Read dyu Masacɛw ka kitabu fɔlɔ 13 Bible Online

Masacɛw ka kitabu fɔlɔ 13 - dyu bible

Masacɛw ka kitabu fɔlɔ 13

¹Masaba kuman'a ka mɔgɔ dɔ fɛ, ale bɔra Zuda mara la ka taga Betɛli. O y'a sɔrɔ Zerobowamu tun be wusulan jɛnina sɔnnikɛyɔrɔ nin kan.

² A pɛrɛnna sɔnnikɛyɔrɔ nin kan Masaba tɔgɔ la ko: «E sɔnnikɛyɔrɔ nin, e sɔnnikɛyɔrɔ nin! Masaba y'a fɔ ko deen dɔ bena wolo Dawuda kɔmɔgɔw fɛ, u ben'a wele ko Zoziyasi. Murutigi minw be sɔnnikɛyɔrɔw la n'u be wusulan kasadiman jɛni i kan yan, ale bena olu faga i kan. U bena adamaden kolow le jɛni e kan.»

³A ye taamasiɲɛ dɔ fɔ o loon yɛrɛ la. A ko: «Masaba ye taamasiɲɛ min di, o filɛ nin ye: Ko sɔnnikɛyɔrɔ nin bena ci, bugurigwɛ min b'a kan, ale bena bɔn.»

⁴Ala ka mɔgɔ nin ye kuma min fɔ sɔnnikɛyɔrɔ nin kama Betɛli, masacɛ Zerobowamu y'o mɛn tuma min na, k'a to sɔnnikɛyɔrɔ nin gɛrɛfɛ, a y'a bolo sin a ma k'a fɔ ko: «Aw k'a minɛ!» A bolo nin jara ka to sanfɛ, a ma se k'a jigi.

⁵Sɔnnikɛyɔrɔ nin fana cira, bugurigwɛ min tun b'a kan, ale bɔnna, ka kɛɲɛ ni taamasiɲɛ ye Ala ka mɔgɔ nin tun ye min fɔ Masaba fɔcogo la.

⁶Masacɛ y'a fɔ a ye ko: «Masaba i ka Ala daali ne ye, a daali janko ne bolo ka jigi.» A ye Masaba daali, masacɛ sera k'a bolo jigi, a bolo nin kɛr'a cogokɔrɔ la.

⁷O kɔ, masacɛ y'a fɔ Ala ka mɔgɔ nin ye ko: «Na an be taga soo ka dumuni kɛ. Ne bena i boɲa ni fɛɛn dɔ ye.»

⁸Ala ka mɔgɔ nin y'a fɔ a ye ko: «Hali n'i ye i ka nafolo tilancɛ le di ne ma, ne tena taga i ka soo, ne tena dumuni kɛ i fɛ, ne tena jii yɛrɛ min e fɛ yan.

⁹Bari, Masaba le y'a fɔ ne ye ko ne kana dumuni kɛ, n kana jii yɛrɛ min, ko ne nana ni sira min ye, ne kana segi n'o sira kelen ye.»

¹⁰O kɔ, a ye sira wɛrɛ ta. A tun nana ni sira min ye Betɛli, a ma sɔn k'o minɛ tugu.

¹¹O waati la, kira cɛkɔrɔba dɔ tun be Betɛli. Ala ka mɔgɔ nin ye koo minw bɛɛ kɛ Betɛli o loon na, ani ka kuma minw fɔ masacɛ ye, kira cɛkɔrɔba nin deenw tagara o lakali a ye.

¹²Facɛman y'u ɲininga ko a tagara ni sira jumɛn ye. A deen nunu ye Ala ka mɔgɔ nin taasira fɔ a ye.

¹³Facɛman y'a fɔ a deenw ye k'u k'ale ka fali labɛn. U y'a labɛn, a yɛlɛl'a kan.

¹⁴A tugura Ala ka mɔgɔ nin kɔ, ka ta'a siginin sɔrɔ yiriba dɔ kɔrɔ. A y'a ɲininga ko: «E le ye Ala ka mɔgɔ ye, min bɔra Zuda mara la ka na wa?» A y'a jaabi ko ɔnhɔn.

¹⁵O kɔ, a y'a fɔ a ye ko a ka na u be taga soo, a be taga dumuni kɛ.

¹⁶Ala ka mɔgɔ nin y'a jaabi ko: «Ne te se ka kɔsegi n'i ye i ka soo. Ne tena dumuni kɛ, ne tena jii min yan.

¹⁷Bari, Masaba y'a fɔ ne ye ko n kana dumuni kɛ, n kana jii yɛrɛ min yan, ko ne nana ni sira min ye, ne kana segi n'o sira kelen ye.»

¹⁸Kira cɛkɔrɔba nin y'a fɔ a ye ko: «Ne fana ye kira ye i n'a fɔ ele. Masaba ye mɛlɛkɛ dɔ ci ne fɛ, ko ne ka taga e minɛ ka segi n'i ye soo, i ka na dumuni kɛ ka jii min.» Ka sɔrɔ a tun be galon tigɛr'a ye le.

¹⁹O la, Ala ka mɔgɔ nin tugur'a kɔ ka na soo, ka dumuni kɛ ka jii min.

²⁰Kira cɛkɔrɔba min tun ye dɔ nin kɔsegi, Masaba kumana ale fɛ k'u to dumuni na.

²¹A wilila ka pɛrɛn Ala ka mɔgɔ nin kan, min tun bɔra Zuda mara la ka na, k'a fɔ ko: «Masaba y'a fɔ ko: E ma sɔn k'ale ka kuma bato. Ko ale Masaba e ka Ala ye min fɔ i ye, i m'o kɛ.

²²Ko a tun ko i kana sɔn ka dumuni kɛ, i kana jii min yɔrɔ min na, e sɔnna ka kɔsegi ka na dumuni kɛ ka jii min o yɔrɔ la. K'o la, e suu tena don e faaw ka kaburu kɔnɔ tugu.»

²³Ala ka mɔgɔ nin ye dumuni kɛ, ani ka jii min ka ban tuma min na, kira nin y'a ka fali labɛn k'a d'a ma.

²⁴A ye sira minɛ ka taga. A tagara jara kunbɛn sira kan, ale y'a faga. A suu tun lanin be sira kan, fali ni jara lɔra suu nin gɛrɛfɛ.

²⁵Sira kan tɛmɛbaga dɔw ye suu nin ye, jara lɔnin b'a gɛrɛfɛ. Olu tagara o lakali kira cɛkɔrɔba nin ka dugu kɔnɔ.

²⁶Kira min tun tagara Ala ka mɔgɔ nin kɔsegi ka na n'a ye, ale y'o mɛn tuma min na, a y'a fɔ ko Ala ka mɔgɔ lo, min ma sɔn ka Masaba ka kuma bato. K'o la, Masaba y'a to jara y'a minɛ k'a faga ka kɛɲɛ n'a ka fɔta ye.

²⁷O kɔ, a y'a fɔ a deenw ye k'u ka fali labɛn ale ye. U y'a labɛn.

²⁸A bɔra ka taga suu nin lanin sɔrɔ sira kan, fali ni jara lɔnin b'a gɛrɛfɛ. Jara tun ma suu nin ɲimi, a fana tun ma foyi kɛ fali la.

²⁹Kira cɛkɔrɔba nin ye Ala ka mɔgɔ nin suu ta k'a la fali kan, ka kɔsegi ka na n'a ye dugu kɔnɔ janko k'a suu don, ani k'a sanga kɛ.

³⁰A y'a suu don a yɛrɛ ka kaburu kɔnɔ. O kɔ, u kasira ka to k'a fɔ ko: «Ee, n baden!»

³¹U y'a suu don ka ban tuma min na, a y'a fɔ a deenw ye ko: «Ni ne sara loon min na, aw ka ne suu don Ala ka mɔgɔ nin ka kaburu kɔnɔ, ka n kolow jɛn k'o la n'a ta ye.

³²Bari a ye Masaba ka kuma minw fɔ Betɛli sɔnnikɛyɔrɔ kama, ani Samari mara sɔnnikɛyɔrɔw batolikɛsow bɛɛ kama, o bena kɛ, siga t'a la.»

³³O kɛnin kɔ, halibi Zerobowamu m'a ka kojugu dabila. A tagara ɲa ka murutigi dɔw woloma ka bɔ jama cɛma k'o sigi sɔnnikɛyɔrɔw kunna. Mɔgɔ o mɔgɔ tun y'a yɛrɛ yira k'o baara ka d'a ye, a ye olu bɛɛ kɛ murutigiw ye sɔnnikɛyɔrɔw kunna.

³⁴Zerobowamu ka soo ka kojugu ye nin ye. O le kama, a ka soo nin halakira pewu ka bɔ dugukolo kan.