Read dyu Masacɛw ka kitabu fɔlɔ 6 Bible Online

Masacɛw ka kitabu fɔlɔ 6 - dyu bible

Masacɛw ka kitabu fɔlɔ 6

¹Isirayɛlidenw bɔra Ezipiti jamana na, u saan kɛmɛ naani ni bi seeginan na, Solomani ye Masaba ka soo lɔli daminɛ, saan kalo filanan na, min ye *Ziwu kalo ye. O kɛr'a ka masaya saan naaninan na Isirayɛlidenw kunna.

²Masacɛ Solomani ye soo min lɔ Masaba ye, o jaɲa tun ye mɛtɛrɛ bi saba ye, a kɔnɔ boɲa tun ye mɛtɛrɛ tan ye, a jaɲa sanfɛ, o tun ye mɛtɛrɛ tan ni duuru ye.

³Soo nin bonba bulonda jaɲa tun ye mɛtɛrɛ tan ye. O ni soo nin kɔnɔ boɲa bɛɛ ka kan, a kɔnɔ waga tun ye mɛtɛrɛ duuru ye.

⁴A tun ye fenɛtiriw bɔ soo nin na ka tɛmɛ don u la.

⁵A ye boon dɔ wɛrɛw lɔ kɛnɛma k'u nɔrɔ bonba nin ni boon saniyanin na k'u kɛ sangaso ye.

⁶Sangaso nin dugumata kɔnɔ boɲa tun ye mɛtɛrɛ fila ni tilan ye, a filanan ta tun ye mɛtɛrɛ saba ye, a sabanan ta tun ye mɛtɛrɛ saba ni tilan ye. Bari u tun be to ka Masaba ka soo nin kogo lɔ ka dɔɔni dɔɔni to a kɛnɛmata la n'u be yɛlɛla. A kɛra ten, sangaso nin sanbonw yiriw be bila o yɔrɔ kan, o kana kogo nin sɔgɔ.

⁷U tun be soo nin lɔra tuma min na, u y'a lɔ ni kabakuru lɛsɛninw le ye. Marito, walima jende, walima baarakɛminan nigɛlaman si mankan ma mɛn yen a lɔtuma na.

⁸Dugumabon dondaw tun be soo nin kinibolo faan fɛ. U tun ye yɛlɛyɛlɛnan lɔ k'a munumunu fɔɔ ka se sanfɛbon fɔlɔ la, ani filanan fana na.

⁹Solomani ye soo nin lɔ ka ban tuma min na, a ye sɛdiriyiriw lɛsɛ k'o kɛ k'a sanfɛla datugu n'o ye.

¹⁰Boon minw tun lɔra ka soo nin lamini, olu kelen kelen jaɲa sanfɛ tun ye mɛtɛrɛ fila fila ni tilan ye. U sanbon banabiriw tun lara soo nin kogo kan.

¹¹Masaba y'a fɔ Solomani ye ko:

¹²«I be soo nin lɔra kɛ! N'i be ne ka sariyaw ni ne ka fɔta bato, ka n ka koo latigɛninw bɛɛ kɛ, o tuma na, ne tun ye min fɔ i faa Dawuda ye, ne ben'o kɛ i ye.

¹³N bena to Isirayɛlidenw cɛma. Ne tena n ka jama Isirayɛli bila.»

¹⁴Solomani ye soo nin lɔ ka ban.

¹⁵A ye sɛdiriyiriw lɛsɛ k'u kɛ ka soo kɔnɔ kogow bɛɛ datugu, k'a ta duguma fɔɔ sanfɛ, ka sipɛrɛyiriw lɛsɛ k'u kɛ ka duguma datugu.

¹⁶ A ye sɛdiriyiriw lɛsɛ k'u kɛ ka soo nin tilan k'o kɛ soɲa ye min kɔnɔ boɲa ye mɛtɛrɛ tan ye. A y'o yɔrɔ nin kɛ Ala ka sigiyɔrɔ ye, Yɔrɔ Senuman.

¹⁷Bonba min tun gunnin be boon saniyanin nin na, ale jaɲa ye mɛtɛrɛ mugan.

¹⁸U tun ye yiriden dɔw jaaw ɲɛgɛn soo nin kɔnɔ sɛdiriyiriw kan, ani yirifeeren dɔw taw. Soo kɔnɔ bɛɛ tun ye sɛdiriyiri ye, kabakuru si tun te yen.

¹⁹Solomani ye boon saniyanin nin labɛn k'o kɛ Masaba ka layidu taamasiɲɛ kɛsu bilayɔrɔ ye.

²⁰Boon nin jaɲa, n'a kɔnɔ boɲa, ani a jaɲa sanfɛ, o bɛɛ tun ye kelen ye: mɛtɛrɛ tan tan. Solomani ye sanu yɛrɛ yɛrɛ kɛ k'a kɔnɔ mɔ, ka sarakabɔyɔrɔ lɔ ni sɛdiriyiri ye o ɲafɛ, k'o mɔ ni sanu ye.

²¹A ye soo nin kɔnɔ mɔ ni sanu yɛrɛ yɛrɛ ye, ka sanujɔrɔkɔw kɛ boon saniyanin nin ɲafɛ. Boon nin mɔna ni sanu ye.

²² A ye sanu kɛ ka soo nin yɔrɔ bɛɛ mɔ, ani ka sanu kɛ ka sarakabɔyɔrɔ mɔ min be boon saniyanin nin daa la.

²³ A ye *serubɛn jaa fila dilan ni olivuyiri ye. U kelen kelen bɛɛ jaɲa sanfɛ tun ye mɛtɛrɛ duuru ye, k'o bila boon saniyanin nin kɔnɔ.

²⁴Gaman nunu jaɲa tun ye mɛtɛrɛ fila fila ni tilan ye. U fila jaɲa, k'a ta dakun nin na, ka ta'a bila dɔ nin na, o ye mɛtɛrɛ duuru ye.

²⁵Filanan nin jaɲa sanfɛ fana tun ye mɛtɛrɛ duuru ye. U fila bɛɛ jaɲa sanfɛ n'u dilancogo bɛɛ tun ye kelen ye.

²⁶U kelen kelen bɛɛ jaɲa sanfɛ tun ye mɛtɛrɛ duuru ye.

²⁷Solomani ye jaa nunu bila boon saniyanin nin cɛmancɛ la. U gaman nunu tun wilinin be sanfɛ ka kɛ i n'a fɔ u bena pan. Kelen nin gaman kelen tun sera kogo ma faan kelen na. Tɔ kelen nin fana gaman kelen tun sera kogo ma faan dɔ nin na fana. O kɔ, u gaman tɔw nana ɲɔgɔn kunbɛn boon cɛmancɛ la.

²⁸Solomani ye sanu kɛ ka serubɛn jaa nunu mɔ.

²⁹A ye serubɛn jaaw, ni tamarosun ni feeren dɔw jaaw ɲɛgɛn boon nunu kogo yɔrɔ bɛɛ la.

³⁰A ye soo nin boon fila nunu bɛɛ dugumala mɔ ni sanu ye.

³¹Koon minw tun be boon saniyanin nin daa la, o tun ye olivuyiri ye. Koon nunu tun donnin be lɔgɔ minw na, olu boɲa tun sera soo nin kogo boɲa tilancɛ duurunan kelen ma

³²A tun ye serubɛnw jaaw, ni tamarofuraburuw ni feerenw jaaw ɲɛgɛn koon fila nunu kan, ani ka sanu faganin mɔ serubɛn ni tamarofuraburu jaa nunu kan.

³³A fana tun ye bonba nin donda koon kɛ ten fana. Koon be don lɔgɔ min na, a y'o kɛ ni olivuyiri ye. U boɲa tun sera soo nin kogo boɲa tilan naaninan ma.

³⁴A ye koon fila nunu dilan ni sipɛrɛyiriw ye. Koon fila nunu tun kɛra ni yiri lɛsɛnin fila fila ye minw be kuru.

³⁵A ye serubɛn jaaw, ni tamarofuraburuw ni feerenw jaaw ɲɛgɛn u kan, ka jaa nunu mɔ ni sanu ye.

³⁶A ye kɔnɔna luu kogo lɔ ni kabakuru lɛsɛninw ye ka se sira saba ma, ka sɛdiriyiriw sira kelen la o kan.

³⁷Masaba ka soo nin juu sigira Solomani ka masaya saan naaninan na, Ziwu kalo la.

³⁸U tilar'a lɔli la a ka masaya saan tan ni kelennan na. O saan nin kalo seeginan kɔnɔ, min ye *Buli kalo ye, soo nin baara bɛɛ banna, a misɛnmanw fara a gwilimanw kan. A tun y'a lɔ saan wolonwula le kɔnɔ.