Read dyu Masacɛw ka kitabu fɔlɔ 8 Bible Online

Masacɛw ka kitabu fɔlɔ 8 - dyu bible

Masacɛw ka kitabu fɔlɔ 8

¹ O kɔ, masacɛ Solomani ye Isirayɛlideen tan ni fila nunu kɔmɔgɔw bɛɛ ɲamɔgɔw, ni Isirayɛli cɛkɔrɔbaw, n'u ka gwatigiw bɛɛ lajɛn ale fɛ Zeruzalɛmu, janko u ka Masaba ka layidu taamasiɲɛ kɛsu ta Dawuda ka ciin kɔnɔ min ye *Siyɔn ye ka na n'a ye.

² U bɛɛ nana ɲɔgɔn lajɛn masacɛ Solomani fɛ, kalo wolonwulanan na, min ye *Etanimu kalo ye, *Gwatakɔrɔsigi ɲanagwɛ la.

³Isirayɛli cɛkɔrɔbaw bɛɛ sera tuma min na, sarakalasebagaw ye kɛsu nin ta

⁴ka na n'a ye, ni Ɲɔgɔnkunbɛn fanibugu, ani u tun be to ka baara kɛ Ala ye ni minan minw bɛɛ ye fanibugu nin kɔnɔ. Sarakalasebagaw ni Levi kɔmɔgɔw le tun y'u ta ka taga n'u ye.

⁵Isirayɛli jama min tun lajɛnna masacɛ Solomani fɛ, olu ni masacɛ Solomani lɔra kɛsu nin ɲafɛ. U ye sagaw ni misiw faga, o daa yɛrɛ ma se ka lɔn, u te se ka jati u cayakojugu fɛ.

⁶Sarakalasebagaw ye kɛsu nin ta ka ta'a bila a bilayɔrɔ la boon nin kɔnɔ Ala ka sigiyɔrɔ la, *serubɛn jaa nunu gamanw jukɔrɔ.

⁷U gamanw tun wilinin lo kɛsu n'a talɔgɔw sanfɛ.

⁸O lɔgɔ nunu tun ka janjan kosɔbɛ, fɔɔ u dakunw tun be ye Yɔrɔ Senuman kɔnɔ, min tun gunnin be Ala ka sigiyɔrɔ la, nga k'i to kɛnɛma, i tun te se k'o ye. U tora yen fɔɔ ka na se bii.

⁹ Walaka kabakurulaman fila dama le tun be kɛsu nin kɔnɔ, Musa tun ye minw don a kɔnɔ *Orɛbu kulu kɔrɔ, tuma min na Masaba tun bɛnna ni Isirayɛlidenw ye u bɔnin kɔ Ezipiti jamana na.

¹⁰ Sarakalasebagaw bɔra Yɔrɔ Senuman na tuma min na, sankaba jigira ka Masaba ka soo nin fa,

¹¹fɔɔ sarakalasebagaw tun te se ka lɔ yen k'u ka baara kɛ tugu sankaba nin kosɔn, bari Masaba nɔɔrɔ tun y'a ka soo nin fa.

¹² O la, Solomani y'a fɔ ko: «Masaba ko ale bena to dibi la le.

¹³Ne ye soo ɲanaman le lɔ i ye. I bena to yen tuma bɛɛ.»

¹⁴O kɔ, masacɛ y'a ɲaa yɛlɛma, ka duba kɛ Isirayɛli jama bɛɛ ye, o y'a sɔrɔ u bɛɛ tun lɔnin be seen kan.

¹⁵A y'a fɔ ko: «Boɲa ka la Masaba kan, Isirayɛli ka Ala. Ale min tun kumana ne faa Dawuda fɛ, n'a y'a ka fɔta kɛ a ka sebagaya barika la. A tun y'a fɔ ko:

¹⁶ ‹Kabini ne ye n ka jama Isirayɛli bɔ Ezipiti jamana na, ne ma dugu woloma Isirayɛlidenw ka maraw si la, janko ka soo lɔ ne yɛrɛ tɔgɔ la, nga ne ye Dawuda woloma janko a ka kɛ ne ka jama kuntigi ye, min ye ne ka jama Isirayɛli ye.›

¹⁷ «Ayiwa, ne faa Dawuda tun b'a fɛ ka soo lɔ Masaba, Isirayɛli ka Ala ye.

¹⁸Nga, Masaba tun y'a fɔ a ye ko: ‹I b'a fɛ ka soo lɔ ne ye, o miiriya ka ɲi.

¹⁹ Nga, e tena o lɔ ne ye. I dencɛ, i yɛrɛ woloden le bena soo nin lɔ ne ye.›

²⁰«Masaba y'a fɔ cogo min na, a fana y'a kɛ ten. Ne sigira n facɛ Dawuda nɔɔ na, ka kɛ Isirayɛlidenw ka masacɛ ye i ko a tun y'a fɔ cogo min na. Ne ye soo lɔ Masaba, Isirayɛli ka Ala ye,

²¹k'a ka layidu taamasiɲɛ kɛsu bilayɔrɔ dilan, a tun ye layidu min ta an faaw ye tuma min na a y'u bɔ Ezipiti jamana na.»

²²Solomani wilila ka lɔ Masaba ka sarakabɔyɔrɔ ɲafɛ Isirayɛli jama bɛɛ ɲana. A y'a bolo wili sanfɛ k'a fɔ ko:

²³«Masaba, Isirayɛli ka Ala, batofɛn wɛrɛ si te yen min b'i bɔ. A te sankolo la, a te dugukolo kan. I b'i ka layidu dafa, ka ɲumanya kɛ i ka baarakɛlaw ye, minw b'i sago kɛ.

²⁴I ye layidu min ta i ka baarakɛla, ne facɛ Dawuda ye, i y'o dafa. I ye min fɔ, i y'a kɛ n'i ka sebagaya ye i n'a fɔ a be cogo min na bii.

²⁵ Sisan Masaba, Isirayɛli ka Ala, i ka janto i ka layidu la i ye min ta ne facɛ Dawuda ye, k'a fɔ ko kɔmɔgɔ tena fɔn a fɛ i ɲakɔrɔ, min bena kɛ Isirayɛlidenw ka masacɛ ye, ko a daan ye u ka banba ka kɛ i n'a fɔ ale, i ɲakɔrɔ.

²⁶Ayiwa, Isirayɛli ka Ala, i ye layidu min ta i ka baarakɛla ye, ne facɛ Dawuda, o ka kɛ.

²⁷ «Ala, i bena sɔn ka to dugukolo kan sɔbɛ la wa? I te kun sankolo kɔnɔ, sankofɛrɛ ne ka soo lɔnin nin kɔnɔ!

²⁸O bɛɛ n'a ta Masaba ne ka Ala, mɛnni kɛ i ka baarakɛla ka daalilikan na, n'a ka makarikan. I ka baarakɛla kasikan n'a daalili lamɛn bii.

²⁹ I hakili to soo nin la suu fara tile kan. I y'a fɔ ko i bena sigi yɔrɔ min na. I ka baarakɛla bena daalili min kɛ yan yɔrɔ la, i k'o lamɛn.

³⁰N'i ka baarakɛla an'i ka jama Isirayɛli y'u ɲaa sin yɔrɔ nin ma k'i daali, i k'u lamɛn. K'i to i sigiyɔrɔ la sankolo kɔnɔ, i ka mɛnni kɛ, ka yafa.

³¹«Ni mɔgɔ dɔ y'a tɔɲɔgɔn hakɛ ta, n'u y'a wajibiya ko a ka kali, n'a tigi nana kali sarakabɔyɔrɔ nin ɲafɛ, i ka soo kɔnɔ,

³²k'i to sankolo la, i ka mɛnni kɛ. I ka kiti tigɛ i ka baarakɛlaw cɛ, koo cɛnna min fɛ, i k'ale jalaki, a ka lɔ n'a ka baarajugu kunko ye. I ka mɔgɔɲuman ka tiɲɛ d'a ma.

³³«N'a kɛra ko i ka jama Isirayɛli juguw sera u kɔrɔ kɛlɛ la, bari u y'i hakɛ ta, n'u nimisara ka kɔsegi e ma ka boɲa la i tɔgɔ kan, k'i daali kosɔbɛ soo nin kɔnɔ,

³⁴k'i to sankolo la, i ka mɛnni kɛ, k'u ka hakɛ yafa, k'u kɔsegi u ka jamana na, e tun ye min di u bɛmaw ma.

³⁵«Ni saan lɔra n'a te nana, k'a sababu kɛ k'u y'i hakɛ ta, n'u y'u ɲaa sin yɔrɔ nin ma k'i daali, ka boɲa la i tɔgɔ kan, n'u nimisara ka faran u ka hakɛ la u tɔɔrɔnin kɔ,

³⁶k'i to sankolo la, i ka mɛnni kɛ, k'i ka baarakɛlaw ka hakɛ yafa, i ka jama Isirayɛli. I ka siraɲuman don u seen kɔrɔ u bena min taama, k'a to sanji ka na jamana nin kɔnɔ i ye min d'u ma.

³⁷«Ni kɔngɔ, walima banajugu, walima sigɛn, walima sumancɛnbana, walima tɔɔnw, mana don jamana nin kɔnɔ, n'u juguw nana ko u b'u kɛlɛ jamana kɔnɔ, u ka duguw la, ni banajuguw, walima balawu, nana ben u kan,

³⁸ni mɔgɔ o mɔgɔ y'i daali, i ka jama Isirayɛli cɛma, a mana fɛɛn o fɛɛn daali, a mana kɛ koo o koo ye, n'a nimisara k'a bolo wili k'a sin soo nin ma,

³⁹k'i to i sigiyɔrɔ la sankolo la, mɛnni kɛ ka yafa u ma, k'u dɛmɛ ka kɛɲɛ n'u kelen kelen bɛɛ ka kɛtaw ye, e min b'u bɛɛ kɔnɔnako lɔn. Bari ele kelen le be adamadenw bɛɛ kɔnɔnakow lɔn.

⁴⁰O la, k'u to jamana nin kɔnɔ i tun ye min di an faaw ma, u bena siran i ɲa u sii bɛɛ la.

⁴¹«Ni lonan, min te i ka jama Isirayɛli dɔ ye, n'a bɔra jamanajan dɔ la ka na i tɔgɔ kosɔn,

⁴²bari u ben'a lɔn ko i tɔgɔ ka bon, ani ko fanga b'i fɛ, ani barika b'i la, n'a nana k'a ɲaa sin soo nin ma k'i daali,

⁴³k'i to i sigiyɔrɔ la sankolo la, lonan nin ye fɛɛn min ɲini i fɛ, i k'o kɛ a ye, janko dugukolo kan siyaw bɛɛ k'i lɔn ani ka siran i ɲa i n'a fɔ i ka jama Isirayɛli, ani k'a lɔn ko ne ye soo min lɔ, ko i tɔgɔ le b'a kan.

⁴⁴«N'i ka jama bɔra k'u be taga u juguw kɛlɛ, ka kɛɲɛ n'i ka fɔta ye u ye, n'u ye ele Masaba daali, k'u ɲaa sin i ka dugu wolomanin ma, ani ne ye soo min lɔ i ye, k'u ɲaa sin o ma,

⁴⁵k'i to sankolo la, i k'u ka daalili mɛn, k'u dɛmɛ.

⁴⁶«N'u y'i hakɛ ta, bari adamaden si te yen min te hakɛ kɛ, n'i dimina u kɔrɔ k'u don u juguw bolo, olu k'u minɛ ka taga u kɛ jɔɔnw ye u ka jamana na, yɔrɔjan, walima yɔrɔsurun na,

⁴⁷k'u to jamana nin na, u minɛna ka taga min na, n'u nimisara ka hakɛto daali i fɛ k'a fɔ ko: ‹An ye hakɛkɛlaw ye, an ye kodagabali kɛ, an jalakinin lo,›

⁴⁸k'u to u jugu nunu ka jamana kɔnɔ, u y'u minɛ ka taga n'u ye min kɔnɔ k'u kɛ jɔɔnw ye, n'u nimisara ka kɔsegi e ma n'u dusu bɛɛ ye k'i daali, k'u ɲaa sinnin to u ka jamana ma, i ye min di u faaw ma, k'u ɲaa sin i ka dugu wolomanin ma, ani ne ye soo min lɔ i ye,

⁴⁹k'i to i sigiyɔrɔ la sankolo la, i k'u ka daalili mɛn, k'u dɛmɛ.

⁵⁰I ka jama y'i hakɛ ta, yafa u ma. U murutira i ma koo minw bɛɛ la, o bɛɛ yafa u ma. Mɔgɔ minw y'u minɛ ka taga u kɛ jɔɔnw ye, a to u be makari u la.

⁵¹Bari e ka jama lo, i ta lo, e le y'u bɔ Ezipiti jamana na, k'u sama ka bɔ tasumaba kɔnɔ.

⁵²«I hakili to i ka baarakɛla n'i ka jama Isirayɛli ka daalili la. U mana kule i nɔɔ fɛ tuma o tuma, i ka mɛnni kɛ u fɛ.

⁵³Bari i y'u woloma ka bɔ dugukolo kan siya tɔw bɛɛ la k'u kɛ i ta ye, i ko i tun y'a fɔ i ka baarakɛla Musa barika la cogo min na, e Matigi, Masaba tun y'an faaw bɔ Ezipiti jamana na tuma min na.»

⁵⁴Solomani y'o daalili nin kɛ ka ban Masaba fɛ tuma min na, a wilila ka lɔ a ka sarakabɔyɔrɔ ɲafɛ, a tun y'a kunbiri gwan yɔrɔ min na, k'a bolo wili sanfɛ.

⁵⁵K'a lɔnin to, a y'a kaan kɔrɔta ka duba kɛ Isirayɛli jama bɛɛ ye. A y'a fɔ ko:

⁵⁶ «Boɲa ka la Masaba kan, ale min ye hɛrɛ kɛ a ka jama Isirayɛli ye, ka kɛɲɛ n'a ka layidu n'a ka kuma diman bɛɛ ye, a tun ye min fɔ a ka baarakɛla Musa sababu la, o si kɛbali ma to.

⁵⁷Masaba an ka Ala ka to an fɛ, i n'a fɔ a tora an faaw fɛ cogo min na. A kana an to an kelen, a kana an bila.

⁵⁸Nga a k'an dɛmɛ an ka se k'a sago kɛ, ka se k'a ka sira taama koo bɛɛ la, k'a ka kuma bato, ani a ka sariyaw, n'a ka ɲinitaw, a tun ye minw fɔ an faaw ye.

⁵⁹Ne ye daalili min kɛ, o ka to Masaba an ka Ala tulo la suu fara tile kan, janko a k'a ka baarakɛla n'a ka jama Isirayɛli dɛmɛ loon o loon,

⁶⁰dugukolo kan siyaw bɛɛ ka se k'a lɔn ko Masaba le ye Ala ye, ko dɔ wɛrɛ te yen tugu.

⁶¹Aw jigi bɛɛ ka to Masaba an ka Ala kan, i n'a fɔ a be kɛ cogo min na bii, aw ka se k'a ka sariyaw, n'a ka fɔta bato.»

⁶²Masacɛ ni Isirayɛlidenw bɛɛ ye sarakaw bɔ Masaba ye.

⁶³Solomani ye misi waa mugan ni fila (22 000) faga, ka sagaw ni baaw waa kɛmɛ ni mugan (120 000) kɛ jɛnɲɔgɔnya saraka ye Masaba ma. A kɛra ten, masacɛ ni Isirayɛlidenw bɛɛ ye soo nin kalifa Masaba ma.

⁶⁴O loon kelen na, luu min be Masaba ka soo ɲafɛ, masacɛ y'o cɛmancɛ fana kalifa Masaba ma, ka saraka jɛnitaw ni suman sarakaw bɔ o yɔrɔ la, ani jɛnɲɔgɔnya sarakaw tulu. Bari sarakabɔyɔrɔ ziralaman tun dɔgɔyara sarakafɛn nunu ma.

⁶⁵Solomani ye *Gwatakɔrɔsigi ɲanagwɛ nin kɛ o waati la, ale ni Isirayɛlidenw bɛɛ. Jamaba tun lo, u tun bɔra Lebowamati mara la, kɔgɔdugu faan fɛ, fɔɔ ka taga se Ezipiti kɔɔ daa la, worodugu faan fɛ ka na. U nana lajɛn Masaba an ka Ala ɲakɔrɔ fɔɔ tile wolonwula kɔnɔ, ani tile wolonwula wɛrɛ tugu. O bɛɛ lajɛnnin kɛra tile tan ni naani ye.

⁶⁶O dugusagwɛ, a ye sira di jama ma. Jama ye duba kɛ masacɛ ye, o kɔ, u kɔsegira u ka soo, u nisɔndiyaninba Masaba ka ɲumanya bɛɛ kosɔn, a ye min kɛ a ka baarakɛla Dawuda, ani a ka jama Isirayɛli ye.