Read dyu Masacɛw ka kitabu fɔlɔ 9 Bible Online

Masacɛw ka kitabu fɔlɔ 9 - dyu bible

Masacɛw ka kitabu fɔlɔ 9

¹Solomani tilara Masaba ka soo lɔbaara la, ani masaso ta, n'a diyanataw bɛɛ la tuma min na,

² Masaba y'a yɛrɛ yira a la tugu, i n'a fɔ a tun y'a kɛ cogo min na Gabaŋɔn.

³Masaba y'a fɔ a ye ko: «I ye daalili min kɛ, ne y'o mɛn. I ye soo min lɔ, ne y'o kɛ n ta ye janko ne ka to a kɔnɔ tuma bɛɛ. Ne bena n hakili to a la tuma bɛɛ k'a koo to n kɔnɔ.

⁴Ele kɔni, n'i be taama ne ɲakɔrɔ ni dusu gwɛnin ni tilenninya ye, i n'a fɔ i facɛ Dawuda y'a kɛ cogo min na, n'i ye ne ka fɔta bɛɛ bato, ani ne ka sariyaw, ni ka n ka kolatigɛninw kɛ,

⁵ n bena barika don i ka masaya la tuma bɛɛ Isirayɛlidenw kunna, i ko ne tun y'a fɔ i faa Dawuda ye cogo min na, ko a tena fɔn kɔmɔgɔ la Isirayɛlidenw kunna.

⁶«Nga n'aw, walima aw deenw, y'aw kɔɔ sin ne ma, n'aw ma sɔn ka ne ka kuma ni n ka sariyaw bato, ne ye minw sigi aw ye, n'aw tagara fɛɛn wɛrɛw bato k'aw kunbiri gwan u ɲakɔrɔ,

⁷ne bena Isirayɛlidenw gwɛn ka bɔ jamana nin kɔnɔ, ne tun ye min d'u ma. Ne ye soo min kɛ n yɛrɛ ta ye, ne bena ban o la fana. O la, siyaw bɛɛ bena Isirayɛlidenw ka koo kɛ siirin ye, ka yɛlɛ u ma.

⁸ Soo nin min tun ka ɲi kosɔbɛ, mɔgɔ o mɔgɔ mana tɛmɛ a gɛrɛfɛ, o tigi bena kabakoya ka kaba k'a fɔ ko: ‹Mun na Masaba ye jamana nin, ani soo nin kɛ ten?›

⁹U bena to ka ɲɔgɔn jaabi ko: ‹U banna Masaba u ka Ala la minkɛ, o kama lo. Ale min tun y'u faaw bɔ Ezipiti jamana na. Bari, u y'u jigi la batofɛn wɛrɛw kan, ka olu bato k'u kunbiri gwan u ɲakɔrɔ. O le y'a to Masaba ye sigɛn nin bɛɛ la u kan.› »

¹⁰Solomani tun sera ka Masaba ka soo, ni masaso lɔ saan mugan kɔnɔ.

¹¹Tiri masacɛ Iramu tun ye sɛdiriyiri, ni sipɛrɛyiriw, ani sanu di Solomani ma fɔɔ k'a wasa, o la, masacɛ Solomani ye dugu mugan d'a ma Galile mara la.

¹²Nga Iramu bɔra Tiri dugu kɔnɔ ka taga o dugu nunu filɛ. U m'a ɲaa fa.

¹³A y'a ɲininga ko: «N balimacɛ, i ye dugu sifa jumɛn le di ne ma ten?» O la, u y'o yɔrɔ tɔgɔ la ko Kabuli [1] mara, o yɔrɔ tɔgɔ be wele ten halibi.

¹⁴Iramu tun ye sanu tɔni saba ni tilancɛ le ci masacɛ ma.

¹⁵Masacɛ Solomani tun ye fasobaara minw labɛn, u filɛ nin ye: Masaba ka soo lɔbaara, ani ale yɛrɛ ka soo ta, ni u ye yɔrɔ min fa ni bɔgɔ ye k'a wili, ani Zeruzalɛmu laminikogo ta, ni Asɔri dugu, ani Megido ni Gezɛri dugu.

¹⁶Ezipiti masacɛ tun ye Gezɛri minɛ, k'a kɔnɔ kanaanw faga, ani ka dugu nin jɛni. O kɔ, a y'a di a denmuso ma, n'o ye Solomani muso ye, k'o kɛ a ka furuminan ye.

¹⁷Solomani ye Gezɛri dugu lɔ kura ye. A ye Duguma Bɛtorɔn lɔ kura ye fana,

¹⁸ni Baalati, ani Tamari min be Zuda mara kongokolon kɔnɔ.

¹⁹A ka dugu minw tun kɛr'a ka minanw bilayɔrɔw ye, a ye olu bɛɛ lɔ kura ye fana, n'a ka wotorow biladuguw, n'a ka soow maraduguw. Fɛɛn o fɛɛn lɔko tun ka d'a ye Zeruzalɛmu dugu kɔnɔ, ni Liban jamana na, ani a ka mara bɛɛ kɔnɔ, a ye olu bɛɛ lɔ.

²⁰Siya dɔw tɔɔ tun tora jamana kɔnɔ minw tun te Isirayɛlidenw ye. Olu tun ye amoriw ye, ni itiw, ani periziw, ni iviw, ani zebuziw ye.

²¹U kɔmɔgɔ minw tun tora Isirayɛlidenw cɛma, n'u ma se k'u halaki pewu, Solomani ye olu kɛ jɔɔnw ye k'u bila fasobaara la. O tora o la fɔɔ ka na se bii ma.

²²Nga Solomani ma Isirayɛlidenw si minɛ i n'a fɔ jɔɔnw. Olu le tun kɛr'a ka kɛlɛdenw ye, n'a ka dakɔrɔsigiw, n'a ka kɛlɛkuntigiw, n'a ka kɛlɛkɛwotorow bolibagaw ni sotigiw ye.

²³Solomani tun ye kuntigi minw sigi baaraw kunna, o tun ye mɔgɔ kɛmɛ duuru ni bi duuru ye, olu le tun be to ka baaradenw kɔlɔsi.

²⁴Ezipiti masacɛ denmuso yɛlɛmana ka bɔ Dawuda ka ciin kɔnɔ, ka ta'a ka soo kɔnɔ Solomani tun ye min lɔ a ye. Solomani sɔrɔla ka yɔrɔ dɔ fa ni bɔgɔ ye k'a wili.

²⁵ Solomani tun ye sarakabɔyɔrɔ min lɔ Masaba ye, a tun be to ka saraka jɛnitaw ni jɛnɲɔgɔnya taw bɔ o kan siɲɛ saba saan kɔnɔ, ani ka wusulan jɛni. A kɛra ten, soo nin lɔkun dafara.

²⁶Masacɛ Solomani ye kurunbabaw dilan fana Ɛsiyɔngɛbɛri, Ɛlati dugu gɛrɛfɛ, Buruku kɔgɔji kɔrɔ Edɔmu mara la.

²⁷Iramu y'a yɛrɛ ka baaradenw ci, minw be kurun lɔn kosɔbɛ. U tagara Solomani ka baaradenw bila sira.

²⁸U tagara Ofiri dugu kɔnɔ ka sanu tɔni tan ni fila ni kɔ ta ka n'a di masacɛ Solomani ma.