A y'a dalakan fɔ a ka somɔgɔw ye, o kɔ, a tagar'a kaan dulon juru la, a sara. U y'a suu don a facɛ ka kaburu kɔnɔ.

²⁴Dawuda tagara se Maanayimu. O y'a sɔrɔ Abisalɔn tun be Zurudɛn baji tigɛra, ale ni Isirayɛlidenw bɛɛ.

²⁵Abisalɔn tun ye Amaza kɛ kɛlɛdenw kuntigi ye Zowabu nɔɔ na. Amaza tun ye Yitira deen ye, min tun ye Isirayɛliden dɔ ye fana. Ale lo tun ye Zowabu bamuso Seruya balimamuso Abigayɛli furu, Naasi denmuso tun lo.

²⁶Isirayɛlidenw ni Abisalɔn tagara sigi Galaadi mara la.

²⁷Dawuda sera Maanayimu tuma min na, Naasi dencɛ Sobi ka bɔ Araba, min tun ye amoniw ka duguba dɔ ye, ale ni Amiyɛli dencɛ Makiri ka bɔ Lodebari, ani Barizilayi ka bɔ Orogelimu, Galaadi mara la,

²⁸olu nana ni dilanw ye, ani tasaw ni bɔgɔdagaw, ani suman sifa fila ye, ani mugu ni suman yirannin, ani sɔsɔ sifa fila,

²⁹ni lii ani naare, ni sagaw ani misisogo, k'o di Dawuda n'a ka jama ma, janko u k'o dumu. Bari u tun b'a fɔra k'u tɔɔrɔla kɔngɔ ni minnɔgɔ bolo, k'u sigɛnna kongokolon kɔnɔ.