Read dyu Masacɛw ka kitabu fɔlɔ 10 Bible Online

Masacɛw ka kitabu fɔlɔ 10 - dyu bible

Masacɛw ka kitabu fɔlɔ 10

¹ Solomani tɔgɔ bɔra Masaba barika la. Saba masamuso y'o mɛn, a wilila ka na, ko ale bena a sɛgɛsɛgɛ n'a ka hakilitigiyakumaw ye.

²A nana se Zeruzalɛmu. Mɔgɔ caaman tun y'a bila sira, u tun nana ni ɲɔgɔmɛw ye, ka wusulan ta, ni sanu caaman, ani kabakuru sɔngɔgwɛlɛnw. A tagara Solomani fɛ, k'a kɔnɔnakow bɛɛ fɔ a ye.

³Solomani sera k'a ka ɲiningaliw bɛɛ jaabi, koo si ma to ni masacɛ ma se ka min gwɛya a ye.

⁴A kɛra ten, Saba masamuso y'a ye ko Solomani be koo lɔn. A ye masaso min lɔ, a y'o ye fana.

⁵Dumuni min be kɛ masacɛ ka soo, n'a ka baarakɛlaw ka layɔrɔw, n'u kannafaniw n'u ka baaraw, masacɛ ka minnifɛn dibagaw n'u kannafaniw, ani yɛlɛyɔrɔw ka taga Masaba ka soo, a y'o fana ye, a dabari banna.

⁶A y'a fɔ masacɛ ye ko: «Ne ye fɛɛn min mɛn ka ne to n ka jamana na, i ka lɔnniya n'i ka koo la, o ye tiɲɛ ye.

⁷Ne tun te se ka l'a la, ni ne tun ma se yan k'o ye ni n ɲaa ye. U tun m'a tilancɛ yɛrɛ fɔ ne ye. I ka lɔnniya n'i ka ɲatagako tɛmɛna i tɔgɔ bɔko kan kosɔbɛ.

⁸Mɔgɔw ni baarakɛla minw b'i ɲakɔrɔ tuma bɛɛ ka to k'i ka lɔnniyakuma nunu lamɛn, olu dagamunin lo.

⁹Masaba i ka Ala min sɔnna k'i kɛ masacɛ ye Isirayɛlidenw kunna, boɲa ka la ale kan. Isirayɛlidenw koo ka di Masaba ye tuma bɛɛ minkɛ, o le y'a to, a y'i kɛ masacɛ ye janko i ka to ka jama ka koow ɲanabɔ ni tilenninya ye.»

¹⁰Masamuso nin ye sanu tɔni saba ni tilan ɲɔgɔn, ni wusulan caaman, ani kabakuru sɔngɔgwɛlɛnw d'a ma. Saba masamuso ye wusulan minw di masacɛ Solomani ma, mɔgɔ wɛrɛ ta ma se o ma tugu o kɔfɛ.

¹¹Iramu ka kurun minw tun ye sanu ta Ofiri ka na n'a ye, olu le tun ye santalilɔgɔw ta caaman Ofiri ka na n'u fana ye, ani kabakuru sɔngɔgwɛlɛnw.

¹²Masacɛ ye santalilɔgɔ nunu kɛ ka tutunanw dilan Masaba ka soo kɔnɔ, n'a yɛrɛ ka soo kɔnɔ, ka dɔw kɛ gɔniw ni kolonjow ye k'u di dɔnkililabagaw ma. O kɔ, o santaliyiri ɲɔgɔn ma na tugu, mɔgɔ ma u ye tugu fɔɔ ka na se bii ma.

¹³Saba masamuso mako tun be fɛɛn o fɛɛn na, a ye fɛɛn o fɛɛn daali, masacɛ Solomani y'o bɛɛ d'a ma. O be danna boɲafɛnw na a tun ye min d'a ma. O kɔ, masamuso nin segira ka ta'a ka jamana na n'a ka baarakɛlaw ye.

¹⁴Solomani tun be to ka sanu min sɔrɔ saan o saan, o tun ye tɔni mugan ye.

¹⁵A tun be to ka min minɛ jagokɛlaw fɛ, ni Arabu jamana masaw bɛɛ fɛ, ni jamana ka lasigidenw fɛ, o be danna.

¹⁶Masacɛ Solomani ye nigɛkunbɛnnan belebele kɛmɛ fila dilan ni sanu faganin ye. U kelen kelen bɛɛ dilanna ni sanu kilo wɔɔrɔ ye.

¹⁷A ye fitinifitini kɛmɛ saba dilan fana ni sanu faganin ye. U kelen kelen bɛɛ dilanna ni kilo kelen ni tilan ye. A ka soo min be wele Liban tuu, a tagara u bila yen.

¹⁸O kɔ, masacɛ ye masasigilan belebeleba dilan ni samaɲin ye, ka sanu yɛrɛ yɛrɛ kɛ k'a yɔrɔ bɛɛ mɔ.

¹⁹Yɛlɛyɛlɛnan seen layɔrɔ deen wɔɔrɔ le tun be masasigilan nin ɲafɛ, a kɔɔ sɛmɛyɔrɔ tun korinin be. Bololayɔrɔ tun be sigilan nin faan fila nunu na. Jara jaa fila tun dilannin be ka lɔ bololayɔrɔ nunu gɛrɛfɛ.

²⁰Jara jaa tan ni fila tun dilanna ka lɔ yɛlɛyɛlɛnan nin seen layɔrɔ gɛrɛ fila nunu na kelen kelen. O ɲɔgɔn tun ma kɛ ka ye masa si ka yɔrɔ la.

²¹Masacɛ Solomani ka filenw bɛɛ tun ye sanu ye. A ka soo min be wele Liban Tuu, o kɔnɔnaminanw bɛɛ tun ye sanu ye. Foyi tun t'u cɛma min dilanna ni warigwɛ ye, bari warigwɛ tun te jati Solomani ka tile la.

²²Kurunbabaw tun be masacɛ fɛ, minw tun be to ka taga yɔrɔjan ni Iramu taw ye. Saan saba o saan saba, o kurun nunu tun be to ka na ni sanu ye, ni warigwɛ, ani samaɲinw, ni sulaw ani kɔnɔsogolow.

²³Masacɛ Solomani tun tɛmɛna dugukolo masaw bɛɛ kan nafolotigiya, ni lɔnniya la.

²⁴Diɲɛ mɔgɔw bɛɛ tun b'a fɛ ka Solomani ye, ani k'a ka hakilitigiyakuma lamɛn, Ala tun ye min d'a ma.

²⁵U kelen kelen bɛɛ tun be to ka na n'u ka boɲafɛnw ye u bolo, warigwɛ, ni sanu, ani faniw, ni kɛlɛkɛminanw, ni tulu kasadimanw, ani soow ni sofaliw. A tun be kɛ ten saan o saan.

²⁶ Solomani ye kɛlɛkɛwotorow ni sotigiw lajɛn. Wotoro waa kelen ni kɛmɛ naani (1 400) tun b'a fɛ, ni sotigi waa tan ni fila (12 000). A y'u to kɛlɛkɛwotorow biladuguw la, ani Zeruzalɛmu fana, a yɛrɛ kɔrɔ.

²⁷Masacɛ ye warigwɛ lajɛn Zeruzalɛmu. A cayara i n'a fɔ bɛrɛ, sɛdiriyiri fana cayara i n'a fɔ sikomɔriyiri be caya kulujukɔrɔ mara la cogo min na.

²⁸ Solomani ka soow tun be bɔ Ezipiti ni Kewe jamana na. Masacɛ ka sannikɛlaw tun be to ka taga u san yen.

²⁹Ka wotoro kelen ta Ezipiti jamana na ka na n'a ye, o sɔngɔ tun ye warigwɛ kuru kɛmɛ wɔɔrɔ ye. Soo kelen tun ye warigwɛ kuru kɛmɛ ni bi duuru ye. Itiw ni Siri masacɛw bɛɛ tun b'u san ten fana o jagokɛla nunu fɛ.