Read dyu Samuyɛli ka kitabu filanan 22 Bible Online

Samuyɛli ka kitabu filanan 22 - dyu bible

Samuyɛli ka kitabu filanan 22

¹Masaba ye Dawuda bɔsi a juguw bɛɛ ni Sayuli bolo tuma min na, a tun ye dɔnkili nin le la a ye.

²A ko: «Masaba le ye ne tangakabakuru, ni ne dogoyɔrɔ, ani ne kunmabɔbaga ye.

³Ne ka Ala le ye ne tangakabakuru ye, ne be dogo a kɔrɔ. Ne tangabaga lo, Setigi min be ne kisi. Ne dogoyɔrɔ barikaman lo ne bolituma na. I be ne kisi mɔgɔfariw ma.

⁴Masaba ka tanu! Ne y'a ka dɛmɛ ɲini dɔrɔn, ne bɔsira n juguw bolo.

⁵Bari saya fanga tun ye ne dɛrɛ ka ban. Halakili siranya tun ye ne minɛ.

⁶Kaburu dibi tun ye ne lamini ka ban. Ne tun donna saya ka jɔɔ kɔnɔ ka ban.

⁷Ka ne to n ka dusukasi la, ne ye Masaba daali, ne ye n ka Ala daali. K'a to a ka soo kɔnɔ, a ye ne lamɛn, ne kulekan donn'a tulo la.

⁸Dugukolo yuguyugura ka yɛrɛyɛrɛ. Sankolo juu yuguyugura ka yɛrɛyɛrɛ Masaba ka dimi kosɔn.

⁹Sisi tun be bɔr'a nuun na, tasuma fariman ni takami tun be bɔr'a daa la.

¹⁰A ye sankolo dayɛlɛ ka jigi, sankababa tun b'a seen kɔrɔ.

¹¹A tun siginin be *serubɛn kan n'a be panna. A tun be fɔɲɔ kɔnɔ.

¹²A ye sankaba suma kɛ k'a yɛrɛ lamini. O tun kɛra sanfinba ye k'a datugu.

¹³Yeelen min tun b'a ɲafɛ, sanmanamana tun be bɔra o kɔnɔ.

¹⁴Masaba y'a kɛ san pɛrɛnna. Fɛɛn bɛɛ kuntigi y'a kaan bɔ.

¹⁵A ye biɲɛw bon ka ne juguw yɛrɛkɛ. A ye sanmanamana kɛ k'u jɛnsɛn.

¹⁶Masaba ka bagabagali n'a ka dimi kosɔn, kɔgɔji jara fɔɔ a dingɛ daan bɛɛ yera, diɲɛ juu sigiyɔrɔ bilara kɛnɛ kan.

¹⁷Ka Masaba to sankolo la, a ye ne minɛ. A ye n sama ka bɔ jiba kɔnɔ.

¹⁸A ye ne bɔsi n jugu barikamanw bolo, ne kɛlɛbaga minw barika tun ka bon ni ne ta ye.

¹⁹U tun ye ne kɛlɛ ne ka dusukasi loon na, nga Masaba ye ne dɛmɛ.

²⁰A ye ne bɔsi ka lafiya di ne ma. A ye ne bɔsi bari ne koo ka d'a ye.

²¹Masaba ye ne sara ka kɛɲɛ ni n ka tilenninya ye. A ye ne minɛ ka kɛɲɛ ni n ka jalakibaliya ye.

²²Ne ye Masaba ka fɔta bato, ne ma kojugu kɛ n ka Ala ɲakɔrɔ.

²³A ye min bɛɛ fɔ, ne y'o bato, Ne te ban a ka sariyaw ma.

²⁴Jalakiyɔrɔ si ma sɔrɔ ne la a ɲakɔrɔ. Ne ye n yɛrɛ kɔlɔsi kojugu la.

²⁵Masaba ye ne sara ka kɛɲɛ ni n ka tilenninya ye. A y'o kɛ ka kɛɲɛ ni ne ka jalakibaliya ye a ɲakɔrɔ.

²⁶Masaba, i be koɲuman kɛ mɔgɔɲuman ye. E tilennin lo mɔgɔtilennin faan fɛ.

²⁷Mɔgɔ min kɔnɔ gwɛra, e be gwɛ o tigi ye. E fana be mɔgɔjugu minɛcogo lɔn.

²⁸E be sigɛnbagatɔw kisi. Minw b'u yɛrɛ boɲa i ɲakɔrɔ, i b'olu majigi.

²⁹Masaba, e kɛra ne ka yeelen ye. I be yeelen bɔ ne ye dibi la.

³⁰Ne be girin kɛlɛbolo kan ele sababu la. Ne be se ka dugu laminikogo sago ele n ka Ala barika la.

³¹Fiɲɛ te Ala ka siraw la. Masaba ka fɔtaw ye tiɲɛ ye. Mɔgɔ minw b'u yɛrɛ dogo a fɛ, a be olu bɛɛ tanga i ko nigɛkunbɛnnan.

³²Bari Ala ye jɔn ye, ni Masaba tɛ? Jɔn le ye tangakabakuru ye ni an ka Ala tɛ?

³³Ala le kɛra ne tangayɔrɔ barikaman ye, ale lo be ne dɛmɛ ka kɛ mɔgɔsɔbɛ ye.

³⁴ A ye ne seen kɛ i ko minan ta. O la, ne be se ka lɔ tintinyɔrɔ la.

³⁵Ale lo be ne dege ni kɛlɛkɛcogo ye, a be ne dɛmɛ ka kala ziralaman sama.

³⁶Ele Ala le b'i ka sesɔrɔli nigɛkunbɛnnan di ne ma. Ne kɛra mɔgɔbaba ye i ka dɛmɛ kosɔn.

³⁷Ele le be ne tɛmɛyɔrɔ labɛn, o la, ne te talon.

³⁸Ne be n juguw gwɛn, fɔɔ k'u halaki. Ne b'u halaki pewu ka sɔrɔ ka kɔsegi.

³⁹Ne b'u halaki pewu, u te se ka wili tugu. U be ben ne seen kɔrɔ.

⁴⁰I be barika don ne la kɛlɛ kama. I be ne juguw majigi ne kɔrɔ.

⁴¹I b'a kɛ ne juguw b'u kɔɔ di ka boli ne ɲa, ne be n kɔniyabagaw halaki.

⁴²U be filɛli kɛ, nga dɛmɛbaga t'u la. U be Masaba daali, ale t'u jaabi.

⁴³Ne b'u kɛ i ko buguri. Ne b'u nɔɔni k'u dɔn i ko bɔgɔ, bɔlɔn kɔnɔ.

⁴⁴I ye ne bɔsi fadenyakɛlɛ bolo. Ne be siyaw kunna halibi e sababu la. Siyaw be kolo ne ye n te minw lɔn.

⁴⁵Lonanw yɛrɛyɛrɛtɔ be na ne ɲakɔrɔ, u be ne ka fɔtaw bato u fɔtɔ yɛrɛ.

⁴⁶U jigi tigɛra, u yɛrɛyɛrɛtɔ be bɔra u ka dogoyɔrɔ barikamanw na.

⁴⁷Masaba, e tɔgɔ ka tanu! Boɲa ka la ne tangakabakuru kan! Ne kisibaga barikaman Ala ka tanu!

⁴⁸Ala le be ne mɔnɛ bɔ, ale lo be siyaw kolo ne ye.

⁴⁹Ale lo be ne bɔsi ne juguw bolo. Ala, e b'a kɛ ne be se n juguw kɔrɔ, e be ne kisi mɔgɔfariw ma.

⁵⁰ Masaba, o le y'a to ne bena i tanu siya wɛrɛw cɛma. Ne bena dɔnkili la k'i tɔgɔ boɲa.

⁵¹Masaba le be see d'a ka masacɛ ma kosɔbɛ. A be koɲuman kɛ a ka mɔgɔ wolomanin Dawuda n'a kɔmɔgɔw ye tuma bɛɛ.»