Read dyu Samuyɛli ka kitabu filanan 8 Bible Online

Samuyɛli ka kitabu filanan 8 - dyu bible

Samuyɛli ka kitabu filanan 8

¹O kɔ, Dawuda ye filisiw kɛlɛ ka se u kɔrɔ fɔɔ u y'u yɛrɛ majigi a ye. Fanga min tun be u fɛ o mara kɔnɔ, a y'o bɔsi u la.

²A sera mowabuw kɔrɔ fana. A tun be to k'u la duguma ka sumani kɛ ni juru ye. N'a ye juru ɲaa fila suma, a b'o yɔrɔ mɔgɔw faga. N'a ye juru ɲaa kelen suma tugu, a b'o tigiw to nii na. O la, mowabuw y'u yɛrɛ majigi Dawuda ye, u tun be to ka nisɔngɔ sara a ye.

³Soba [1] masacɛ Adadezɛri, n'o ye Erewɔbu dencɛ ye, ale tun tagara Efarati baji mara la ko a b'a minɛ tugu tuma min na, Dawuda y'a kɛlɛ ka se a kɔrɔ fana.

⁴A ye sotigi waa kelen ni kɛmɛ wolonwula (1 700) bɔsi a fɛ, ni sennatigi waa mugan (20 000), ka wotorow samaso kɛmɛ to yen ka tɔ nunu bɛɛ senfasaw tigɛtigɛ.

⁵Sirika minw be Damasi, olu nana k'u bena Soba masacɛ Adadezɛri dɛmɛ. Dawuda ye mɔgɔ waa mugan ni fila (22 000) faga olu la.

⁶O kɔ, a ye lasigidenw sigi Damasi mara la, Siri jamana na. O la, Sirikaw y'u yɛrɛ majigi, ka nisɔngɔ sara a ye. Masaba tun be see di Dawuda ma a ka kɛlɛw bɛɛ la.

⁷A ye Adadezɛri ka kɛlɛdenw kuntigiw ka nigɛkunbɛnnan sanulamanw minɛ ka na n'u ye Zeruzalɛmu.

⁸A ye zira caaman ta Adadezɛri ka duguba fila kɔnɔ, minw ye Bɛta ni Berotayi ye.

⁹Amati masacɛ Towu y'a mɛn ko Dawuda sera Adadezɛri ka kɛlɛdenw bɛɛ kɔrɔ.

¹⁰A y'a dencɛ Zoramu ci masacɛ Dawuda fɛ k'a fo, ani k'a waleɲuman lɔn Adadezɛri kɛlɛko la ka se a kɔrɔ, bari Toyi ni Adadezɛri tun ye kɛlɛɲɔgɔnw ye. Zoramu tagara ni minanw ye minw dilanna ni warigwɛ ye, ni sanu, ani zira ye.

¹¹Masacɛ Dawuda y'u di Masaba ma i n'a fɔ a tun ye siyaw ka warigwɛ ni sanu d'a ma cogo min na, a tun sera minw bɛɛ kɔrɔ.

¹²A tun sera siya minw kɔrɔ, olu ye Sirikaw ye, ni mowabuw, ani amoniw, ni filisiw ani amalɛkiw. Dawuda ye fɛɛn minw sɔrɔ Soba masacɛ Adadezɛri bololafɛnw na, n'o ye Erewɔbu dencɛ ye, a y'o fana di Masaba ma.

¹³ Dawuda kɔsegitɔ ka bɔ Sirikaw kɛlɛyɔrɔ la, kɔgɔ be kɔkɛnɛ min na, a ye edɔmu waa tan ni seegi (18 000) faga o kɔnɔ ka tɔgɔba sɔrɔ.

¹⁴A ye lasigidenw sigi Edɔmu mara bɛɛ la. O la, edɔmuw bɛɛ y'u yɛrɛ majigi a ye. Masaba fana tun be see d'a ma a ka kɛlɛw bɛɛ la.

¹⁵Dawuda sigira Isirayɛlidenw bɛɛ kunna. A tun b'a ka jama bɛɛ mara ni tilenninya ni tiɲɛ ye.

¹⁶Seruya dencɛ Zowabu le tun ye kɛlɛdenw kuntigi ye. Ayiludi dencɛ Yosafati le tun be sɛbɛko kunna.

¹⁷Ayitubi dencɛ Sadɔki ni Abiyatari dencɛ Ayimelɛki tun ye sarakalasebagaw ye. Seraya tun ye sɛbɛnnikɛla ye.

¹⁸Yoyada dencɛ Benayawu le tun ye masacɛ kɔlɔsibagaw kuntigi ye. Dawuda deenw tun ye sarakalasebagaw ye fana.