Read dyu Masacɛw ka kitabu fɔlɔ 17 Bible Online

Masacɛw ka kitabu fɔlɔ 17 - dyu bible

Masacɛw ka kitabu fɔlɔ 17

¹ Tisibika Eli ka bɔ Galaadi mara la, ale y'a fɔ Akabu ye ko: «Masaba, Isirayɛli ka Ala kosɔn, ne kɛra ale min ka baarakɛla ye, sanji tena ben dugukolo kan saan nata nunu kɔnɔ, komiji fana tena kɛ fɔɔ ni ne kumana tugu.»

²O tuma na, Masaba y'a fɔ Eli ye ko:

³«Bɔ yan k'i ɲaa sin kɔrɔn fɛ, ka taga dogo Keriti kɔɔ daa la, Zurudɛn baji kɔfɛ.

⁴I bena to ka jii min o kɔɔ la. Ne y'a ɲini kaankaanw fɛ, k'olu ka janto i ka baloko la yen.»

⁵Masaba y'a fɔ a ye cogo min na, a y'a kɛ ten. A tagara sigi Keriti kɔɔ daa la, Zurudɛn baji kɔfɛ.

⁶Kaankaan nunu tora ka na ni dumuni, ani sogo ye k'o d'a ma sɔgɔma ni wulafɛ. A tun be to ka jii min kɔɔ nin na.

⁷Nga waati dɔ nana se, kɔɔ nin fana jara, bari sanji tun ma ben jamana nin kɔnɔ fewu.

⁸O tuma na, Masaba y'a fɔ Eli ye ko:

⁹ «Wili ka taga Sarɛpita, Sidɔn gɛrɛfɛ, ka to o yɔrɔ la. Ne y'a ɲini firiyamuso dɔ fɛ o yɔrɔ la, ko a k'a janto i ka baloko la.»

¹⁰A wilila ka taga Sarɛpita. A sera dugu donda la tuma min na, a ye firiyamuso dɔ ye o yɔrɔ la n'a be lɔgɔ ɲinina. A ye muso wele, k'a fɔ a ye ko: «N b'i daali, taga jii dɔɔni bɔ jidaga kɔnɔ ka n'a di n ma n b'a min.»

¹¹Muso nin tɛmɛna ko a be taga jii nin bɔyɔrɔ la. A y'a wele tugu k'a fɔ ko: «N'i be na, i be ɲa ne ma ni dumuni fana ye.»

¹²Muso nin y'a jaabi ko: «Masaba e ka Ala ɲaa be ne la. Dumunifɛn si te ne fɛ fɔɔ tigɛ ɲaa kelen mugu dɔrɔn, o be fiyɛ kɔnɔ, ani tulu dɔɔni be tuludaga kɔnɔ. Ne be lɔgɔ deen fila le ɲini ka taga o tobi, ne ni n deen b'o dumu, ka sɔrɔ ka sa.»

¹³Eli y'a fɔ a ye ko: «Kana siran, i y'a fɔ cogo min na, ta'a kɛ ten. Nga i ka kɔn ka ŋɔmi deen kelen yiran ne ye fɔlɔ, ka na o di ne ma, o kɔ, i be dɔ dilan e n'i deen ye.

¹⁴Bari Masaba, Isirayɛli ka Ala ko: ‹Mugu tena ban fiyɛ kɔnɔ, tulu fana tena ban tuludaga kɔnɔ, fɔɔ ka taga se sanji benlon ma dugukolo kan Masaba fɛ.› »

¹⁵Eli y'a fɔ a ye cogo min na, muso nin tagar'a kɛ ten. A kɛra ten, muso nin ye dumuni sɔrɔ waati caaman kɔnɔ, ale n'a dencɛ ani Eli.

¹⁶Mugu min tun be fiyɛ kɔnɔ, ale ma ban fewu, tulu fana ma ban tuludaga kɔnɔ, i ko Masaba tun y'a fɔ cogo min na Eli barika la.

¹⁷O koow tɛmɛnin kɔ, jatigimuso deen banana. A ka bana juguyara kosɔbɛ, a sara.

¹⁸O la, muso nin y'a fɔ Eli ye ko: «Mun le be ne n'i cɛ, Ala ka mɔgɔ? I nana ne fɛ janko ka na ne ka juguya yira kɛ, ka ne deen faga?»

¹⁹Eli y'a fɔ a ye ko a ka deen nin di ale ma. Eli ye deen nin minɛ muso nin fɛ ka yɛlɛ n'a ye sangaso kɔnɔ a ka layɔrɔ la, k'a la a yɛrɛ ka dilan kan.

²⁰O kɔ, a ye Masaba daali ko: «Masaba ne ka Ala, muso min ye ne ladon, i be sɔn k'a deen bɔsi a la k'a dusu kasi wa?»

²¹ A birila deen nin suu kan siɲɛ saba, ka Masaba daali ko: «Masaba ne ka Ala, sabali ka sɔn deen nin ka kunun!»

²²Masaba ye Eli ka daalikan mɛn. A ye deen nin kunun, a kɔsegira ka kɛ mɔgɔ ɲanaman ye.

²³Eli ye deen nin ta ka jigi duguma, boon kɔnɔ ka n'a di a bamuso ma, k'a fɔ ko: «E deen filɛ, a be nii na!»

²⁴O la, muso nin y'a fɔ Eli ye ko ale kɔni y'a lɔn sisan ko a kɛra Ala ka mɔgɔ ye, ani ko a be Masaba ka kuma min fɔ, k'o ye tiɲɛ ye.