Read dyu Samuyɛli ka kitabu filanan 2 Bible Online

Samuyɛli ka kitabu filanan 2 - dyu bible

Samuyɛli ka kitabu filanan 2

¹O koo nunu tɛmɛnin kɔ, Dawuda ye Masaba ɲininga ko: «N ka taga Zuda mara dugu dɔ la wa?» Masaba y'a jaabi ko a ka taga. A y'a fɔ tugu ko ale ka taga dugu jumɛn na. Masaba y'a jaabi ko Eburɔn dugu kɔnɔ.

² Dawuda wilila ka taga n'a ka muso fila ye, Ayinowamu ka bɔ Zizireyɛli, ani Karimɛlika Nabali min sara, ale ka muso Abigayɛli.

³Dawuda ka mɔgɔ minw tun be n'a ye, a tagara ni olu ye. U tagara sigi Eburɔn n'a dafɛduguw la, u bɛɛ n'u ka somɔgɔw.

⁴ Zuda kɔmɔgɔw nana tulu bɔn Dawuda kunna o yɔrɔ la k'a kɛ u ka masacɛ ye. U nan'a fɔ Dawuda ye ko Yabɛsikaw ka bɔ Galaadi mara la le ye Sayuli suu ta k'a don.

⁵O la, a ye mɔgɔw ci ko u ka ta'a fɔ u ye ko: «Masaba ka barika don aw la, bari aw ye koɲuman kɛ aw kuntigi Sayuli ye, k'a suu ta k'a don.

⁶Sisan Masaba ka to aw fɛ k'aw dɛmɛ. Ne fana bena koɲuman kɛ aw ye, bari aw y'o baaraɲuman nin kɛ.

⁷Sisan, aw k'aw jaa gwɛlɛya ka kɛ cɛfariw ye, bari aw kuntigi Sayuli sara, Zuda kɔmɔgɔw ye ne le woloma ka kɛ u ka masacɛ ye.»

⁸O waati la, Nɛri dencɛ Abinɛri min tun ye Sayuli ka kɛlɛdenw kuntigi ye, ale ye Sayuli dencɛ Isibosɛti minɛ ka taga n'a ye Maanayimu,

⁹k'a kɛ masacɛ ye Galaadi mara kunna, ani Asɛri ni Zizireyɛli ani Efarayimu ni Bɛnzamɛn mara, ani Isirayɛliden tɔw bɛɛ kunna.

¹⁰Sayuli dencɛ Isibosɛti sii tun sera saan bi naani ma a ka sɔrɔ ka kɛ masa ye Isirayɛlidenw kunna. A ye saan fila kɛ u kunna. Zuda kɔmɔgɔw dama le tun tugura Dawuda kɔ.

¹¹Dawuda kɛra Zuda kɔmɔgɔw ka masacɛ ye k'a to Eburɔn saan wolonwula ni kalo wɔɔrɔ.

¹²Nɛri dencɛ Abinɛri ni Sayuli dencɛ Isibosɛti ka kɛlɛdenw wilila ka bɔ Maanayimu ka na Gabaŋɔn.

¹³Seruya [1] dencɛ Zowabu ni Dawuda ka kɛlɛdenw wilila ka taga. U ye ɲɔgɔn kunbɛn Gabaŋɔn dalan gɛrɛfɛ, u lɔra. Kelen be faan dɔ nin na, kelen be faan dɔ nin na fana.

¹⁴Abinɛri y'a fɔ Zowabu ye ko: «An k'a to kanbelen nunu ka wili ka ɲɔgɔn kɛlɛ fila fila an ɲana!» Zowabu y'a jaabi ko u ka wili kɛ.

¹⁵U wilila, u y'u jati. Sayuli dencɛ Isibosɛti ka mɔgɔw tun ye mɔgɔ tan ni fila ye ka bɔ Bɛnzamɛn kɔmɔgɔw la, Dawuda ta mɔgɔ tan ni fila.

¹⁶U kelen kelen bɛɛ y'a tɔɲɔgɔn minɛ a kuun na, ka ɲɔgɔn sɔgɔ ni murujan ye u gɛrɛnw na. U bɛɛ benna ka sa ɲɔgɔn fɛ. Yɔrɔ min be Gabaŋɔn gɛrɛfɛ, o la, u y'o tɔgɔ la ko Murujan dadiman yɔrɔ.

¹⁷O loon na, kɛlɛ juguyara kosɔbɛ. Dawuda ka mɔgɔw sera Abinɛri ni Isirayɛliden tɔw kɔrɔ.

¹⁸O kɛlɛ nin na, Seruya dencɛ saba tun be yen: Zowabu ni Abisayi ani Azayɛli. Azayɛli tun be se boli la kosɔbɛ i n'a fɔ minan.

¹⁹Ale tugura Abinɛri kɔ, a ma faran ka taga kinibolo fɛ, walima numanbolo fɛ.

²⁰Abinɛri ye filɛli kɛ a kɔfɛ k'a ɲininga ko: «Ele lo wa, Azayɛli?» A ko: «Ɔnhɔn, ne lo.»

²¹Abinɛri y'a fɔ a ye ko a ka yɛlɛma kinibolo fɛ, walima numanbolo fɛ, ka kanbelen nunu dɔ minɛ k'o bololafɛn ta. Nga Azayɛli ma sɔn ka faran ka bɔ a kɔ.

²²Abinɛri y'a fɔ a ye tugu ko a ka faran ka bɔ ale kɔ, ko n'o tɛ, ale ben'a faga. K'o kɔ, ale bena kɛ di k'a kɔrɔcɛ Zowabu filɛ.

²³Nga Azayɛli banna ka faran ka bɔ a kɔ. O la, Abinɛri y'a ka taman juu kɛ k'a susu a kɔnɔbara la. Taman y'a sɔgɔ fɔɔ ka bɔ a kɔfɛ. A bɔra ka ben ka sa yɔrɔnin kelen. Ni mɔgɔ o mɔgɔ tun bolila ka na se Azayɛli suu ma, u bɛɛ be lɔ.

²⁴Zowabu ni Abisayi ye Abinɛri gwɛn. Tilekun be donna tuma min na, u sera Gibeyama, min be Giya gɛrɛfɛ, Gabaŋɔn kongokolon sira kan.

²⁵Bɛnzamɛn kɔmɔgɔw ye ɲɔgɔn lajɛn Abinɛri gɛrɛfɛ ka kɛ jɛnkulu kelen ye, ka lɔ kulu dɔ kan.

²⁶Abinɛri y'a kaan kɔrɔta k'a fɔ Zowabu ye ko: «O tuma na, murujan ka halakili bena taga ɲa tuma bɛɛ wa? E m'a lɔn ko nimisa be o kɔfɛ wa? I ben'a fɔ jama ye tuma jumɛn ko u k'u badenw fagako dabila?»

²⁷Zowabu y'a fɔ ko: «Ala kosɔn, n'i tun ma foyi fɔ, jama tun bena tugu u balimaw kɔ fɔɔ sini sɔgɔma.»

²⁸O la, Zowabu ye buru fiyɛ, jama bɛɛ lɔra, u ma tugu Isirayɛliden tɔw kɔ tugu, u ma ɲɔgɔn kɛlɛ tugu.

²⁹Abinɛri n'a ka jama taamana Zurudɛn baji kɛnɛ na suu bɛɛ la, ka ta'a tigɛ, ka Bitirɔn mara bɛɛ cɛtigɛ ka taga se Maanayimu. [2]

³⁰Zowabu kɔsegira ka bɔ Abinɛri gwɛnyɔrɔ la, a ye jama bɛɛ lajɛn. Mɔgɔ tan ni kɔnɔntɔn le tun te yen, Dawuda ka kɛlɛdenw cɛma, ani Azayɛli.

³¹Nga Dawuda ka kɛlɛdenw tun ye mɔgɔ kɛmɛ saba ni bi wɔɔrɔ faga Bɛnzamɛn kɔmɔgɔw la, minw tun be ni Abinɛri ye.

³²U ye Azayɛli suu ta ka n'a don a facɛ ka kaburu kɔnɔ Bɛtilehɛmu. O kɔ, Zowabu n'a ka mɔgɔw taamana suu bɛɛ kɔnɔ. U sera Eburɔn dugugwɛdafɛ.