Read dyu Samuyɛli ka kitabu filanan 7 Bible Online

Samuyɛli ka kitabu filanan 7 - dyu bible

Samuyɛli ka kitabu filanan 7

¹Masacɛ ye sigiyɔrɔ sɔrɔ a yɛrɛ ka soo tuma min na, ani Masaba ye hɛrɛ kɛ a ye k'a bɔsi a laminijuguw bɛɛ bolo tuma min na,

²a y'a fɔ kira Natan ye ko: «A filɛ, ne ka soo lɔnin be ni sɛdiriyiri ye, k'a sɔrɔ Ala ka layidu taamasiɲɛ kɛsu be fanibugu kɔnɔ.»

³Natan y'a fɔ a ye ko ni fɛɛn min b'a dusu la n'a b'a fɛ k'a kɛ, ko a ka taga o kɛ, ko bari Masaba be n'a ye.

⁴O sufɛ yɛrɛ, Masaba kumana Natan fɛ k'a fɔ a ye ko:

⁵«Ta'a fɔ ne ka baarakɛla Dawuda ye ko ne ko ale lo bena soo lɔ ne ye, janko ne ka sigi a kɔnɔ wa.

⁶Ko kabini loon min na ne ye Isirayɛlidenw bɔ Ezipiti jamana na fɔɔ ka na se bii ma, ne ma sigi ka ye soo kɔnɔ. Tɛmɛtɛmɛyɔrɔw la, ne tora fanibugu le kɔnɔ.

⁷Ka ne to ni Isirayɛlidenw bɛɛ ye u ka taama kɔnɔ, u kuntigiw ne tun ye minw bila ne ka jama ɲafɛ, ne y'a fɔ olu dɔ ye ka ye ko mun na u ma soo lɔ ne ye ni sɛdiriyiri ye wa?

⁸«Sisan, a fɔ ne ka baarakɛla Dawuda ye ko ne Masaba, Setigi le y'a fɔ ko ne le y'a minɛ ka bɔ kongo kɔnɔ sagadɛndɛyɔrɔ la, ka n'a kɛ ne ka jama Isirayɛli kuntigi ye.

⁹Ko ne tor'a fɛ a ka taayɔrɔw bɛɛ la, ne y'a juguw bɛɛ halaki ka bɔ a ɲafɛ. Ko ne ben'a kɛ a tɔgɔ be bɔ i n'a fɔ diɲɛ kɔnɔ mɔgɔbabaw ta.

¹⁰Ko ne bena sigiyɔrɔ di ne ka jama Isirayɛli ma k'u sigicogo ɲa, janko u ka se ka sigi u yɛrɛ ka yɔrɔ la ɲasuma na, mɔgɔjuguw kana u tɔɔrɔ tugu, i n'a fɔ u tun b'a kɛ cogo min na fɔlɔ la,

¹¹ani kabini ne tun ye kuntigiw sigi ne ka jama Isirayɛli kunna tuma min na. Ko ne ye hɛrɛ kɛ u ye k'u bɔsi u juguw bɛɛ bolo. Ko ne Masaba le ko ne yɛrɛ le bena ale ka soo sabati.

¹² Ko ale ka loon mana se, n'a sara, ne ben'a kɔmɔgɔ dɔ wili, a yɛrɛ ye min wolo. Ne bena barika don o deen nin ka masaya la.

¹³Ko ale lo bena soo lɔ ne ye, ani ne ben'a ka masaya sabati kudayi.

¹⁴ Ne bena kɛ a faa ye, a bena kɛ ne deen ye. N'a ye kojugu kɛ, adamadenw le bena kɛ a ladifɛn ye.

¹⁵Nga ne ka makari tena ban a faan fɛ i n'a fɔ a tun banna Sayuli faan fɛ cogo min na. Ne ye min fili e ɲana.

¹⁶ Kɔmɔgɔw bena sɔrɔ e fɛ tuma bɛɛ, ani masaya bena to e bolo, a bena sabati tuma bɛɛ.»

¹⁷Ala ye min bɛɛ fɔ Natan ye koo yetaw la, a y'o bɛɛ fɔ Dawuda ye.

¹⁸Masacɛ Dawuda tagara sigi Masaba ɲakɔrɔ k'a fɔ a ye ko: «Matigi, Masaba, ne ye jɔn ye, ne ka soo ye mun ye, n'i y'a kɛ ne ye lɔyɔrɔ nin sɔrɔ?

¹⁹Halibi, o ma kɛ foyi ye i ɲana, Matigi, Masaba, fɔɔ i tagara ɲa ka waati nata layidu ta i ka baarakɛla ka soo ye, Matigi, Masaba, o fana bɛnna adamaden ka miiriya ma.

²⁰Ne Dawuda be se ka mun le fɔ i ye sa? Bari e b'i ka baarakɛla lɔn, Matigi, Masaba.

²¹I ye koba nin bɛɛ kɛ k'o yira i ka baarakɛla la, i ka kuma kosɔn i sago la.

²²«Matigi, Masaba, i ka bon, i ɲɔgɔn te yen! Ka kɛɲɛ n'an ka mɛnta ye, Ala wɛrɛ te yen ni ele tɛ.

²³ Siya wɛrɛ be yen dugukolo kan tugu min be i n'a fɔ i ka jama Isirayɛli wa? Ele Ala ye minw kunmabɔ, k'u kɛ e yɛrɛ taw ye, janko u tɔgɔ ka se ka bɔ. O la, e ye kabakobabaw kɛ u ka jamana ye. Siya wɛrɛ be yen tugu min be i ka siya nin bɔ wa? I ye min bɔ Ezipiti jamana na, o yɔrɔ siya n'u ka batofɛnw bolo.

²⁴I ye i ka jama Isirayɛli kɛ i ta ye tuma bɛɛ, ele Masaba kɛra u ka Ala ye.

²⁵«Sisan Masaba Ala, i ye kuma min fɔ i ka baarakɛla n'a ka somɔgɔw kosɔn, a to o ka kɛ ten tuma bɛɛ. I ye min fɔ, i k'o kɛ.

²⁶Boɲa ka la i kan tuma bɛɛ, mɔgɔw k'a fɔ ko Masaba, Setigi ye Isirayɛli ka Ala ye. I ka baarakɛla Dawuda ka soo ka barika sɔrɔ e ɲakɔrɔ.

²⁷«Masaba, Setigi, Isirayɛli ka Ala, i yɛrɛ ye nin yira ne la k'a fɔ ko i bena kɔmɔgɔw di ne ma. O le y'a to i ka baarakɛla ye jagwɛlɛya sɔrɔ k'i daali ten.

²⁸Sisan Matigi, Masaba, i ye Ala ye, i ka kuma ye tiɲɛ ye, i y'o hɛrɛ koo fɔ i ka baarakɛla ye.

²⁹O la sa, barika don i ka baarakɛla ka soo la, janko a ka se ka to i ɲakɔrɔ tuma bɛɛ. Bari ele Matigi, Masaba le tun y'o fɔ. I ka dɛmɛ kosɔn, i ka baarakɛla ka soo bena barika sɔrɔ tuma bɛɛ.»