Read dyu Masacɛw ka kitabu fɔlɔ 1 Bible Online

Masacɛw ka kitabu fɔlɔ 1 - dyu bible

Masacɛw ka kitabu fɔlɔ 1

¹Masacɛ Dawuda tun kɔrɔla kosɔbɛ. U tun be to ka faniw biri a kan, nga a ka nɛnɛ tun te ban.

²O la, a ka baaradenw y'a fɔ a ye ko: «Sunguru min ma cɛko lɔn fɔlɔ, an ka o ɲini e masacɛ, an ka matigi ye, a ka to ka baara kɛ masacɛ ye, ka to ka janto a la, ani ka la n'a ye, masacɛ, an ka matigi k'a yɛrɛ fari gwan n'a ye.»

³U ye sunguruɲuman ɲini Isirayɛli jamana bɛɛ kɔnɔ. U ye Sunɛmuka dɔ sɔrɔ min tɔgɔ ko Abisagi. U y'a minɛ ka na n'a ye masacɛ fɛ.

⁴O sunguru nin tun cɛɛ ka ɲi kosɔbɛ. A tun tora ka janto masacɛ la, ani ka baara kɛ a ye, nga masacɛ ma jɛn ka ye n'a ye.

⁵ Yɛrɛboɲa donna Agiti dencɛ Adoniya la fɔɔ a y'a fɔ ko ale lo bena kɛ masacɛ ye. A ye wotorow ni soow ɲini, ani mɔgɔ bi duuru minw tun bena bila a ɲafɛ,

⁶ka sɔrɔ a facɛ Dawuda be yen. A m'a jalaki ko: «Mun na e ye nin kɛ?» A tun cɛɛ ka ɲi haali, ale lo tun tugura Abisalɔn kɔ kɔrɔya la.

⁷A ni Seruya [1] dencɛ Zowabu, ni sarakalasebaga Abiyatari ye ɲɔgɔnye kɛ, olu sɔnn'a ta ma.

⁸Nga sarakalasebaga Sadɔki ni Yoyada dencɛ Benayawu, ani kira Natan, ani Simeyi ni Ereyi, ani Dawuda kɔlɔsibagaw niin tun te Adoniya ka koo la.

⁹Adoniya ye sagaw, ni turaw ani misi kɛɲɛnin tulɔninw kɛ saraka ye «Kabakuru nɔgɔnɔgɔnin» gɛrɛfɛ, Ɛnrogɛli kɔji bɔyɔrɔ daminɛyɔrɔ gɛrɛfɛ. A tun ye masacɛ deen tɔw wele, ani Zuda mara mɔgɔw bɛɛ minw tun be baara kɛra masacɛ ye.

¹⁰Nga a ma kira Natan, ni Benayawu, ani Dawuda kɔlɔsibagaw n'a faden Solomani wele.

¹¹ Natan y'a fɔ Solomani bamuso Batiseba ye ko: «E m'a mɛn ko Agiti dencɛ Adoniya y'a yɛrɛ kɛ masacɛ ye wa? Nga an matigi Dawuda t'a kala ma.

¹²Ayiwa, n bena ladili d'i ma, janko i k'i nii, n'i dencɛ Solomani ta kisi.

¹³Taga don masacɛ Dawuda fɛ k'a fɔ a ye ko: ‹Masacɛ, ne matigi, e tun ma kali i ka jɔnmuso ye ko ne dencɛ Solomani le bena kɛ masacɛ ye i nɔɔ na ka sigi i ka masasigilan kan wa? A do kɛra di Adoniya kɛra masa ye?›

¹⁴K'i to kuma na ten masacɛ fɛ, ne bena na don k'i ka kuma dafa.»

¹⁵Batiseba donna masacɛ ka layɔrɔ la. O y'a sɔrɔ masacɛ tun kɔrɔla kosɔbɛ, Sunɛmuka Abisagi tun be baara kɛr'a ye.

¹⁶Batiseba y'a kunbiri gwan masacɛ ɲakɔrɔ k'a kuun biri. Masacɛ y'a ɲininga ko: «E be mun le fɛ?»

¹⁷A y'a fɔ masacɛ ye ko: «Ne matigi, e tun ma kali i ka jɔnmuso ye Masaba i ka Ala tɔgɔ la k'a fɔ ko ne dencɛ Solomani le bena kɛ masacɛ ye i nɔɔ na ka sigi i ka masasigilan kan wa?

¹⁸Adoniya do kɛra masacɛ ye sisan. E t'o kala ma wa, masacɛ, ne matigi?

¹⁹A ye tura ni misi kɛɲɛnin tulɔnin, ani saga caaman kɛ saraka ye, a ye masacɛ deenw bɛɛ, ni sarakalasebaga Abiyatari, ani kɛlɛkuntigi Zowabu wele, nga a ma i ka baaraden Solomani wele.

²⁰Masacɛ, ne matigi, Isirayɛlidenw bɛɛ b'i filɛla, i ye mɔgɔ min sigi i nɔɔ na masaya la, janko u ka se k'o lɔn.

²¹N'o tɛ, masacɛ, ne matigi mana sa ka ban tuma min na, u bena ne ni n dencɛ Solomani kɛ i n'a fɔ kojugukɛlaw.»

²²K'a to kuma na ni masacɛ ye, kira Natan fana sera.

²³U y'a fɔ masacɛ ye ko kira Natan nana. Natan donna masacɛ fɛ k'a kunbiri gwan, k'a ɲaa biri duguma.

²⁴A y'a fɔ masacɛ ye ko: «Masacɛ, ne matigi, ele le y'a fɔ ko Adoniya bena kɛ masacɛ ye e kɔfɛ ka sigi i ka masasigilan kan wa?

²⁵Bari a tagara bii ka turaw ni misi kɛɲɛnin tulɔninw ani saga caaman kɛ saraka ye, a fana ye masacɛ deenw bɛɛ, ni kɛlɛkuntigiw, ani sarakalasebaga Abiyatari wele. Olu bɛɛ b'a la ka dumuni kɛ, ka minni kɛ a fɛ, n'u b'a fɔra ko: ‹Masacɛ Adoniya ka sii sɔrɔ!›

²⁶Nga a ma ne, i ka baaraden, wele, ni sarakalasebaga Sadɔki, ani Yoyada dencɛ Benayawu, n'i dencɛ Solomani.

²⁷E masacɛ, ne matigi le ye sira di k'o ka kɛ wa? Ka sɔrɔ, e ma foyi fɔ i ka baaraden ye ko e ye nin le woloma ka sigi e nɔɔ na masaya la.»

²⁸Masacɛ Dawuda y'a fɔ k'u ka Batiseba wele ka na. A nana don masacɛ fɛ ka lɔ a ɲakɔrɔ.

²⁹Masacɛ kalila k'a fɔ ko: «Masaba kosɔn, ale min ye ne bɔ ne ka gwɛlɛyaw bɛɛ la.

³⁰Ne tun kalila i ye Masaba, Isirayɛli ka Ala tɔgɔ la k'a fɔ ko i dencɛ Solomani le bena sigi ne nɔɔ na masaya la, ne ben'o kɛ bii yɛrɛ.»

³¹O la, Batiseba y'a kunbiri gwan k'a ɲaa biri duguma, k'a fɔ ko: «Masacɛ Dawuda, ne matigi, i ka barika sɔrɔ tuma bɛɛ.»

³²Masacɛ Dawuda ko: «Aw ka sarakalasebaga Sadɔki, ni kira Natan, ani Yoyada dencɛ Benayawu wele.» U donna masacɛ fɛ.

³³Masacɛ y'a fɔ u ye ko: «Aw ka taga ni ne ka baaradenw ye, ka ne dencɛ Solomani yɛlɛ ne yɛrɛ ka sofali kan, ka taga n'a ye Giyɔn kɔɔ daminɛyɔrɔ la.

³⁴O yɔrɔ la, sarakalasebaga Sadɔki ni kira Natan bena tulu mɔ a la, k'a kɛ masacɛ ye Isirayɛlidenw kunna. Aw ka buru fiyɛ, k'aw kaan kɔrɔta ko: ‹Masacɛ Solomani ka sii sɔrɔ!›

³⁵O kɔ, aw ka tugu a kɔ ka na. A bena sigi ne ka masasigilan kan, ka kɛ masacɛ ye ne nɔɔ na. Ne le y'a sigi Isirayɛli ni Zuda mara mɔgɔw kunna.»

³⁶Yoyada dencɛ Benayawu ye masacɛ jaabi ko: «Amiina! Masacɛ, ne matigi, i ka kuma nin ye Masaba i ka Ala ka kuma ye cɔ!

³⁷Masaba ka to Solomani fɛ i n'a fɔ a tora masacɛ, ne matigi fɛ cogo min na. A ka barika don a ka masaya la ka tɛmɛ masacɛ Dawuda, ne matigi ta kan!»

³⁸O la, sarakalasebaga Sadɔki ni kira Natan, ani Yoyada dencɛ Benayawu, ni masacɛ kɔlɔsibagaw ye Solomani yɛlɛ masacɛ Dawuda ka sofali kan ka bɔ ka taga Giyɔn kɔɔ daminɛyɔrɔ la.

³⁹Tulu be gɔɔn min na, sarakalasebaga Sadɔki y'o ta Masaba ka fanibugu kɔnɔ ka Solomani mɔ ni tulu ye. O kɔ, u ye buru fiyɛ, jama bɛɛ y'u kaan kɔrɔta ko: «Masacɛ Solomani ka sii sɔrɔ!»

⁴⁰Jama bɛɛ tugur'a kɔ ka kɔsegi ka na. U tun be filew fiyɛra, ani ka nisɔndiya kosɔbɛ, fɔɔ dugukolo bɛɛ fara u ka woyo la.

⁴¹O mankan nin donna Adoniya n'a ka mɔgɔ weleninw bɛɛ tulo la. O y'a sɔrɔ u tun be tilara dumuni na. Zowabu ye buru fiyɛkan mɛn dɔrɔn, a ko: «Nin ye mun mankan ye dugu kɔnɔ?»

⁴²K'u to o kuma na, sarakalasebaga Abiyatari dencɛ Zonatan sera. Adoniya y'a fɔ a ye ko: «Gwɛrɛ ka na. I ye mɔgɔɲuman ye, i be na kibaru diman fɔ an ye.»

⁴³Zonatan y'a jaabi ko: «Ayi! Masacɛ Dawuda, an matigi ye Solomani sigi masaya la.

⁴⁴A ye sarakalasebaga Sadɔki ni kira Natan, ani Yoyada dencɛ Benayawu, ni masacɛ kɔlɔsibagaw ci n'a ye. U y'a yɛlɛ masacɛ ka sofali kan,

⁴⁵sarakalasebaga Sadɔki ni kira Natan y'a mɔ ni tulu ye k'a kɛ masacɛ ye Giyɔn kɔɔ daminɛyɔrɔ la. U bɔra o yɔrɔ la ka kɔsegi n'u be nisɔndiya, dugumɔgɔw bɛɛ le b'a la. Aw y'o mankan le mɛn ten.

⁴⁶Solomani yɛrɛ sigira masasigilan kan.

⁴⁷Masacɛ ka dakɔrɔsigiw tagara duba kɛ masacɛ Dawuda, an matigi ye. U y'a fɔ ko: ‹I ka Ala k'a kɛ Solomani tɔgɔ ka bɔ ka tɛmɛ i ta kan, ani a k'a kɛ a ka masaya ka barika sɔrɔ ka tɛmɛ i ta kan.› Ka masacɛ to a ka dilan kan, a y'a kuun biri

⁴⁸k'a fɔ ko: ‹Nɔɔrɔ ka la Masaba kan, Isirayɛli ka Ala, ale min ye mɔgɔ di, min sigira ne nɔɔ na bii n ka masasigilan kan, ani a y'a kɛ o kɛra n ɲana!› »

⁴⁹Adoniya tun ye mɔgɔ minw wele, olu bɛɛ siranna, u wilila ka taga u kunfɛ.

⁵⁰Adoniya fana siranna Solomani ɲa, o la, a wilila ka taga sarakabɔyɔrɔ nɔnkɔnw minɛ ka lɔ.

⁵¹U nan'a fɔ Solomani ye ko Adoniya sirann'a ɲa, ko a tagara sarakabɔyɔrɔ nɔnkɔnw minɛ ka lɔ, n'a b'a fɔra ko fɔɔ masacɛ Solomani ka kali ale ye bii ko a tena ale faga.

⁵²Solomani y'a fɔ a ye ko n'a sɔrɔla ko a ye mɔgɔɲuman ye, ko foyi tena kɛ a la, ko nga ni juguya yer'a la, ko a be faga.

⁵³O kɔ, masacɛ Solomani ye mɔgɔw ci k'olu ka ta'a minɛ k'a jigi ka bɔ sarakabɔyɔrɔ kan. A nan'a kunbiri gwan masa Solomani ɲakɔrɔ. Solomani y'a fɔ a ye ko a ka taga soo.