Read dyu Samuyɛli ka kitabu filanan 23 Bible Online

Samuyɛli ka kitabu filanan 23 - dyu bible

Samuyɛli ka kitabu filanan 23

¹Dawuda ka kuma laban filɛ nin ye: «Zese dencɛ Dawuda ka kuma, mɔgɔ min kɛra mɔgɔbaba ye, ale ka kuma lo, Yakuba ka Ala ka mɔgɔ wolomanin, Isirayɛlidenw be min la dɔnkili la ni nisɔndiya ye.

²Masaba ka Nii b'a ta fɔ ne barika la, a ka kuma be ne daa la.

³Isirayɛli ka Ala kumana, Isirayɛli dogokabakuru y'a fɔ ne ye ko: ‹Mɔgɔ min b'a ka kuntigiya kɛ ni tilenninya ye, mɔgɔ min b'a ka kuntigiya kɛ ni Alaɲasiran ye,

⁴o tigi be i ko dugugwɛdafɛ kɛnɛ, sankaba te yen sɔgɔmada min na. Sanji bennin kɔ, tile be bɔ k'a kɛ biin be falen.›

⁵Ne ka soo te ten Ala ɲakɔrɔ wa? Bari, a ye layidu cɛnbali ta ne ye. A fɛɛn bɛɛ labɛnnin lo, n'a be boloɲuman kan. A bena ne kisi koo bɛɛ la, a bena n diyanako bɛɛ see di n ma.

⁶Nga mɔgɔjuguw bɛɛ be i ko ŋɔni, u be min fili. U t'u ta n'u bolo ye.

⁷Ni mɔgɔ min b'a fɛ ka maga u la, o tigi be nigɛ le ta, walima tamankala. U b'u jɛni o yɔrɔ kelen na.»

⁸Cɛfari minw tun be baara kɛ Dawuda ye, olu tɔgɔ filɛ nin ye: Isebaali, Takemonika tun lo. Ale lo tun ye cɛfariw kuntigi saba la mɔgɔ fɔlɔ ye. Min y'a ka taman kɛ ka mɔgɔ kɛmɛ seegi faga kɛlɛ kelen na.

⁹Ale kɔ, Dodo dencɛ Eleyazari tun be yen. A mamacɛ bɔra Awowa. Cɛfariw kuntigi mɔgɔ saba minw tun ye filisiw kunbɛn ni Dawuda ye tuma min na u tun lajɛnna kɛlɛ kama, Eleyazari tun ye olu dɔ ye. O y'a sɔrɔ Isirayɛlidenw tun be bolila.

¹⁰Ale lo lɔra kelen kan ka filisiw faga fɔɔ a tigɛ jara ka nɔrɔ a ka murujan na. Masaba ye see di u ma kosɔbɛ o loon na. Kɛlɛdenw kɔsegira ka na tugu Eleyazari kɔ k'u juguw bololafɛnw le ta dɔrɔn.

¹¹Ale fana kɔ, Age ka bɔ Arari ale dencɛ Sama tun be yen. Filisiw tun ye ɲɔgɔn lajɛn sɔsɔforo dɔ kɔnɔ tuma min na, Isirayɛlidenw ka kɛlɛdenw bolila u ɲa.

¹²Nga Sama tagara lɔ o foro nin cɛmancɛ la, k'a tanga cɛnni ma. A ye filisiw faga. A kɛra ten, Masaba ye see di u ma kosɔbɛ.

¹³Mɔgɔ saba bɔra cɛfari bi saba la ka taga Dawuda fɛ suman tigɛwaati la, Adulamu kuluwo kɔnɔ. O y'a sɔrɔ filisiw ka jɛnkulu dɔ tun siginin be erefaw ka kɔkɛnɛ na.

¹⁴Dawuda tun b'a ka dogoyɔrɔ la, filisiw ka kɛlɛden dɔw tun be Bɛtilehɛmu.

¹⁵Nin donn'a dusu la, a ko: «Kɔlɔn min be Bɛtilehɛmu dugu daa la, jɔn le bena taga jii bɔ ne ye o yɔrɔ la?»

¹⁶Cɛfari saba nunu tagara tɛmɛ filisiw ka kɛlɛdenw sigiyɔrɔ cɛma ka taga jii bɔ kɔlɔn nin kɔnɔ min be Bɛtilehɛmu dugu daa la, ka na n'a ye Dawuda fɛ, nga Dawuda ma sɔn k'a min. A y'a bɔn Masaba ye.

¹⁷A y'a fɔ ko: «Ne te se ka jii nin min, Masaba! Bari, a kɛra i n'a fɔ a bɔbaga nunu joli lo. Sabu, u y'u yɛrɛ nii di ka ta'a bɔ.» A ma sɔn k'a min. O cɛfari mɔgɔ saba ye fɛɛn min kɛ, o le y'o ye.

¹⁸Seruya dencɛ Zowabu baden Abisayi tun ye cɛfari bi saba nunu kuntigi ye. A y'a ka taman kɛ ka mɔgɔ kɛmɛ saba faga. O la, a tɔgɔ bɔra u cɛma kosɔbɛ.

¹⁹A ye boɲa sɔrɔ kosɔbɛ u cɛma. Ale kɛra u kuntigi ye, nga a tun te cɛfariw kuntigi mɔgɔ saba nunu dɔ ye.

²⁰Yoyada dencɛ Benayawu ka bɔ Kabuseyɛli, kɛlɛdenŋana tun lo. A ye kobabaw kɛ. Ale lo ye mowabuw ka kɛlɛkɛwara fila faga. A tun jigira dingɛ kɔnɔ fana ka jara faga. *Sanji siminin tun benna o loon na yɛrɛ.

²¹A fana ye Ezipitika dɔ faga, barika tun be min na kosɔbɛ. Ka taman to o Ezipitika bolo, a tagar'a kama ni bere ye ka ta'a ka taman minɛ a fɛ, ka tila k'a faga n'a ye.

²²Yoyada dencɛ Benayawu ye fɛɛn min kɛ, o le ye o ye. A tɔgɔ bɔra kosɔbɛ cɛfari bi saba nunu cɛma.

²³U tun b'a jati kosɔbɛ mɔgɔ bi saba nunu cɛma, nga ale tun ma se mɔgɔ saba nunu fɛ. Kɛlɛden minw tun be ale masacɛ Dawuda kɔlɔsi, a y'a kɛ olu kuntigi ye.

²⁴Zowabu baden Azayɛli kɛra mɔgɔ bi saba nunu dɔ ye fana, ani Dodo dencɛ Elanan ka bɔ Bɛtilehɛmu,

²⁵ni Arɔdikaw Sama ni Elika,

²⁶ni Paliticɛ Ɛlɛsi, ni Ikɛsi dencɛ Ira ka bɔ Tekowa,

²⁷ni Abiyezɛri ka bɔ Anatɔti, ni Usacɛ Mebunayi,

²⁸ani Awoya kɔmɔgɔ Salimɔn, ni Netofaka Marayi,

²⁹ani Netofaka Baana dencɛ Elɛbu, ni Iribayi dencɛ Itayi ka bɔ Gibeya, Bɛnzamɛn ka mara la,

³⁰ani Pireyatɔnka Benayawu, ni Idayi ka bɔ Gaasi wolonkoto daa la,

³¹ani Bɛtarabaka Abiyalibɔn, ni Baarumika Azimawɛti,

³²ani Salibimuka Eliyaba, ni Yasɛn deenw, Yonatan,

³³ni Sama ka bɔ Arari mara la, ani Sarari dencɛ Ayamu ka bɔ Arari mara la,

³⁴ni maakacɛ Asibayi dencɛ Elifɛlɛti, ani Giloka Ayitofɛli dencɛ Eliyamu,

³⁵ni Ɛsirayi ka bɔ Karimɛli, ani Paarayi ka bɔ Ariba,

³⁶ni Sobaka Natan dencɛ Yigeyali, ani Bani ka bɔ Gadi,

³⁷ni amonicɛ Selɛki, ani Narayi ka bɔ Beerɔti, ale lo tun be to ka Seruya dencɛ Zowabu ka kɛlɛkɛminanw ta,

³⁸ni Ira ni Garɛbu ka bɔ Yetɛri ka soo,

³⁹ni iticɛ Uri. U bɛɛ lajɛnnin tun ye mɔgɔ bi saba ni wolonwula ye.