Read dyu Masacɛw ka kitabu filanan 19 Bible Online

Masacɛw ka kitabu filanan 19 - dyu bible

Masacɛw ka kitabu filanan 19

¹Masacɛ Ezekiyasi y'o mɛn tuma min na, a y'a ka faniw faran ka dusukasifani don a kaan na, ka taga don Masaba ka soo kɔnɔ.

²A ye masaso kɔnɔ kuntigi Eliyakimu, ni sɛbɛnnikɛla Sɛbuna, ani sarakalasebaga minw kɔrɔla kosɔbɛ ci ka taga Amɔsi dencɛ kira Ezayi fɛ. Dusukasifani tun be u bɛɛ kaan na.

³A ko u k'a fɔ a ye ko ale Ezekiyasi ko: «Bii ye dusukasi ni ɲagwan, ani maloya loon ye. A be i n'a fɔ deen sera wolo ma, nga fanga te yen k'a bɔ.

⁴Asiri masacɛ y'a ka kɛlɛmasa ci ka na Ala dɔgɔya. N'a sɔrɔ Masaba i ka Ala bena o kuma nunu bɛɛ mɛn, k'a ɲaa gwan o kosɔn. O la, Ala daali an ka siya tɔɔ ye.»

⁵Masacɛ Ezekiyasi ka cidenw tagara Ezayi fɛ.

⁶Ezayi y'a fɔ u ye ko: «Aw ka taga fɔ aw kuntigi ye ko Masaba ko a ye kuma min mɛn, a kan'a jaa tigɛ o kosɔn, Asiri masacɛ ka kɛlɛɲamɔgɔw ye minw fɔ k'ale Masaba dɔgɔya.

⁷Ko ale bena miiriya dɔ don a kɔnɔ, n'a ye kibaruya dɔ mɛn, a bena kɔsegi a yɛrɛ ka jamana na. Ko ale ben'a to u b'a faga yen ni murujan ye.»

⁸Kɛlɛmasa y'a mɛn ko Asiri masacɛ bɔra Lakisi ka taga Libina kɛlɛyɔrɔ. O la, a tagar'a sɔrɔ o yɔrɔ la.

⁹U nan'a fɔ Asiri masacɛ ye ko Ezipiti masacɛ Tiraka ka bɔ Etiyopi be nan'a kɛlɛyɔrɔ. Asiri masacɛ ye mɔgɔw bila ka taga Ezekiyasi fɛ tugu ko:

¹⁰«Aw k'a fɔ Zuda mara masacɛ Ezekiyasi ye ko a jigi be a ka Ala min kan, a kana sɔn ale k'a nigɛ ko Zeruzalɛmu tena don ne Asiri masacɛ bolo dɛ!

¹¹Asiri masacɛw ye min kɛ jamanaw bɛɛ la, i yɛrɛ y'o mɛn. U y'u halaki pewu. Ele be miiri ko i bena kisi wa?

¹²Ne faaw ye siya minw halaki, olu ka batofɛnw sera k'u kisi wa? Gozankaw ni Arankaw, ani Ɛrɛsɛfukaw ni edɛniw minw tun be Telasari.

¹³Amati masacɛ, ni Aripadi ani Sefariwayimu ni Ena ani Iwa masacɛw be min?»

¹⁴Ezekiyasi ye bataki nin minɛ cidenw bolo k'a kalan. O kɔ, a tagara don Masaba ka soo kɔnɔ k'a la Masaba ɲakɔrɔ.

¹⁵ A ye Masaba daali ko: «Masaba, Isirayɛli ka Ala, e min siginin be serubɛnw sanfɛ, ele kelenpe le ye Ala ye jamanaw bɛɛ kunna dugukolo kan. Ele lo ye sankolo ni dugukolo dan.

¹⁶Masaba, i tulo malɔ ka mɛnni kɛ. I ɲaa yɛlɛ ka filɛli kɛ. Senakeribu ye mɔgɔ ci ka na e Ala nɛni. I k'a ka kuma mɛn.

¹⁷Tiɲɛ lo Masaba, Asiri masacɛw ye siya nunu n'u ka jamanaw halaki.

¹⁸U y'u ka batofɛnw fili tasuma kɔnɔ k'u jɛni. Olu kɔni tun te batofɛnsɔbɛw ye, fɔɔ adamaden ka fɛɛn dilannin dama. U dɔw tun ye yiri ye, dɔw ye kabakuruw ye.

¹⁹Sisan Masaba an ka Ala, an bɔsi Senakeribu bolo, janko dugukolo kan siyaw bɛɛ k'a lɔn ko ele Masaba kelenpe le ye Ala ye.»

²⁰O kɔ, Amɔsi dencɛ Ezayi ye cii bila Ezekiyasi ma ko: «Masaba, Isirayɛli ka Ala ko: ‹Ne y'i ka daalilikan mɛn, i ye min kɛ Asiri masacɛ Senakeribu kosɔn.›

²¹Masaba ye min fɔ a kama, o filɛ nin ye: ‹I koo ka go Siyɔn dugu ye. A b'a ɲaa don i la, Senakeribu. Zeruzalɛmukaw b'u kuun kɔmikɔmina i kɔɔ kan.

²²I ye jɔn le nɛni k'a tɔgɔ cɛn? I y'i kaan kɔrɔta jɔn kama? I y'i ɲaa don jɔn na yɛrɛboɲa fɛ? I y'o kɛ ne le la, Isirayɛli ka Ala.

²³I ye mɔgɔw ci ka na ne Matigi nɛni. I ko i yɛlɛla Liban kulujanjanw kan n'i ka kɛlɛkɛwotoro caaman ye. Ko i y'a ka sɛdiriyiri jamanjanw n'a ka sipɛrɛyiriɲumanw tigɛ. Ko i sera fɔɔ a logologow la, fɔɔ a tufin na.

²⁴Ko i ye kɔlɔnw sogi jamana wɛrɛw la k'o jii min. Ko i y'i sennɔ kɛ ka Ezipiti kɔɔw bɛɛ datugu, u jara.

²⁵I m'a lɔn ko ne y'o koow latigɛ kabini tumajan wa? Kabini fɔlɔfɔlɔ, ne y'o labɛn. Sisan ne y'a to u be kɛra. Ka dugu barikamanw cɛn k'u kɛ kabakuru tonyɔrɔw ye, o ye i niyɔrɔ ye.

²⁶U kɔnɔ mɔgɔw barika banna, u hakili ɲagamina, u maloyara. U be i ko biin, kongo kɔnɔ, walima furaburukɛnɛ. U be i ko biin min be falen soo kunna, walima sigɛn ye suman min jɛni n'a ma sɔrɔ ka kisɛ don.

²⁷I be sigi tuma min na, ne b'o lɔn, ne b'i dontuma n'i bɔtuma lɔn. I be dimi ne kɔrɔ tuma min na, ne b'o lɔn.

²⁸I dimina ne kɔrɔ minkɛ, i ka yɛrɛboɲakuma fana donna ne tulo la minkɛ, o la, ne bena i nuun sɔgɔ ka nigɛ don a la ka karafe don i daa la. I nana ni sira min ye, ne ben'a kɛ i be kɔsegi n'o ye.

²⁹Nin le bena kɛ o taamasiɲɛ ye i fɛ, Ezekiyasi: Aw bena sumanmana le dumu ɲinan. A saan filanan fana bena kɛ ten. Nga a saan sabanan na, aw ka danni kɛ ka suman tigɛ, ka ɛrɛzɛnsunw tutu k'u deenw dumu.

³⁰Zuda mara mɔgɔ tɔɔ minw tora, olu bena u yɛrɛ sɔrɔ tugu i ko yiri min lili donna ka ɲa, ka deen kɛ.

³¹Ɔnhɔn, Zeruzalɛmukaw tɔɔ bena to, Siyɔn kulu kan mɔgɔw dɔw bena kisi.› O bena kɛ Masaba, Setigi ka jijali barika la.

³²Masaba be min fɔ Asiri masacɛ kosɔn, o filɛ nin ye: ‹A tena don dugu nin kɔnɔ, a tena biɲɛ bon yan. A tena na yan kama ni nigɛkunbɛnnan ye, a tena yɔrɔ lɔ k'a wili dugu laminikogo kɔfɛ.

³³A nana ni sira min ye, a bena kɔsegi n'o ye. A tena don dugu nin kɔnɔ. Ne Masaba le ko ten.

³⁴Ne bena dugu nin tanga k'a kisi ne yɛrɛ, ni n ka baarakɛla Dawuda kosɔn.› »

³⁵O suu yɛrɛ la, Masaba ka mɛlɛkɛ tagara mɔgɔ waa kɛmɛ ni waa bi seegi ni waduuru (185 000) faga Asiri kɛlɛdenw ka sigiyɔrɔ la. O dugusagwɛ sɔgɔmadafɛ, mɔgɔw wilila tuma min na, u ma foyi ye suuw kɔ.

³⁶O la, Asiri masacɛ Senakeribu wilila ka bɔ yen ka kɔsegi ka taga to Ninivu.

³⁷Loon dɔ, k'a to a ka joo Nisirɔki sɔnni na joso kɔnɔ, a dencɛ Adaramelɛki ni Sarɛsɛri y'a faga ni murujan ye ka sɔrɔ ka boli ka taga Arara jamana na. A dencɛ Azaradɔn sigir'a nɔɔ na masaya la.