Read dyu Masacɛw ka kitabu filanan 14 Bible Online

Masacɛw ka kitabu filanan 14 - dyu bible

Masacɛw ka kitabu filanan 14

¹Isirayɛli mara masacɛ Zowasi, Yowakazi dencɛ ka masaya saan filanan na, Zowasi dencɛ Amaziyasi sigira masaya la Zuda mara kunna.

²Sanni a ka kɛ masacɛ ye, a sii tun sera saan mugan ni duuru. A ye saan mugan ni kɔnɔntɔn kɛ masaya la Zeruzalɛmu. A bamuso tɔgɔ tun ko Yowadɛn ka bɔ Zeruzalɛmu.

³A ye koɲuman kɛ Masaba ɲakɔrɔ. A kɔni ma se a bɛma Dawuda fɛ, nga a facɛ Zowasi ye fɛɛn min kɛ, a y'o ɲɔgɔn bɛɛ kɛ fana.

⁴O bɛɛ n'a ta, sɔnnikɛyɔrɔw tun ma tunu, jama tun be to ka sɔnni kɛ ani ka wusulan jɛni yen halibi.

⁵A sigira ka ɲa a ka masaya la tuma min na, a ka dakɔrɔsigi minw tun y'a facɛ masacɛ faga, a ye olu faga.

⁶ Nga a ma u dencɛw faga, ka kɛɲɛ ni Musa ka sariyasɛbɛ kɔnɔnakuma ye. Masaba tun y'a fɔ yɔrɔ min na ko: «Faaw tena faga u deenw nɔɔ na, deenw fana tena faga u faaw nɔɔ na, mɔgɔ kelen kelen bɛɛ bena faga a yɛrɛ ka kojuguw kosɔn.»

⁷Ale lo ye edɔmuw ka kɛlɛden waa tan (10 000) kɛlɛ ka se u kɔrɔ, kɔgɔ be kɔkɛnɛ min na. K'u to kɛlɛ la, a ye Sɛla dugu minɛ, k'a tɔgɔ la ko «Yokiteyɛli.» O tɔgɔ le tor'a kan fɔɔ ka na se bii ma.

⁸O kɔ, a ye cidenw bila ka ta'a fɔ Zewu deen Yowakazi dencɛ Zowasi, Isirayɛli mara masacɛ ye ko a ka na u be ɲɔgɔn kɛlɛ.

⁹Isirayɛli mara masacɛ Zowasi ye cira bila k'a fɔ a ye ko: «Liban kulu kan ŋɔniyiri ye cira bila k'a fɔ Liban sɛdiriyiri ye ko a k'a denmuso di ale dencɛ ma furu la. Nga Liban kongosogo dɔ tagara ŋɔniyiri nin dɔndɔn.

¹⁰Ɔnhɔn, i kɔni sera edɔmuw kɔrɔ, o la, i fara i yɛrɛ la. I yɛrɛ boɲa n'o ye, nga to i ka yɔrɔ la! Mun na e b'i yɛrɛ don kɛlɛjugu la? I bena ben e ni Zuda mara fana!»

¹¹Nga a ma sɔn ka mɛnni kɛ. O la, Isirayɛli mara masacɛ Zowasi wilila ka na. U ye ɲɔgɔn sɔrɔ Bɛtisɛmɛsi, Zuda mara la.

¹²Isirayɛli mara kɛlɛdenw sera Zuda mara taw kɔrɔ, u kelen kelen bɛɛ bolila ka taga u ka soow kɔnɔ.

¹³Isirayɛli mara masacɛ Zowasi ye Zuda mara masacɛ Amaziyasi, Akaziyasi deen Zowasi dencɛ minɛ Bɛtisɛmɛsi. O kɔ, a tɛmɛna ka taga Zeruzalɛmu, ka dugu laminikogo ci k'a ta Efarayimu donda ma fɔɔ ka ta'a bila Nɔnkɔn donda la. O jaɲa be ɲini ka se mɛtɛrɛ kɛmɛ fila ma.

¹⁴Sanu ni warigwɛ, ani minan minw tun be Masaba ka soo kɔnɔ, ani minw tun be masacɛ ka soo nafolo marayɔrɔ la, a y'o bɛɛ ta, ka mɔgɔ dɔw minɛ fana ka sɔrɔ ka kɔsegi Samari.

¹⁵Zowasi ka kɛwali tɔw, n'a ka cɛfariyakow, n'a ye kɛlɛ min kɛ ni Zuda mara masacɛ Amaziyasi ye, olu be sɔrɔ Isirayɛli mara masaw ka loon o loon kibaru sɛbɛ kɔnɔ.

¹⁶Zowasi sara, u y'a suu don Samari, Isirayɛli mara masacɛw ka kaburu yɔrɔ la. O kɔ, a dencɛ Zerobowamu sigir'a nɔɔ na masaya la.

¹⁷Isirayɛli mara masacɛ Zowasi sanin kɔ, Zuda mara masacɛ Amaziyasi ye saan tan ni duuru kɛ sii la tugu.

¹⁸Amaziyasi ka kɛwali tɔw be sɔrɔ Zuda mara masaw ka loon o loon kibaru sɛbɛ kɔnɔ.

¹⁹U ye janfa siri a la Zeruzalɛmu, a bolila ka taga Lakisi. U ye mɔgɔw bila a kɔ, u tagar'a faga yen.

²⁰U y'a ta soo kan ka na n'a ye Zeruzalɛmu k'a suu don a faaw ka suu donyɔrɔ la, Dawuda ka ciin na.

²¹Zuda mara mɔgɔw bɛɛ ye Azariya minɛ k'a sigi masaya la a facɛ Amaziyasi nɔɔ na. O y'a sɔrɔ a sii tun ye saan tan ni wɔɔrɔ ye.

²²Ale lo ye Ɛlati dugu lalaga k'a lɔ, ani k'a kɛ Zuda mara ta ye tugu, masacɛ Amaziyasi sanin kɔ.

²³Zowasi dencɛ Amaziyasi, Zuda mara masacɛ, ka masaya saan tan ni duurunan na, Zowasi dencɛ Zerobowamu sigira masaya la Isirayɛli mara kunna Samari. A ye saan bi naani ni kelen kɛ masaya la.

²⁴A ye kojugu kɛ Masaba ɲakɔrɔ. Nebali dencɛ Zerobowamu tun y'a kɛ Isirayɛlidenw ye kojugu min kɛ, a y'o ɲɔgɔn kɛ.

²⁵ Ale lo ye Isirayɛli mara minɛ ka taga bɔ a dankɔrɔ la tugu, k'a ta Lebowamati fɔɔ ka taga se Kɔgɔji Fariman ma, ka kɛɲɛ ni Masaba, Isirayɛli ka Ala ka kuma ye, a ka baarakɛla kira Zonasi ka bɔ Gatefɛri ye min fɔ, Amitayi dencɛ.

²⁶Isirayɛli mara mɔgɔw tun sigɛnna kosɔbɛ cogo min na, Masaba tun y'o ye. Dɛmɛbaga foyi tun te Isirayɛli la, jɔɔn, walima hɔrɔn.

²⁷Masaba tun m'a latigɛ ko a bena Isirayɛli mara tɔgɔ tunu dugukolo kan. O la, a y'u kisi Zowasi dencɛ Zerobowamu barika la.

²⁸Zerobowamu ka kɛwali tɔw, a ka baara bɛɛ, n'a ka cɛfariyakɛlɛw, ani a kɛra cogo min na ka se ka Damasi ni Amati duguw kɔsegi Isirayɛli mara la, o be sɔrɔ Isirayɛli mara masaw ka loon o loon kibaru sɛbɛ kɔnɔ.

²⁹Zerobowamu sara, u y'a suu don Isirayɛli mara masacɛw ka kaburu kɔnɔ. O kɔ, a dencɛ Zakari sigir'a nɔɔ na masaya la.