Read dyu Masacɛw ka kitabu fɔlɔ 19 Bible Online

Masacɛw ka kitabu fɔlɔ 19 - dyu bible

Masacɛw ka kitabu fɔlɔ 19

¹Eli ye fɛɛn minw bɛɛ kɛ, ka kira nunu bɛɛ faga ni murujan ye cogo min na, Akabu y'o kibaruya bɛɛ fɔ Zezabɛli ye.

²O la, Zezabɛli ye cii bila ka ta'a fɔ Eli ye ko: «I ye fɛɛn min kɛ kira nunu na, ni ne m'o ɲɔgɔn kɛ i la yanni sini yan tuma si, joow kana n to fewu!»

³Eli y'a ye ko a tena ɲa. A wilila ka boli janko k'a yɛrɛ nii kisi. A tagara se Bɛriseba, min be Zuda mara la, k'a ka baaraden to o yɔrɔ la.

⁴ Ale yɛrɛ tɛmɛna ka taga kongokolon kɔnɔ. A ye tile kelen taama kɛ, ka sigi yiri dɔ kɔrɔ, ko ale be saya le fɛ. A y'a fɔ ko: «A ser'a daan ma, sisan Masaba, ne nii minɛ bari ne man fisa ni n faaw ye.»

⁵O kɔ, a lara yiri nin kɔrɔ ka sinɔgɔ. Mɛlɛkɛ dɔ nana maga a la k'a fɔ a ye ko a ka wili ka dumuni kɛ.

⁶A wilila ka filɛli kɛ, a ye ŋɔmi yirannin dɔ ye fara gwanninman kan a gɛrɛfɛ, ani daga dɔ, jii b'o kɔnɔ. A ye dumuni kɛ ka minni kɛ, ka tila ka la tugu.

⁷Masaba ka mɛlɛkɛ nin nana maga a la a siɲɛ filanan na k'a fɔ a ye ko a ka wili ka dumuni kɛ, ko bari sira nin ka jan a seen kɔrɔ.

⁸A wilila ka dumuni kɛ ka minni kɛ. A ye fanga min sɔrɔ o dumuni na, a wilila n'o ye ka taama tile bi naani ni suu bi naani kɔnɔ, fɔɔ ka taga se Ala ka kulu kɔrɔ, min ye *Orɛbu kulu ye.

⁹A sera o yɔrɔ la ka don farawo dɔ kɔnɔ ka la yen sufɛ. Masaba barila ka kuma a fɛ k'a fɔ a ye ko: «Eli, e be mun le kɛra yan?»

¹⁰ A y'a fɔ ko: «Masaba, Setigi Ala, e koo ka di ne ye kosɔbɛ fɔɔ n te se ka Isirayɛlidenw cogo filɛ. U banna i ka layidu la, u y'i ka sarakabɔyɔrɔw cɛn, k'i ka kiraw faga ni murujan ye. Ne kelenpe le tora, u fana b'a fɛ ka ne faga.»

¹¹Masaba y'a fɔ a ye ko: «Bɔ ka lɔ kulu kan ne ɲakɔrɔ.» O y'a sɔrɔ Masaba tun bena tɛmɛ. Fɔɲɔba dɔ tun be fiyɛra ni fanga ye, ka kuluw yɛrɛkɛ, ka farayɔrɔw ci Masaba ɲafɛ. Nga Masaba tun te fɔɲɔ nin kɔnɔ. Fɔɲɔ tɛmɛnin kɔ, dugukolo yɛrɛyɛrɛla, Masaba fana tun t'o dugukolo yɛrɛyɛrɛ nin yɔrɔ la.

¹²Dugukolo yɛrɛyɛrɛ nin kɔfɛ, tasuma manana fana, Masaba fana tun t'o tasuma nin na. Tasuma tɛmɛnin kɔ, ŋunuŋunukan dɔ bɔra, min te mɛn ka ɲa.

¹³Eli y'o mɛn tuma min na, a y'a ka fani kɛ k'a ɲaa biri, ka bɔ ka lɔ farawo nin daa la. Kumakan dɔ bɔra k'a fɔ a ye ko: «Eli, e be mun le kɛra yan?»

¹⁴A y'a jaabi ko: «Masaba, Setigi Ala, e koo ka di ne ye kosɔbɛ fɔɔ n te se ka Isirayɛlidenw cogo filɛ. U banna i ka layidu la, u y'i ka sarakabɔyɔrɔw cɛn, k'i ka kiraw faga ni murujan ye. Ne kelenpe le tora, u fana b'a fɛ ka ne faga.»

¹⁵ Masaba y'a fɔ a ye ko: «Taga kongokolon sira ta tugu, ka kɔsegi ka taga fɔɔ Damasi. N'i sera o yɔrɔ la tuma min na, i ka tulu mɔ Azayɛli la, k'ale kɛ Siri masacɛ ye.

¹⁶ O kɔ, i bena taga tulu mɔ Nimusi dencɛ Zewu la, k'ale kɛ Isirayɛli mara masacɛ ye, ka tulu mɔ Safati dencɛ Elize la, ka bɔ Abɛlimeyola, k'ale kɛ kira ye e Eli nɔɔ na.

¹⁷Ni mɔgɔ min sera ka boli Azayɛli bolo, n'a m'a sɔrɔ k'a faga, Zewu bena o tigi faga, ni min mana se ka boli Zewu bolo, n'a ma se k'o faga, Elize bena o faga.

¹⁸ Nga ne bena Isirayɛliden mɔgɔ waa wolonwula (7 000) to nii na, minw si ma u kunbiri gwan *Baali kɔrɔ.»

¹⁹Eli bɔra o yɔrɔ la ka taga Safati dencɛ Elize sɔrɔ n'a be sɛnɛ kɛra. Sɛnɛkɛmisi mugan ni naani le tun b'a fɛ yen n'u be baara la. Misi fila tun be ale bolo n'a be baara kɛ n'u ye tɔ nunu kɔfɛ. Eli gwɛrɛl'a la, k'a ka fani bila a kaan na.

²⁰Elize y'a ka misi nunu to yen ka boli ka taga Eli kɔ k'a fɔ a ye ko: «A to ne be taga n facɛ ni n bamuso fo fɔlɔ ka sɔrɔ ka na tugu i kɔ.» Eli y'a fɔ a ye ko: «Taga ka na. Ne ye koo min kɛ, i b'o lon.»

²¹A bɔra Eli kɔrɔ ka janfa dɔrɔn, a kɔsegira ka na misi fila nunu minɛ k'o kɛ saraka ye, ka misidaba lɔgɔ kɛ ka misi nunu tobi n'o ye, k'o di jama ma u k'a ɲimi. O kɔ, a wilila ka tugu Eli kɔ ka baara kɛ a ye.