Read dyu Samuyɛli ka kitabu filanan 20 Bible Online

Samuyɛli ka kitabu filanan 20 - dyu bible

Samuyɛli ka kitabu filanan 20

¹ O y'a sɔrɔ mɔgɔkolon dɔ tun be yen, Bɛnzamɛn kɔmɔgɔ Bikiri dencɛ tun lo, a tɔgɔ ko Seba. Ale ye buru fiyɛ k'a fɔ ko niyɔrɔ te olu fɛ Dawuda fɛ, ko cɛɛn t'u fɛ Zese dencɛ nin fɛ. Ko Isirayɛlidenw bɛɛ ka taga u ka soo.

²O la, Isirayɛlidenw bɛɛ tɛmɛna ka taga ka Dawuda to yen, ka tugu Bikiri dencɛ Seba kɔ. Nga Zuda kɔmɔgɔw tora n'u ka masacɛ ye, u y'a bila sira ta Zurudɛn baji daa la fɔɔ ka taga se Zeruzalɛmu.

³ Dawuda ser'a ka soo Zeruzalɛmu. A tun y'a ka gɛrɛfɛmuso tan minw to yen k'u ka to ka soo kɔlɔsi, a ye olu minɛ k'u bila soo dɔ kɔnɔ, u tun be min kɔlɔsi ka ɲa, ka to k'u mako ɲa, nga a ma sɔn ka la n'u ye. A y'u datugunin to o yɔrɔ nin na fɔɔ u tagara sa musogwanaya la.

⁴O kɔ, masacɛ y'a fɔ Amaza ye ko yanni tile saba kɔnɔ, a ka Zuda ka mara kɛlɛdenw lajɛn ka na ɲɔgɔn sɔrɔ a ɲakɔrɔ, ko ale yɛrɛ ka kɔsegi ka na a fɛ.

⁵Amaza tagara k'u lajɛn, nga masacɛ tun ye waati min latigɛ a ye, o tɛmɛna.

⁶O la, Dawuda y'a fɔ Abisayi ye ko: «Bikiri dencɛ Seba bena min kɛ an na, sisan o bena juguya ni Abisalɔn ta ye. Wili ka ne kɔlɔsibagaw minɛ, ka tugu a kɔ janko a kana dugu barikaman dɔw sɔrɔ ka don u dɔ kɔnɔ ka tunu an na.»

⁷Abisayi tagara, Zowabu ka mɔgɔw tun tugunin be a kɔ, ani masacɛ kɔlɔsibagaw, ani cɛfariw bɛɛ. U bɔra Zeruzalɛmu janko ka taga Bikiri dencɛ Seba kɔ.

⁸U surunyana kabakuru belebele la, min be Gabaŋɔn dugu kɔnɔ tuma min na, u ye Amaza kunbɛn. Zowabu ka kɛlɛkɛfani tun b'a kaan na. Murujan b'a foroko la, n'a dulonnin be a ka cɛsirilan na a cɛɛ la fani sanfɛ. A tun be gwɛrɛla tuma min na, murujan nin benna duguma.

⁹A y'a fɔ Amaza ye ko: «I ka kɛnɛ wa, ne balimacɛ?» A y'a kinibolo kɛ ka Amaza bonbosi minɛ ko a b'a fo.

¹⁰Amaza ma murujan kɔlɔsi Zowabu bolo. Zowabu ye muru nin don a kɔnɔbara la k'a nugu bɔn duguma. A yɛrɛ m'a filanan, Amaza sara ten. Zowabu n'a baden Abisayi tɛmɛna ka tugu Bikiri dencɛ Seba kɔ.

¹¹Zowabu ka kɛlɛdenw dɔ tora Amaza suu gɛrɛfɛ. A y'a fɔ ko: «Mɔgɔ o mɔgɔ be Zowabu fɛ ani min be Dawuda kɔ, o tigi ka tugu Zowabu kɔ!»

¹²Amaza tun kolonkolonn'a joli kɔnɔ sira kan. O cɛɛ nin y'a ye ko mɔgɔ bɛɛ tun be lɔra minkɛ, a ye Amaza sama ka bɔ sira kan ka don n'a ye foro dɔ kɔnɔ, ka fani dɔ biri a kan.

¹³A y'o kɛ ka ban dɔrɔn, mɔgɔ bɛɛ tugura Zowabu kɔ, janko ka Bikiri dencɛ Seba kɔgwɛn.

¹⁴Zowabu tɛmɛna Isirayɛlidenw ka maraw bɛɛ la fɔɔ ka taga se Abɛlibɛtimaaka. Bikiri ka fadenyabolo bɛɛ ye ɲɔgɔn lajɛn ka tugu a kɔ.

¹⁵U tagara Abɛlibɛtimaaka dugu datugu k'u be Seba kɛlɛ. U ye yɔrɔ dɔ lɔ min wilila ka se dugu laminikogo fɔlɔ ma. Jama min bɛɛ tun be ni Zowabu ye, olu tun be kogo nin juu wɔgɔbira janko a ka ben.

¹⁶O la, muso hakilitigi dɔ wilila ka pɛrɛn dugu kɔnɔ ko: «Aw ye mɛnni kɛ! Aw ye mɛnni kɛ! Aw k'a fɔ Zowabu ye ko a ka gwɛrɛ, ne bena kuma a fɛ.»

¹⁷Zowabu gwɛrɛla muso nin na, a y'a fɔ ko: «Ele le ye Zowabu ye wa?» Zowabu ko ɔnhɔn. A ko a ka mɛnni kɛ a ka baaraden fɛ. Zowabu y'a fɔ ko ale b'a lamɛnna.

¹⁸Muso nin ko: «Fɔlɔfɔlɔ la, u tun be to k'a fɔ ko: ‹Taga ɲiningali kɛ Abɛli›, koo nin be ban.

¹⁹Nin ye hɛrɛdugu le ye, a ka koo tilennin lo Isirayɛli mara la. E do b'a fɛ k'o le halaki, ka Isirayɛli mara duguba dɔ halaki. Mun na i b'a fɛ ka Masaba niyɔrɔ kɛ tomo ye?»

²⁰Zowabu y'a fɔ a ye ko: «K'a fɔ ko ne be dugu nin halaki k'a kɛ tomo ye, o miiriya ka jan ne la!

²¹N m'a lawili o kama. Mɔgɔ dɔ le wilila masacɛ Dawuda kama, a tɔgɔ ko Seba, Bikiri deen lo, a bɔra Efarayimu mara kuluyɔrɔ la. Aw k'ale don an bolo dɔrɔn, an be taga k'aw ka dugu nin to yen.» Muso nin y'a fɔ Zowabu ye ko: «An ben'a kungolo fili i ma kogo kɔfɛ.»

²²O kɔ, muso nin tagara jama bɛɛ ye n'a ka hakilitigiya ye. U ye Bikiri deen Seba kungolo tigɛ k'a fili Zowabu ma kogo kɔfɛ. Zowabu ye buru fiyɛ janko u ka dugu nin to yen. Bɛɛ jɛnsɛnna ka taga u ka soow. O kɔ, Zowabu kɔsegira masacɛ fɛ Zeruzalɛmu.

²³Zowabu le tun be Isirayɛlidenw ka kɛlɛdenw bɛɛ kunna. Yoyada dencɛ Benaya tun be masacɛ kɔlɔsibagaw kunna.

²⁴Adoramu tun be fasobaara kunna, Ayiludi dencɛ Yosafati tun be sɛbɛko kunna.

²⁵Sewa tun ye sɛbɛnnikɛla ye, Sadɔki ni Abiyatari tun ye sarakalasebagaw ye.

²⁶Ira fana tun be yen ka bɔ Yayiri. Dawuda ka sarakalasebaga tun lo.