Read dyu Masacɛw ka kitabu fɔlɔ 12 Bible Online

Masacɛw ka kitabu fɔlɔ 12 - dyu bible

Masacɛw ka kitabu fɔlɔ 12

¹Orobowamu tagara Sisɛmu, bari Isirayɛliden minw be kɔgɔdugu faan fɛ, olu bɛɛ tun ye ɲɔgɔn lajɛn janko u k'a sigi masaya la.

²Nebati dencɛ Zerobowamu y'o kibaruya mɛn k'a to Ezipiti jamana na. A tun bolila masacɛ Solomani ɲa ka taga o yɔrɔ la ka sigi yen.

³U ye mɔgɔ bila k'a wele. Zerobowamu ni Isirayɛliden nunu bɛɛ nana ɲɔgɔn sɔrɔ k'a fɔ Orobowamu ye ko:

⁴«I facɛ ye sigɛnba la an kan. Sisan, ele k'o sigɛn nin nɔgɔya an ye, i faa tun ye min la an kan, an bena baara kɛ i ye.»

⁵A y'a fɔ u ye k'u ka taga fɔlɔ ka segi ka na yanni tile saba. Jama tagara.

⁶Masacɛ Orobowamu ye cɛkɔrɔbaw ɲininga, minw tun ye baara kɛ n'a faa Solomani ye, k'a fɔ ko: «Aw b'a fɛ ne ka jaabili jumɛn di jama nin ma?»

⁷Cɛkɔrɔba nunu y'a jaabi ko: «N'i sɔnna k'i yɛrɛ kɛ jama nin ka baarakɛla ye bii, n'i sɔnna ka mɛnni kɛ u fɛ, ani k'u jaabi ni kumaɲuman ye, u bena to i fɛ ka baara kɛ i ye tuma bɛɛ.»

⁸Nga Orobowamu ye cɛkɔrɔba nunu ka ladili to yen ka ta'a tɔɲɔgɔn kanbelenw ɲininga, a mɔna ni minw ye, n'u be baara kɛ n'a ye.

⁹A y'a fɔ u ye ko: «Ne ka kan ka mun le fɔ jama nin ye? Minw y'a fɔ ne ye ko: ‹I faa ye sɛgɛn min la an kan, i k'o nɔgɔya an ma.› »

¹⁰A tɔɲɔgɔnw y'a jaabi ko: «Mɔgɔ minw y'a fɔ i ye ko i faa ye sigɛnba min la olu kan, i k'o nɔgɔya olu ma, i bena min fɔ u ye, o filɛ nin ye: Ele bolokunnadennin ka bon n'i faa cɛɛ ye.

¹¹Ko i faa tun ye sigɛnba la u kan, ko sisan e bena dɔ fara o kan. Ko i faa tun be to k'u bugɔ ni busan ye, ko ele bena to k'u bugɔ ni ŋɔni ye.»

¹²Tile sabanan loon sera, Zerobowamu ni jama bɛɛ kɔsegira ka na masacɛ Orobowamu fɛ, i ko a tun y'a fɔ u ye cogo min na, k'u ka taga ka na yanni tile saba.

¹³Cɛkɔrɔbaw tun ye ladili min d'a ma, a y'o to yen, ka kumajugu fɔ jama ye,

¹⁴k'a tɔɲɔgɔn kanbelen nunu ka ladilikuma ta k'o fɔ u ye ko: «Ne faa ye sigɛnba la aw kan, ne fana bena dɔ fara o sɛgɛn nin kan. Ne faa tun be to k'aw bugɔ ni busan ye, ne bena to k'aw bugɔ ni ŋɔni ye.»

¹⁵A kɛra ten, masacɛ ma sɔn ka mɛnni kɛ jama fɛ, bari Masaba le y'a kɛ ten janko a tun ye kuma min fɔ kira Aya ye ka bɔ Silo ko a k'a fɔ Nebati dencɛ Zerobowamu ye, o koo ka dafa.

¹⁶ Isirayɛlidenw bɛɛ y'a ye ko masacɛ t'a fɛ ka mɛnni kɛ u fɛ minkɛ, u y'a fɔ a ye ko: «Mun le be anw ni Dawuda cɛ? Foyi te an ni Zese dencɛ cɛ! Isirayɛlidenw, aw ka taga aw ka soow kɔnɔ! Sisan Dawuda ka banba n'a ka soo ye!» O la, u segira ka taga u ka soow kɔnɔ.

¹⁷Isirayɛliden minw tun siginin be Zuda mara la, Orobowamu kɛra olu dama ka masacɛ ye.

¹⁸O kɔ, masacɛ Orobowamu ye Adoramu ci, ale min tun ye fasobaara kuntigi ye. Nga Isirayɛli mara mɔgɔw y'a bon ni kabakuru ye k'a faga. Masacɛ Orobowamu kɔni sera ka don a ka wotoro kɔnɔ ka boli ka taga Zeruzalɛmu.

¹⁹A kɛra ten Isirayɛliden tɔw faranna ka bɔ Dawuda ka soo la fɔɔ ka na se bii ma.

²⁰Isirayɛli mara mɔgɔw bɛɛ y'a mɛn ko Zerobowamu kɔsegira ka na. U ye ɲɔgɔnyeba kɛ ka mɔgɔ bila ka ta'a wele ka na u ka lajɛnyɔrɔ la. U y'a woloma k'a sigi masaya la Isirayɛli mara bɛɛ kunna. Zuda mara mɔgɔw dama le tugura Dawuda ka somɔgɔw kɔ.

²¹Orobowamu sera Zeruzalɛmu tuma min na, a ye Zuda mara mɔgɔw bɛɛ, ani Bɛnzamɛn kɔmɔgɔw lajɛn. U bɛɛ lajɛnnin tun ye mɔgɔ waa kɛmɛ ni bi seegi (180 000) ye, u bɛɛ cɛfari. A tun b'a fɛ ka taga Isirayɛli mara mɔgɔw kɛlɛ, ka mara nin minɛ k'a kɛ ale Solomani dencɛ Orobowamu ta ye tugu.

²²Nga Ala kuman'a ka mɔgɔ Semaya fɛ ko:

²³«A fɔ Zuda mara masacɛ ye, n'o ye Solomani dencɛ Orobowamu ye, ani Zuda mara mɔgɔw bɛɛ, ni Bɛnzamɛn kɔmɔgɔw, ani jama tɔɔ ye ko:

²⁴Masaba ko: ‹Aw man kan ka taga aw badenw, Isirayɛli mara mɔgɔw kɛlɛ. Aw kelen kelen bɛɛ ka kɔsegi aw ka soo, bari koo nin bɔra ne le la.› » U ye mɛnni kɛ Masaba ka fɔta la, u kɔsegira u ka soo ka kɛɲɛ ni Masaba ka kuma ye.

²⁵O kɔ, Zerobowamu ye Sisɛmu lalaga k'a kɛ dugu barikaman ye Efarayimu mara kuluyɔrɔ la ka sigi yen. O kɔ, a bɔra yen ka taga o ɲɔgɔn kɛ Penuyɛli.

²⁶Zerobowamu y'a fɔ a yɛrɛ kɔnɔ ko: «Masaya nin be se ka kɔsegi ka kɛ Dawuda ka somɔgɔw ta ye sisan sisan.

²⁷Ni jama nin tora ka taga sarakaw bɔ Zeruzalɛmu, Masaba ka soo kɔnɔ, u ka miiriya bena yɛlɛma ka sin u kuntigi, Zuda mara masacɛ Orobowamu ma. Ne kɔni, u bena ne faga, u be kɔsegi ka sɔn Orobowamu ma.»

²⁸ Masacɛ ye ladili ɲini ka sɔrɔ ka misiden jaa fila dilan ni sanu ye. O kɔ, a y'a fɔ jama ye ko a mɛnna, u be to ka taga Zeruzalɛmu, k'olu ka Ala le ye nin ye, min y'u bɔ Ezipiti jamana na.

²⁹A tun ye kelen bila Betɛli, ka taga kelen bila Dan.

³⁰O le kɛra u ka kojugu sababu ye. Jama y'o misiden jaa kelen makiri fɔɔ Dan.

³¹Zerobowamu tun ye batolikɛso dɔw lɔ sɔnnikɛyɔrɔw la, ka sarakalasebagaw woloma ka bɔ jama cɛma k'o sigi a yɛrɛ ma, olu ma bɔ Levi kɔmɔgɔw la.

³² A ye ɲanagwɛ dɔ sigi kalo seeginan na, kalo nin tile tan ni duurunan loon, i n'a fɔ min tun be kɛ Zuda mara la. A ye sɔnni kɛ o sɔnnikɛyɔrɔ nin na Betɛli. A tun ye misiden jaa minw dilan, a ye olu sɔn ten. A ye sɔnnikɛlaw kuntigiw sarakalasebagaw sigi Betɛli a ka sɔnnikɛyɔrɔ nunu kunna.

³³*Kalo seeginan tile tan ni duuru loon, a tun ye kalo min woloma k'a sigi a yɛrɛ sago la, a ye sɔnnikɛyɔrɔ min dilan Betɛli, a tagara o yɔrɔ la. A ye ɲanagwɛ sigi Isirayɛlidenw ye, ka sɔrɔ ka wili ka yɛlɛ sɔnnikɛyɔrɔ nin na ka wusulan jɛni.