Read dyu Samuyɛli ka kitabu filanan 5 Bible Online

Samuyɛli ka kitabu filanan 5 - dyu bible

Samuyɛli ka kitabu filanan 5

¹Isirayɛliden tɔw bɛɛ nana Dawuda fɛ Eburɔn k'a fɔ a ye ko: «Anw y'i badenw, n'i fadenw ye.

²Waati tɛmɛnin na, Sayuli tun ye an ka masacɛ ye, ele lo tun be to ka bila Isirayɛlidenw ɲa ka taga kɛlɛyɔrɔ la. Masaba y'a fɔ i ye ko ele le ben'a ka jama Isirayɛli mara, ko e bena kɛ an kuntigi ye.»

³O la Isirayɛli cɛkɔrɔbaw bɛɛ wilila ka na masacɛ fɛ Eburɔn. Masacɛ Dawuda bɛnna n'u ye Masaba ɲakɔrɔ. U ye tulu kɛ Dawuda kunna k'a kɛ u ka masacɛ ye.

⁴ Yanni Dawuda ka kɛ masacɛ ye, o y'a sɔrɔ a tun ye saan bi saba sɔrɔ ka ban, a ye saan bi naani kɛ masaya la.

⁵A ye saan wolonwula ni kalo wɔɔrɔ kɛ masaya la Eburɔn, Zuda kɔmɔgɔw kunna, ka saan bi saba ni saba kɛ Zeruzalɛmu, Isirayɛli ni Zuda mara kunna.

⁶ Loon dɔ, masacɛ wilila k'a mɔgɔw minɛ ka taga zebuziw kama Zeruzalɛmu, minw tun ye o yɔrɔ mara deenw ye. Zebuziw y'a fɔ Dawuda ye ko: «San'i ka don, fɔɔ n'i ye fiɲɛntɔw ni murukuw ɲɔti ka bɔ i ɲa fɔlɔ.» O kɔrɔ ko a donyɔrɔ te yen.

⁷O n'a ta bɛɛ, Dawuda sera ka *Siyɔn yɔrɔ barikaman kɛlɛ ka se o kɔrɔ. O le kɛra Dawuda ka ciin ye.

⁸O loon na, Dawuda tun y'a fɔ ko mɔgɔ min b'a fɛ ka se zebuziw kɔrɔ, k'o tigi ka tɛmɛ ni kuluwo ye, ani ko fiɲɛntɔw ni muruku nunu koo ka go Dawuda ye dɛ! O le y'a to u be to k'a fɔ ko: «Fiɲɛntɔw ni murukuw te don masaso kɔnɔ.» [1]

⁹O kɔ, Dawuda sigira o yɔrɔ barikaman nin na, k'a tɔgɔ la ko Dawuda ka ciin. U ye dingɛ min fa ni bɔgɔ ye k'a wili, a ye lɔli wɛrɛ kɛ o yɔrɔ n'a ka soo cɛ k'a yɛrɛ tanga.

¹⁰O tuma na, Dawuda tun be barika sɔrɔla ka taga ɲa, bari Masaba, Setigi Ala tun be n'a ye.

¹¹Tiri masacɛ Iramu ye mɔgɔw ci Dawuda fɛ, ni sɛdiriyiriw ye, ni yirilɛsɛbagaw ani kabakurulɛsɛbagaw. U nana masaso lɔ k'a di Dawuda ma.

¹²Dawuda y'a faamu o tuma na ko Masaba le y'ale kɛ masa ye Isirayɛlidenw kunna, ani k'ale ka masaya sabati a ka jama Isirayɛli kosɔn.

¹³Dawuda ye muso wɛrɛw ni gɛrɛfɛmuso wɛrɛw ta Zeruzalɛmu dugu kɔnɔ a bɔnin kɔ Eburɔn ka na yen. A ye dencɛ ni denmuso wɛrɛw sɔrɔ fana.

¹⁴A ye deen minw sɔrɔ k'a to Zeruzalɛmu, olu tɔgɔ filɛ: Samuwa, ni Sobabu, ani Natan, ni Solomani,

¹⁵ani Yibari ni Elisuwa, ani Nɛfɛgi ni Yafiya,

¹⁶ani Elisama ni Eliyada, ani Elifɛlɛti.

¹⁷Filisiw y'a mɛn ko u ye tulu kɛ Dawuda kunna k'a kɛ Isirayɛlidenw ka masacɛ ye. O la, u bɛɛ wilila ka na ko u b'a minɛ. Dawuda y'o mɛn minkɛ, a wilila ka ta'a ka cɛfaricin na.

¹⁸Filisiw nana sigi ka erefaw ka kɔkɛnɛ fa.

¹⁹Dawuda ye Masaba daali ko: «Ne ka kan ka taga filisi nunu kɛlɛ wa? E bena u don ne bolo wa?» Masaba y'a jaabi ko a ka taga, ko ale bena filisiw don a bolo, siga t'a la.

²⁰O la, Dawuda wilila ka taga u kɛlɛ Baaliperasimu ka se u kɔrɔ. O kɔ, a y'a fɔ ko Masaba ye tɛmɛyɔrɔ bɔ ale ye a juguw cɛma i n'a fɔ jii b'a ka tɛmɛyɔrɔ bɔ cogo min na. O le y'a to u y'o yɔrɔ tɔgɔ la ko Baaliperasimu, o kɔrɔ, tɛmɛyɔrɔbɔbaga.

²¹Filisiw tun bolila k'u ka joow to o yɔrɔ la. Dawuda n'a ka mɔgɔw y'u ta ka taga n'u ye.

²²O kɔ, filisiw wilila ka na tugu ka sigi ka erefaw ka kɔkɛnɛ fa.

²³Dawuda ye Masaba ɲininga tugu, a y'a jaabi ko: «Kana tilen ka taga, munumunu ka taga u kɔfɛ ka taga bɔ u kan tuu faan fɛ.

²⁴N'i ye seenw mankan mɛn ka bɔ tuu nin sanfɛ tuma min na, i ka banba i yɛrɛ ma, bari ne Masaba le be tagara i ɲafɛ ka filisiw ka kɛlɛdenw kɛlɛ.»

²⁵Masaba tun ye min fɔ Dawuda ye, a y'o kɛ. A ye filisiw kɛlɛ ka se u kɔrɔ k'a ta Geba fɔɔ ka taga se Gezɛri.