Read dyu Masacɛw ka kitabu fɔlɔ 14 Bible Online

Masacɛw ka kitabu fɔlɔ 14 - dyu bible

Masacɛw ka kitabu fɔlɔ 14

¹O waati la fana, Zerobowamu dencɛ Abiya banana.

²Zerobowamu y'a fɔ a muso ye ko: «Wili k'i yɛrɛ kɛ i n'a fɔ mɔgɔ wɛrɛ ka muso, janko mɔgɔ si kan'i lɔn. I ka taga Silo. Kira Aya b'o yɔrɔ la, ale lo tun y'a fɔ ne ye ko ne bena kɛ masacɛ ye Isirayɛli mara kunna.

³Burukun tan ni ŋɔmiw ta, ani lidaga, ka ta'a fɛ. Deen nin bena kɛ cogo min na, a bena o fɔ i ye.»

⁴Zerobowamu muso wilila ka taga Silo, Aya fɛ. O y'a sɔrɔ Aya tun kɔrɔla, a tun te se ka yeli kɛ tugu.

⁵Masaba tun y'a fɔ Aya ye ko Zerobowamu muso bena na a fɛ k'a ɲininga a dencɛ ka koo la, bari a man kɛnɛ. Ko n'a sera, a ka nin ni nin fɔ a ye. Ko n'a nana se tuma min na, a ben'a yɛrɛ kɛ i n'a fɔ mɔgɔ wɛrɛ.

⁶A sera soda la, Aya y'a seen mankan mɛn dɔrɔn, a y'a fɔ a ye ko: «Don, Zerobowamu muso. Mun na i b'a fɛ k'i yɛrɛ dogo ka kɛ i n'a fɔ mɔgɔ wɛrɛ? Koo gwɛlɛman be yen k'a fɔ i ye.

⁷Ta'a fɔ Zerobowamu ye ko Masaba, Isirayɛli ka Ala y'a fɔ ko ale lo y'a woloma jama nin cɛma k'a kɛ kuntigi ye ale ka jama Isirayɛli kunna.

⁸Ko ale tun ye masaya minɛ Dawuda ka somɔgɔw fɛ k'a d'a ma. Ko nga a ma sɔn ka kɛ i n'a fɔ ale ka baarakɛla Dawuda, min tun be ale ka kuma bato, k'a jigi la ale kan, k'ale sago kɛ dɔrɔn.

⁹Ko mɔgɔ minw kɔnn'a ɲa, a ye kojugu kɛ ka tɛmɛ olu bɛɛ kan. Ko a ye batofɛn wɛrɛw dilan a yɛrɛ ye, a ye nigɛ kɛ ka joow dilan janko k'ale dimi. Ko a ye ale bila kɔfɛ.

¹⁰ K'ole y'a to, ale bena bɔnɛ lase a ka soo ma. Ko ale ben'a ka cɛdenw bɛɛ halaki Isirayɛlidenw cɛma, jɔɔn fara hɔrɔnw kan. Ko ale ben'a ka soo furan i n'a fɔ u be ɲamaɲama furan cogo min na fɔɔ k'a kɛ a be tunu pewu.

¹¹Ko a ka somɔgɔ min mana sa dugu kɔnɔ, wuluw le ben'a ɲimi. Min mana sa kongo kɔnɔ, kɔnɔw bena o dumu. Ko ale Masaba le ko ten!»

¹²O kɔ, Aya y'a fɔ muso nin ye ko: «Wili ka taga soo. I dontɔ dugu kɔnɔ dɔrɔn, deen nin bena sa.

¹³Isirayɛlidenw bɛɛ bena o deen nin saya kasi kɛ. O kɔ, u ben'a suu don. Ale deen nin kelen le suu bena sɔrɔ ka don Zerobowamu ka somɔgɔw cɛma, bari ale kelen dama le be yen min ye mɔgɔɲuman ye Masaba, Isirayɛli ka Ala ɲakɔrɔ u cɛma.

¹⁴Masaba bena mɔgɔ dɔ wɛrɛ kɛ masa ye Isirayɛlidenw kunna. Ale bena Zerobowamu ka somɔgɔw halaki. O le te kɛra ka ban wa?

¹⁵Masaba bena Isirayɛlidenw lamaga fɔɔ k'a kɛ i n'a fɔ jii be kala lamaga cogo min na. A bena u wili ka bɔ jamanaɲuman nin kɔnɔ, a tun ye min di u bɛmaw ma, k'u jɛnsɛn ka taga Efarati baji kɔfɛ. Bari u ye *Asera jaaw dilan ka Masaba dimi.

¹⁶A bena u don u juguw bolo Zerobowamu ka kojuguw kosɔn, ani Isirayɛli mara mɔgɔw ye kojugu minw kɛ ale sababu la.»

¹⁷Zerobowamu muso wilila ka taga. A tagara se Tirisa. A dontɔ soo dɔrɔn, deen nin sara.

¹⁸U y'a suu don, Isirayɛlidenw bɛɛ y'a ka saya kasi kɛ, i ko Masaba tun y'a fɔ a ka baarakɛla kira Aya ye cogo min na.

¹⁹Zerobowamu ka kɛwali tɔw, n'a ye kɛlɛ minw kɛ, n'a ka masayako, olu be sɔrɔ Isirayɛli mara masaw ka loon o loon kibaru sɛbɛ kɔnɔ.

²⁰Zerobowamu ye saan mugan ni fila kɛ masaya la. O kɔ, a sara. A deen Nadabu sigir'a nɔɔ na masaya la.

²¹Solomani dencɛ Orobowamu tun kɛra Zuda mara masacɛ ye. Yanni a ka kɛ masacɛ ye, a sii tun sera saan bi naani ni kelen ma. A ye saan tan ni wolonwula kɛ masaya la Zeruzalɛmu, Masaba tun ye dugu min woloma Isirayɛlidenw kɔmɔgɔw ka duguw cɛma, k'a tɔgɔ la a kan. A bamuso tɔgɔ tun ko Naama, amoni tun lo.

²²Zuda mara mɔgɔw ye kojugu kɛ Masaba ɲakɔrɔ. U ye kojugu minw kɛ, o le ye Masaba dimi ka tɛmɛ u faaw ta kan.

²³ U ye sɔnnikɛyɔrɔw lɔ fana, ka jokabakuruw lɔ, ka *Asera jaaw tutu kulujanjanw bɛɛ kan, ani yiribabaw bɛɛ kɔrɔ.

²⁴ Landa kakalayakɛbagaw yɛrɛ tun be sɔrɔ jamana nin kɔnɔ. Masaba tun ye siya minw gwɛn ka bɔ Isirayɛlidenw ɲafɛ, u tun be olu ka landajuguw bɛɛ kɛ.

²⁵Orobowamu ka masaya saan duurunan na, Ezipiti masacɛ Sisaki wilila ka na Zeruzalɛmu kɛlɛ.

²⁶ A ye Masaba ka soo kɔnɔ nafolo bɛɛ, ani masacɛ ka soo kɔnɔ nafolo bɛɛ cɛ. Solomani tun ye nigɛkunbɛnnan minw dilan ni sanu ye, a ye olu bɛɛ ta fana.

²⁷O la, masacɛ Orobowamu ye dɔ wɛrɛw dilan ni zira ye, k'o di a ka daa kɔlɔsibagaw kuntigiw ma.

²⁸Ni masacɛ tun be bɔ ka taga Masaba ka soo tuma o tuma, kɔlɔsibaga nunu tun be to k'o ta. O kɔ, u tun be to ka kɔsegi ka na u bila u ka soo.

²⁹Orobowamu ka kɛwali tɔw, n'a ka baara bɛɛ, o be sɔrɔ Zuda mara masaw ka loon o loon kibaru sɛbɛ kɔnɔ.

³⁰Kɛlɛ tun be Orobowamu ni Zerobowamu cɛ tuma bɛɛ.

³¹O kɔ, Orobowamu sara, u y'a suu don a faaw ka kaburu kɔnɔ Dawuda ka ciin kɔnɔ. A bamuso tɔgɔ tun ko Naama, amoni tun lo. O kɔ, a dencɛ Abiyamu sigir'a nɔɔ na masaya la.