Read dyu Masacɛw ka kitabu fɔlɔ 18 Bible Online

Masacɛw ka kitabu fɔlɔ 18 - dyu bible

Masacɛw ka kitabu fɔlɔ 18

¹Waati caaman tɛmɛna, Masaba kumana Eli fɛ jaa saan sabanan na k'a fɔ ko a ka ta'a yɛrɛ yira Akabu la, ko ale ben'a to sanji be ben dugukolo kan.

²Eli wilila ka taga ko a b'a yɛrɛ yira Akabu la. O y'a sɔrɔ kongo tun juguyara Samari.

³Akabu tun y'a ka soo kɔnɔ kuntigi Obadiyawu wele. O y'a sɔrɔ Obadiyawu tun be siran Masaba ɲa kosɔbɛ.

⁴Tuma min na Zezabɛli tun b'a la ka Masaba ka kiraw halaki k'o ban, Obadiyawu tun ye kira mɔgɔ kɛmɛ minɛ ka taga u dogo kuluwo dɔw kɔnɔ mɔgɔ bi duuru duuru. A tun be to ka dumuni, ani jii d'u ma.

⁵Akabu y'a fɔ Obadiyawu ye ko: «An ka taga jamana kɔnɔ ka jii bɔyɔrɔw ani kɔɔw ɲini. N'a sɔrɔ an bena binkɛnɛ ye o yɔrɔw dɔ la. O la, an bena se k'an ka soow ni sofaliw balo, an tena sɔrɔ k'u dɔw faga.»

⁶U ye jamana nin tilan ɲɔgɔn cɛ janko ka ta'a yaala. Akabu tagar'a kelen faan dɔ la, Obadiyawu tagar'a kelen faan dɔ wɛrɛ la.

⁷Ka Obadiyawu to sira kan, a tagara bɛɛn ni Eli ye. Obadiyawu y'a lɔn. A y'a ɲaa biri duguma k'a fɔ ko: «Ele yɛrɛ lo wa, ne matigi Eli?»

⁸Eli y'a jaabi ko: «Ne lo, ta'a fɔ i kuntigi ye ko i ye ne Eli ye.»

⁹Obadiyawu y'a fɔ Eli ye ko: «Ne ye kojugu jumɛn le kɛ, n'i b'a fɛ ka ne, i ka baarakɛla don Akabu bolo a be ne faga?

¹⁰Masaba i ka Ala kosɔn, a jamana te yen ni ne ka masacɛ ma mɔgɔ bila ka taga i yɔrɔ ɲini min kɔnɔ. N'o yɔrɔ mɔgɔw y'a fɔ ko i te o yɔrɔ la, a b'u wajibiya ka kali ko u ma i ye.

¹¹Sisan e b'a fɔ ko ne ka ta'a fɔ n kuntigi ye ko ne ye ele ye.

¹²Ne taanin kɔ dɔrɔn, Masaba ka Nii bena i ta ka taga n'i ye yɔrɔ wɛrɛ ne tena min lɔn. Ni ne tagar'a fɔ Akabu ye ka ban tuma min na, a bena na, n'a ma i sɔrɔ yan, a bena ne faga. Ne, i ka baarakɛla do be siran Masaba ɲa kabini ne denmisɛntuma na.

¹³Zezabɛli tun be Masaba ka kiraw fagara tuma min na, ne y'u kɛmɛ dogo kuluwow kɔnɔ bi duuru duuru, ka to ka dumuni, ani jii d'u ma yen. E m'o mɛn wa, ne kuntigi?

¹⁴Sisan i b'a fɔ ne ye ko n ka ta'a fɔ n kuntigi ye ko ne ye ele ye. A bena n faga do!»

¹⁵Nga Eli y'a jaabi ko: «Ne be baara kɛra Setigi, Masaba min ye, ale kosɔn, ne Eli yɛrɛ bena n yɛrɛ yira Akabu la bii.»

¹⁶Obadiyawu tagara Akabu fɛ k'o koo ɲafɔ a ye. Akabu tɛmɛna ka taga Eli fɛ.

¹⁷A y'a ye dɔrɔn, a y'a fɔ a ye ko: «Isirayɛlidenw sɛgɛnbaga, ele yɛrɛ lo wa?»

¹⁸Eli y'a jaabi ko: «Ne kɔni te u sɛgɛnbaga ye dɛ, ele Akabu yɛrɛ n'i fadenw le b'u sigɛnna. Bari, aw banna ka Masaba ka sariya bato, ka wili ka taga *Baali sɔn yɔrɔ caaman na.

¹⁹Sisan, i ka Isirayɛlidenw bɛɛ lajɛn ne Eli gɛrɛfɛ, Karimɛli kulu kan, ni Baali ka kira mɔgɔ kɛmɛ naani ni bi duuru nunu, ani *Asera ka kira kɛmɛ naani minw be dumuni kɛ Zezabɛli fɛ.»

²⁰Akabu ye mɔgɔw bila ka taga Isirayɛlidenw bɛɛ fɛ. A ye kira nunu lajɛn Karimɛli kulu kan.

²¹Eli tagara lɔ jama bɛɛ ɲa k'a fɔ u ye ko: «Aw nɔrɔnin bena to faan fila la fɔɔ ka taga se waati jumɛn ma? N'a kɛra ko Masaba le ye Ala ye, aw ka tugu ale kɔ. N'a kɛra ko *Baali lo fana, aw ka tugu ale kɔ.» Jama ma foyi fɔ.

²²A y'a fɔ jama ye tugu ko: «Ne kelen le tora Masaba ka kira nunu na, Baali ka kiraw ye mɔgɔ kɛmɛ naani ni bi duuru ye.

²³U ka na ni tura fila ye. Baali ka kira nunu ka kelen minɛ, k'a faga k'a tigɛtigɛ k'a la lɔgɔ kan, u kana tasuma don a la. Ne bena tɔɔ kelen minɛ k'a kɛ ten, k'a la lɔgɔ kan. Ne fana tena tasuma don a la.

²⁴O kɔ, u k'u ka joo daali, ne fana bena Masaba daali. Ni min ye tasuma mana, o le ye Ala ye.» Jama bɛɛ y'a fɔ k'u sɔnna.

²⁵Eli y'a fɔ Baali ka kira nunu ye ko: «Aw ka kɔn ka tura kelen minɛ k'a labɛn, bari aw ka ca. Aw k'aw ka joo daali. Aw kana tasuma don.»

²⁶U ye tura nin minɛ k'a labɛn. U y'a daminɛ ka to ka Baali daali k'a ta sɔgɔma fɔɔ tilegwanfɛ. U tun be to k'a fɔ ko: «Baali, an jaabi!» Nga kuma ma mɛn, jaabili ma sɔrɔ. U tun ye sɔnnikɛyɔrɔ min lɔ, u tora ka panpan o ɲafɛ.

²⁷Tilegwanfɛ, Eli y'a daminɛ ka yɛlɛ u la. A tun b'a fɔra ko: «Aw ye pɛrɛn kosɔbɛ! Batofɛn lo, n'a sɔrɔ a be koo dɔ la, walima a degunnin lo, walima a tagara yaalayɔrɔ la. N'a sɔrɔ a be sinɔgɔ la, a bena kunun.»

²⁸U tora ka pɛrɛn kosɔbɛ, ka to k'u yɛrɛ tigɛtigɛ ni murujanjanw, ani tamanw ye ka kɛɲɛ n'u ka landa ye fɔɔ joli tora ka woyo u fari kan.

²⁹Tile sumana tuma min na, u tora k'u ka kiraya kɛ fɔɔ ka taga se wulafɛ saraka bɔwaati ma. Kuma ma mɛn, jaabili ma sɔrɔ, taamasiɲɛ ma ye min b'a yira ko fɛɛn dɔ bena kɛ.

³⁰O la, Eli y'a fɔ jama bɛɛ ye ko u ka gwɛrɛ ale la, jama gwɛrɛla. U tun ye Masaba ka sarakabɔyɔrɔ min ci, Eli y'o lalaga ka lɔ.

³¹ A ye kabakuru deen tan ni fila ta ka kɛɲɛ ni Yakuba deen tan ni fila nunu daa ye, Masaba tun y'a fɔ ale min ma ko: «Isirayɛli le bena kɛ i tɔgɔ ye.»

³²A y'o kabakuru nunu kɛ ka sarakabɔyɔrɔ lɔ Masaba ye. A ye dingɛ sogi k'a lamini, litiri bi saba be don min na.

³³A ye lɔgɔ labɛn, ka tura nin tigɛtigɛ k'a la lɔgɔ nunu kan.

³⁴O kɔ, a y'a fɔ ko u ka na ni daga ɲaa naani jii ye k'o bɔn saraka nin, ani lɔgɔ kan. A y'a fɔ ko u k'o ɲɔgɔn kɛ siɲɛ filanan na, u y'a kɛ. A ko u ka sabanan kɛ, u y'o kɛ.

³⁵Jii tora ka woyo sarakabɔyɔrɔ gɛrɛfɛ, dingɛ nin tun fara.

³⁶Wulafɛ saraka bɔtuma, kira Eli gwɛrɛla k'a fɔ ko: «Masaba, Ibrayima, ni Isiyaka, ani Isirayɛli ka Ala, a to u k'a lɔn bii ko e le ye Isirayɛli ka Ala ye, ani fana ko ne ye i ka baarakɛla ye, ani ne y'o koo nunu bɛɛ kɛ e yɛrɛ ka kuma le kosɔn.

³⁷Ne jaabi Masaba, i ka ne jaabi janko jama nin ka se k'a lɔn ko ele Masaba le ye Ala ye, ani ko ele le b'a kɛ u be segi k'u jigi la i kan.»

³⁸Tasuma bɔra Masaba fɛ ka na ben ka saraka nin jɛni, ani lɔgɔ, ni kabakuruw, ani dugukolo, ani ka dingɛ nin kɔnɔ jii ja.

³⁹Jama bɛɛ y'o ye tuma min na, u y'u ɲaa biri duguma k'a fɔ ko: «Masaba le ye Ala ye! Masaba le ye Ala ye!»

⁴⁰O kɔ, Eli y'a fɔ u ye ko u ka Baali ka kira nunu minɛ, ko u kan'a to kelen yɛrɛ be boli. U y'u minɛ. Eli tagara n'u ye Kisɔn kɔɔ daa la k'u kaan tigɛ yen.

⁴¹O kɔ, Eli y'a fɔ Akabu ye ko: «Taga dumuni kɛ ka minni kɛ, bari ne tulo be mankan dɔ la, sanjiba mankan lo.»

⁴² Akabu tagara janko ka dumuni kɛ ka minni kɛ. Nga Eli yɛlɛla fɔɔ Karimɛli kulu sanfɛ, ka ta'a kunbiri gwan k'a kuun don a kunbiri furancɛ la.

⁴³A y'a fɔ a ka baaraden ye ko a ka taga filɛli kɛ kɔgɔji faan fɛ. Baaraden nin tagara filɛli kɛ, k'a fɔ ko foyi te yen. Eli y'a fɔ a ye fɔɔ siɲɛ wolonwula ko: «Kɔsegi ka taga filɛli kɛ.»

⁴⁴Siɲɛ wolonwulanan na, a y'a fɔ ko ale ɲaa be sankabafitini dɔ la n'a be wilila kɔgɔji kunna, ko a boɲa te tɛmɛ mɔgɔ tigɛ kan. O la, Eli y'a fɔ a ye ko a ka ta'a fɔ Akabu ye ko a k'a ka wotoro labɛn ka jigi ka bɔ kulu kan, janko sanji kana n'a datugu.

⁴⁵Waati dɔɔni dɔrɔn, saan finna, fɔɲɔ wilila, sanjiba nana. Akabu yɛlɛl'a ka wotoro kɔnɔ ka taga Zizireyɛli.

⁴⁶Masaba ka sebagaya jigira Eli kan, a y'a cɛɛ siri ka bila Akabu ɲa ka boli fɔɔ ka taga se Zizireyɛli dugu donda la.