Read dyu Masacɛw ka kitabu fɔlɔ 16 Bible Online

Masacɛw ka kitabu fɔlɔ 16 - dyu bible

Masacɛw ka kitabu fɔlɔ 16

¹Masaba kumana Anani dencɛ Zewu fɛ ko a k'a fɔ Bayesa ye ko:

²«Ele Bayesa tun te foyi ye. Ne y'i kɔrɔta k'i kɛ n ka jama Isirayɛli kuntigi ye. Nga e ye Zerobowamu ka kɛwaliw ɲɔgɔn kɛ, ka ne ka jama Isirayɛli bila hakɛ la, ka ne dimi.

³O la, ne bena ele Bayesa n'i ka soo halaki, k'i ka soo kɛ i n'a fɔ Nebati dencɛ Zerobowamu ta.

⁴E Bayesa ka somɔgɔ min mana sa dugu kɔnɔ, wuluw le ben'a ɲimi. Min mana sa kongo kɔnɔ, kɔnɔw bena o dumu.»

⁵Bayesa ka kɛwali tɔw, n'a ka baara, n'a ka cɛfariyakow, o be sɔrɔ Isirayɛli mara masaw ka loon o loon kibaru sɛbɛ kɔnɔ.

⁶Bayesa sara, u y'a suu don Tirisa. O kɔ, a dencɛ Ela sigir'a nɔɔ na masaya la.

⁷Anani dencɛ kira Zewu ye Masaba ka kuma fɔ Bayesa n'a ka somɔgɔw ye, bari a tun ye kojugu kɛ Masaba ɲakɔrɔ, ka Masaba dimi a ka kɛwaliw kosɔn, ani a y'a yɛrɛ kɛ i n'a fɔ Zerobowamu n'a ka somɔgɔw. O dama tɛ, a ye Zerobowamu ka soo halaki fana.

⁸Zuda mara masacɛ Aza ka masaya saan mugan ni wɔɔrɔnan na, Bayesa dencɛ Ela kɛra masa ye Isirayɛli mara kunna. A tun sigira masaya la Tirisa dugu kɔnɔ saan fila.

⁹A ka dakɔrɔsigi Zimuri, min tun y'a ka kɛlɛkɛwotorow tilancɛ kuntigi ye, ale bɛnna ni mɔgɔ dɔw ye ka wili a kama. O y'a sɔrɔ ale Ela tun be Tirisa n'a be minnibaba kɛra, masacɛ ka soo kuntigi Arisa ka soo.

¹⁰Zimuri donna soo nin kɔnɔ k'a faga, o kɛra Zuda mara masacɛ Aza ka masaya saan mugan ni wolonwulanan na. O kɔ, Zimuri sigir'a nɔɔ na.

¹¹Ale sera ka sigi ka kɛ masacɛ ye tuma min na dɔrɔn, a ye Bayesa ka somɔgɔw bɛɛ halaki. A ma cɛden si to, hali a fadenw, n'a teriw, a m'u si to.

¹²Zimuri ye Bayesa ka somɔgɔw bɛɛ halaki, ka kɛɲɛ ni Masaba ka kuma ye a tun ye min fɔ kira Zewu barika la, Bayesa kosɔn.

¹³Bari Bayesa n'a dencɛ Ela tun ye kojugu caaman kɛ, ka Isirayɛlidenw bila o la fana. U tun ye joow dilan, fɛɛn kuntan nunu, o ye Masaba, Isirayɛli ka Ala dimi.

¹⁴Ela ka kɛwali tɔw, n'a ka baara bɛɛ, o be sɔrɔ Isirayɛli mara masaw ka loon o loon kibaru sɛbɛ kɔnɔ.

¹⁵Zuda mara masacɛ Aza ka masaya saan mugan ni wolonwulanan na, Zimuri kɛra masa ye Tirisa tile wolonwula kɔnɔ. O y'a sɔrɔ, kɛlɛdenw tun tagara sigi ka Gibetɔn dugu datugu, min ye filisiw ka dugu dɔ ye.

¹⁶Isirayɛliden minw tun be kongo kɔnɔ, olu y'a mɛn tuma min na ko Zimuri tun ye janfa siri ka masacɛ faga, o loon kelen na u ye ɲɔgɔnye kɛ k'u to u sigiyɔrɔ la ka kɛlɛkuntigi Omuri woloma k'a kɛ masacɛ ye.

¹⁷Omuri ni jama bɛɛ wilila ka bɔ Gibetɔn ka na Tirisa datugu.

¹⁸Zimuri y'a ye ko dugu minɛna minkɛ, a wilila ka don masaso boon dɔ kɔnɔ, ka soo nin jɛni n'ale yɛrɛ ye. A sara

¹⁹a yɛrɛ ka kojugu le kosɔn, a tun ye minw kɛ Masaba ɲakɔrɔ. A tun tugura Zerobowamu kɔ k'a ka hakɛ ɲɔgɔn kɛ, min tun ye Isirayɛlidenw bila hakɛ la.

²⁰Zimuri ka kɛwali tɔw, n'a ka janfako, o be sɔrɔ Isirayɛli mara masaw ka loon o loon kibaru sɛbɛ kɔnɔ.

²¹Isirayɛli jama faranna ka kɛ jɛnkulu fila ye. Kelen tugura Ginati dencɛ Tibini kɔ k'ale kɛ masa ye, tɔ kelen nin fana tugura Omuri kɔ.

²²Minw tun tugura Omuri kɔ, olu sera Ginati dencɛ Tibini taw kɔrɔ. Tibini sara, Omuri sigira masaya la.

²³Zuda mara masacɛ Aza ka masaya saan bi saba ni kelennan na, Omuri kɛra masacɛ ye Isirayɛli mara kunna. A ye saan tan ni fila kɛ masaya la. A ye saan nunu tilancɛ kɛ Tirisa.

²⁴O kɔ, a ye Samari kulu san Sɛmɛri fɛ warigwɛ kuru waa wɔɔrɔ la. A ye dugu sigi o kulu nin kan k'a tɔgɔ la ko Samari, o ye kulutigi kɔrɔman Sɛmɛri tɔgɔ ye.

²⁵Masacɛ minw tɛmɛna Omuri ɲa, a ye hakɛ kɛ Masaba ɲakɔrɔ ka tɛmɛ olu bɛɛ kan.

²⁶A tugura Nebati dencɛ Zerobowamu kɔ k'a ka hakɛ bɛɛ ɲɔgɔn kɛ, min tun ye Isirayɛlidenw bila hakɛ la. O n'u ka josɔnko ye Masaba, Isirayɛli ka Ala dimi.

²⁷Omuri ka kɛwali tɔw, n'a ka baara, n'a ka cɛfariyakow, o be sɔrɔ Isirayɛli mara masaw ka loon o loon kibaru sɛbɛ kɔnɔ.

²⁸Omuri sara, u y'a suu don Samari. O kɔ, a deen Akabu sigir'a nɔɔ na masaya la.

²⁹Zuda mara masacɛ Aza ka masaya saan bi saba ni seeginan na, Omuri dencɛ Akabu sigira masaya la Isirayɛli mara kunna. A ye saan mugan ni fila kɛ masaya la Isirayɛli mara kunna Samari.

³⁰Masacɛ minw tɛmɛna Omuri dencɛ Akabu ɲa, a ye kojugu kɛ Masaba ɲakɔrɔ ka tɛmɛ olu bɛɛ kan.

³¹Nebati dencɛ Zerobowamu ka hakɛw tun ka dɔgɔ a ɲana. A wilila ka taga Sidɔnkaw ka masacɛ Ɛtibaali denmuso Zezabɛli furu, ani k'a daminɛ ka *Baali boɲa k'a sɔn.

³²A ye soo dɔ lɔ Samari, Baali tɔgɔ la, ka Baali sɔnyɔrɔ sigi o kɔnɔ.

³³A fana ye *Asera jaa dilan. Isirayɛli mara masacɛ minw tɛmɛna a ɲa, Akabu ye kojugu kɛ ka tɛmɛ olu bɛɛ kan, ka Masaba, Isirayɛli ka Ala dimi.

³⁴ Ale Akabu ka waati la, Betɛlika Iyɛli ye Zeriko dugu lalaga k'a lɔ. A tun b'a juu sigira tuma min na, a y'a denkɔrɔba fɔlɔ Abiramu le kɛ saraka ye fɔlɔ. Loon min na u ye koonw don dugu dondaw la, a y'a dencɛ laban Segubu le kɛ saraka ye. O kɛra ka kɛɲɛ ni Masaba ka fɔta ye Zozuwe ye.