Read dyu Masacɛw ka kitabu filanan 13 Bible Online

Masacɛw ka kitabu filanan 13 - dyu bible

Masacɛw ka kitabu filanan 13

¹Zuda mara masacɛ Zowasi, Akaziyasi dencɛ ka masaya saan mugan ni sabanan na, Zewu dencɛ Yowakazi sigira masaya la Isirayɛli mara kunna Samari. A ye saan tan ni wolonwula kɛ masaya la.

²A ye kojugu kɛ Masaba ɲakɔrɔ. Nebati dencɛ Zerobowamu tun y'a kɛ Isirayɛli mara mɔgɔw ye kojugu min kɛ, a fana y'o sira kelen ta ka Zerobowamu ka baara ɲɔgɔn kɛ. A m'a dabila.

³O la, Masaba dimina Isirayɛli mara mɔgɔw kɔrɔ. A y'u don Siri masacɛ Azayɛli bolo, n'a dencɛ Bɛnadadi bolo fana waatijan kɔnɔ.

⁴Yowakazi ye Masaba daali. Masaba y'a ka daalili minɛ, bari Masaba tun ye Isirayɛli mara mɔgɔw tɔɔrɔcogo ye Siri masacɛ bolo.

⁵O la, a ye kisibaga dɔ ci u ma. Isirayɛli mara mɔgɔw kisira ka bɔ Sirikaw bolo, ani ka taga sigi u yɛrɛ ka soow kɔnɔ i n'a fɔ a tun be cogo min na ka kɔrɔ.

⁶O bɛɛ n'a ta, Zerobowamu n'a ka somɔgɔw tun y'a kɛ Isirayɛli mara mɔgɔw ye kojugu min kɛ, u m'o dabila. U tora k'o ɲɔgɔn kɛ. U tun ye Asera jaa min tutu Samari, ale tun be yen fana.

⁷Sotigi bi duuru ni kɛlɛkɛwotoro tan ani kɛlɛden sennatigiw waa tan (10 000) dɔrɔn le tun tora Yowakazi bolo, bari Siri masacɛ tun ye dɔ nunu halaki k'u kɛ i n'a fɔ bɔgɔ, seenw kɔrɔ.

⁸Yowakazi ka kɛwali tɔw, a ka baara bɛɛ, n'a ka cɛfariyakow, o be sɔrɔ Isirayɛli mara masaw ka loon o loon kibaru sɛbɛ kɔnɔ.

⁹O kɔ, a sara, u y'a suu don Samari. A dencɛ Zowasi sigir'a nɔɔ na masaya la.

¹⁰Zuda mara masacɛ Zowasi ka masaya saan bi saba ni wolonwulanan na, Yowakazi dencɛ Zowasi sigira masaya la Isirayɛli mara kunna Samari. A ye saan tan ni wɔɔrɔ kɛ masaya la.

¹¹A ye kojugu kɛ Masaba ɲakɔrɔ. Nebati dencɛ Zerobowamu tun y'a kɛ Isirayɛli mara mɔgɔw ye kojugu minw kɛ, a m'o dabila, a tora k'o ɲɔgɔn kɛ.

¹²Zowasi ka kɛwali tɔw, a ka baara bɛɛ, n'a ka cɛfariyakow, n'a ye kɛlɛ min kɛ ni Zuda mara masacɛ Amaziyasi ye, o be sɔrɔ Isirayɛli mara masaw ka loon o loon kibaru sɛbɛ kɔnɔ.

¹³Zowasi sara. U y'a suu don Isirayɛli mara masacɛw ka kaburu kɔnɔ Samari. Zerobowamu sigir'a nɔɔ na masaya la.

¹⁴ Elize tun lanin be a ka sayabana na tuma min na, Isirayɛli mara masacɛ Zowasi tagar'a fɛ. A sigir'a kunna ka kasi n'a be to k'a fɔ ko: «Ne faa! Ne faa! Ele ni Isirayɛlidenw ka kɛlɛkɛwotorow n'u ka sotigiw bɛɛ ka kan.»

¹⁵Elize y'a fɔ a ye ko a ka kala ta. A y'a ta.

¹⁶O kɔ, a y'a fɔ a ye ko a ka kala nin sama. A y'a sama ka ban tuma min na, Elize y'a bolo la a bolo kan k'a fɔ ko:

¹⁷«Kɔrɔn fɛ fenɛtiri dayɛlɛ.» A y'a dayɛlɛ. Elize ko: «A bon.» A y'a bon. Elize ko: «Nin ye aw kisibiɲɛ ye Masaba fɛ. I bena se Sirikaw kɔrɔ, i bena u kɛlɛ Afɛki fɔɔ k'u ban.»

¹⁸O kɔ tugu, Elize y'a fɔ a ye ko a ka biɲɛw ta, a y'u ta. Elize y'a fɔ a ye ko a ka dugukolo gosi n'o ye. A y'a gosi siɲɛ saba ka lɔ.

¹⁹Elize dimin'a kɔrɔ k'a fɔ a ye ko: «I tun ka kan k'a gosi siɲɛ duuru, walima wɔɔrɔ, o la, e tun bena se Sirikaw kɔrɔ k'u ban pewu. Sisan i bena se u kɔrɔ siɲɛ saba dɔrɔn.»

²⁰O kɔ, Elize sara, u y'a suu don. Saan o saan, mowabu dɔw tun be to ka na ben jamana mɔgɔw kan.

²¹Waati dɔ, ka Isirayɛli mara mɔgɔw to n'u be mɔgɔ dɔ suu donna, mowabu nunu dɔw sera, u ye suu nin fili ka don Elize kaburu kɔnɔ. Suu nin tagara maga Elize kolow la dɔrɔn, a kununna, a wilila ka lɔ.

²²Siri masacɛ Azayɛli tun ye Isirayɛli mara mɔgɔw tɔɔrɔ Yowakazi ka tile bɛɛ la.

²³Nga Masaba makarila u la, ka yafa u ma a ka layidu kosɔn a tun ye min ta Ibrayima ni Isiyaka ani Yakuba ye. A tun t'a fɛ k'u halaki, a ma u bila fɔɔ ka na se o waati ma.

²⁴Siri masacɛ Azayɛli sara, a dencɛ Bɛnadadi sigir'a nɔɔ na masaya la.

²⁵Bɛnadadi facɛ Azayɛli tun ye dugu minw minɛ Zowasi facɛ Yowakazi fɛ, Zowasi wilila ka olu minɛ Bɛnadadi fɛ kɛlɛwaati la. A y'a kɛlɛ ka se a kɔrɔ siɲɛ saba ka Isirayɛli mara duguw minɛ.