Read dyu Masacɛw ka kitabu filanan 17 Bible Online

Masacɛw ka kitabu filanan 17 - dyu bible

Masacɛw ka kitabu filanan 17

¹Zuda masacɛ Akazi ka masaya saan tan ni filanan na, Ela dencɛ Oze kɛra masacɛ ye Isirayɛli mara kunna Samari. A ye saan kɔnɔntɔn kɛ masaya la.

²A ye kojugu kɛ Masaba ɲakɔrɔ. Nga a ta kɔni tun ma se Isirayɛli masacɛw taw fɛ, minw tɛmɛn'a ɲa.

³Asiri masacɛ Salimanazari wilila ka na a kama, a sera Oze kɔrɔ, Oze tun be nisɔngɔ sara a ye saan o saan.

⁴Asiri masacɛ nana bɔ janfa dɔ kala ma Oze fɛ, a tun ye cidenw bila ka taga Ezipiti masacɛ Sɔ fɛ. A tun ma sɔn ka nisɔngɔ nin sara tugu Asiri masacɛ ye i n'a fɔ a tun be to k'a kɛ saan o saan cogo min na. O la, Asiri masacɛ y'a minɛ ka jɔrɔkɔw kɛ a la k'a bila kaso la.

⁵O kɔ, Asiri masacɛ tagara jamana bɛɛ minɛ, ka Samari dugu datugu saan saba.

⁶Oze ka masaya saan kɔnɔntɔnnan na, Asiri masacɛ ye Samari minɛ, ka Isirayɛli mara mɔgɔw minɛ ka taga n'u ye Asiri jamana na, ka taga u bila Hala ni Gozan mara la, Abɔri baa daa la, ani mɛdiw ka duguw kɔnɔ.

⁷O koo nin sera Isirayɛlidenw ma, bari u ye Masaba u ka Ala hakɛ ta, ale min tun y'u bɔ Ezipiti jamana na, Ezipiti masacɛ ka fanga kɔrɔ. U tun ye batofɛn wɛrɛw bato.

⁸Masaba tun ye siya wɛrɛ minw gwɛn u ɲa, u tugura olu ka kɛwaliw kɔ, ani Isirayɛli mara masacɛw ye koo minw dabɔ fana.

⁹Isirayɛlidenw ye kokɛbali dɔw kɛ dogo la Masaba u ka Ala la. U ye sɔnnikɛyɔrɔw lɔ u ka duguw bɛɛ la, dugudennin fara dugubabaw kan.

¹⁰ U ye jokabakuruw lɔ, ka Asera jaaw tutu kulujanjanw bɛɛ kan, ani yiribabaw bɛɛ kɔrɔ.

¹¹U tun be to ka wusulan jɛni sɔnnikɛyɔrɔw bɛɛ la i n'a fɔ Masaba tun ye siya minw gwɛn u ɲa. U ye kojuguw kɛ ka Masaba dimi.

¹²U ye joow sɔn, k'a sɔrɔ Masaba tun y'a fɔ u ye ko u kana o kɛ.

¹³Masaba tun ye Isirayɛli ni Zuda mara mɔgɔw lasɔmi a ka kiraw bɛɛ barika la, k'a fɔ u ye ko: «Aw k'aw ka kɛwalijuguw dabila, ka ne ka sariyaw ni ne ka fɔtaw bato, ka kɛɲɛ ni sariya kɔnɔnakuma bɛɛ ye, ne ye min sigi aw faaw ye, ani n y'a ci aw ma n ka baarakɛlaw, kiraw barika la.»

¹⁴Nga u ma sɔn ka mɛnni kɛ, u y'u tulo gwɛlɛya i n'a fɔ u faaw, minw tun ma la Masaba u ka Ala la.

¹⁵U bann'a ka fɔtaw la, a tun bɛnna n'u faaw ye cogo min na, u banna o la, ani a tun y'u lasɔmi koo minw na. U tugura fɛɛn fufafuw kɔ k'u yɛrɛ kɛ mɔgɔkolonw ye. U tun be to k'u laminisiyaw ka kɛwaliw ɲɔgɔn kɛ, k'a sɔrɔ Masaba tun ko u kana o kɛ.

¹⁶ U banna Masaba u ka Ala ka fɔtaw bɛɛ la, ka misiden fila jaaw dilan, ka Asera jaa lɛsɛ, k'u kunbiri gwan lolow ni kalo ani tile kɔrɔ, ani ka Baali sɔn.

¹⁷ U y'u dencɛw n'u denmusow jɛni ka joow sɔn. U tagara ɲaɲinini kɛ ka subagaya kɛ. U ye kojugu kɛ Masaba ɲakɔrɔ k'a dusu dimi.

¹⁸O la, Masaba dimina kosɔbɛ Isirayɛli mara mɔgɔw kɔrɔ, a y'u bila ka taga yɔrɔjan. A tora Zuda mara mɔgɔw dama.

¹⁹Zuda mara mɔgɔw ma Masaba u ka Ala ka sariyaw bato fana. Isirayɛli mara mɔgɔw tun ye koo minw dabɔ, u y'o ɲɔgɔn le kɛ.

²⁰O la, Masaba ye Isirayɛlidenw bɛɛ bila. A y'u majigi, k'u don benkannikɛlaw bolo, fɔɔ a laban, a y'u gwɛn ka bɔ a ɲakɔrɔ.

²¹Masaba tun ye Isirayɛli mara mɔgɔw faran ka bɔ Dawuda ka soo la tuma min na, u ye Nebati dencɛ Zerobowamu le kɛ u ka masacɛ ye. Ale y'a kɛ u y'u kɔɔ sin Masaba ma, k'u bila kojuguba la.

²²Zerobowamu tun ye kojugu minw kɛ, Isirayɛli mara mɔgɔw tora k'olu bɛɛ kɛ. U ma faran u la,

²³fɔɔ Masaba nana u gwɛn ka bɔ a kɔrɔ i n'a fɔ a tun y'u lasɔmi a ka baarakɛla, kiraw bɛɛ barika la cogo min na. O la, Isirayɛli mara mɔgɔw minɛna ka bɔ u ka jamana na ka taga bila yɔrɔjan na, Asiri jamana na, u tora yɔrɔ min na fɔɔ ka na se bii ma.

²⁴O kɔ, Asiri masacɛ ye mɔgɔ dɔw minɛ ka bɔ Babilɔni, ni Kuti, ani Awa, ani Amati, ni Sefariwayimu ka na u sigi Samari mara duguw kɔnɔ Isirayɛlidenw nɔɔ na. Olu le kɛra Samari duguw tigiw ye.

²⁵U nana sigi tuma min na, u tun te siran Masaba ɲa. O la, a ye jaraw bila ka na u minɛ.

²⁶U y'a fɔ Asiri masacɛ ye ko: «I ye siya minw minɛ ka na u bila Samari mara duguw kɔnɔ, olu te yɔrɔ nin batofɛn batocogo lɔn, o la, a ye jaraw bila u kama, olu b'u fagara.»

²⁷Asiri masacɛ y'a fɔ k'u ye sarakalasebaga minw minɛ Samari ka na n'u ye yan, k'u ka olu kelen bila ka taga sigi yen ka jamana nin kɔnɔ batofɛn batocogo fɔ u ye.

²⁸O la, sarakalasebaga minw tun minɛna Samari, olu kelen kɔsegira ka na sigi Betɛli, ka to k'u kalan u ka kan ka siran Masaba ɲa cogo min na.

²⁹Nga siya nunu y'u yɛrɛ ka batofɛnw dilan ka taga u bila sɔnnikɛyɔrɔw la, Samarikaw tun ye minw lɔ. U tun be dugu minw kɔnɔ, u y'a kɛ ten o yɔrɔw la.

³⁰Babilɔnikaw y'u ka batofɛn dɔ dilan ko Sukɔtibenɔti. Kutikaw ye Nɛrigali dilan, Amatikaw ye Asima dilan.

³¹Awakaw ye Nibazi ani Taritaki dilan. Sefariwayimukaw tun be to k'u deenw jɛni u ka joow ye, Adaramelɛki ni Anamelɛki.

³²U tun be siran Masaba ɲa fana. U ye sarakalasebagaw sigi u cɛma sɔnnikɛyɔrɔw kunna k'u ka baara kɛ sɔnnikɛyɔrɔ nunu na.

³³U tun be siran Masaba ɲa, nga u tun b'u yɛrɛ ka batofɛnw fana bato ka kɛɲɛ ni siyaw ka landaw ye, u tun y'u minɛ ka bɔ minw cɛma ka na n'u ye.

³⁴ Halibi u b'u ka landakɔrɔw le bato. U te siran Masaba ɲa, u t'a ka fɔtaw bato, n'a ka landaw, ani sariyaw, a ye minw di Yakuba kɔmɔgɔw ma, a tun ye min tɔgɔ la ko Isirayɛli.

³⁵ Masaba tun bɛnna n'u ye k'a fɔ u ye ko: «Aw kana fɛɛn wɛrɛ bato, aw kana aw kunbiri gwan u ɲakɔrɔ, ka baara kɛ u ye, ani k'u sɔn.

³⁶ Ne Masaba min y'aw bɔ Ezipiti jamana na ni fangaba ye, ni ne bolo barikaman ye, aw ka kan ka siran ne le ɲa, ani k'aw kunbiri gwan ne ɲakɔrɔ ka saraka bɔ ne ye.

³⁷Aw ka banba ka n ka sariyaw ni n ka landaw bato, tuma bɛɛ, ne tun ye minw sɛbɛn ka di aw ma. Aw kana fɛɛn wɛrɛw bato.

³⁸Aw kana ɲinɛ n'an ka bɛɛn ye, aw kana fɛɛn wɛrɛw bato.

³⁹Aw ka siran ne Masaba aw ka Ala ɲa. Ne bena aw bɔsi aw juguw bɛɛ bolo.»

⁴⁰Nga u ma sɔn ka mɛnni kɛ, u tora k'u ka kokɔrɔw kɛ.

⁴¹O siya nunu tora ka siran Masaba ɲa, ani ka to k'u ka joow sɔn fana. Halibi u deenw n'u mamadenw be to k'a kɛ i n'a fɔ olu y'a kɛ cogo min na.