Read dyu Masacɛw ka kitabu filanan 2 Bible Online

Masacɛw ka kitabu filanan 2 - dyu bible

Masacɛw ka kitabu filanan 2

¹Masaba tun bena Eli ta fununfunun kɔnɔ ka taga n'a ye sankolo la waati min na, o waati la, Eli ni Elize tun bɔra Giligali ɲɔgɔn fɛ.

²Eli y'a fɔ Elize ye ko: «N b'a ɲini e fɛ e ka to yan, bari Masaba ye ne ci Betɛli.» Elize y'a fɔ a ye ko: «Masaba kosɔn, ani k'i to sii la, ne tena bɔ i kɔ!» O la, u korila ka taga Betɛli.

³Kira jɛnkulu dɔ tun be Betɛli. U bɔra ka taga Elize fɛ k'a fɔ a ye ko: «I y'a lɔn ko Masaba bena i kuntigi ta bii ka taga n'a ye sanfɛ wa?» A y'u jaabi ko: «Aw y'aw daje, n b'a kala ma.»

⁴Eli y'a fɔ a ye tugu ko: «Elize, n b'a ɲini e fɛ e ka to yan, bari Masaba ye ne ci Zeriko.» A ye Eli jaabi ko: «Masaba kosɔn, ani k'i to sii la, ne tena bɔ i kɔ!» U korila ka taga Zeriko.

⁵Kira jɛnkulu dɔ tun be Zeriko. U gwɛrɛla Elize la k'a fɔ a ye ko: «I b'a lɔn ko Masaba bena i kuntigi ta ka taga n'a ye sanfɛ bii wa?» A y'u jaabi ko: «Aw k'aw daje, n b'a kala ma.»

⁶Eli y'a fɔ a ye ko: «N b'a ɲini e fɛ, e ka to yan, bari Masaba ye ne ci Zurudɛn baji daa la.» A ye Eli jaabi ko: «Masaba kosɔn, ani k'i to sii la, ne tena bɔ e kɔ!» U fila bɛɛ ye sira minɛ ɲɔgɔn fɛ.

⁷Kira nunu mɔgɔ bi duuru bɔra ka tugu u kɔ ka taga lɔ ka furancɛ to olu ni u cɛ. O y'a sɔrɔ Eli ni Elize tun lɔnin be Zurudɛn baji daa la.

⁸Eli y'a ka dilekiba bɔ k'a melekemeleke ka baji gosi n'a ye, jii tilanna fila. U fila donna badingɛ kɔnɔ k'a tigɛ, u seen janin.

⁹ U ye baa tigɛ ka ban tuma min na, Eli y'a fɔ Elize ye ko a b'a fɛ ale ka fɛɛn min kɛ a ye, ko a k'o fɔ, sanni Masaba k'ale ta ka bɔ a kɔrɔ. Elize ko ale b'a ka sebagaya ɲɔgɔn fila le fɛ.

¹⁰Eli y'a fɔ a ye ko a be koo gwɛlɛman le daalila, ko nga n'a y'a ye ale tara ka bɔ a kɔrɔ ka taga tuma min na, k'o koo bena kɛ a ye, ko n'o tɛ, o tena kɛ.

¹¹K'u to taama na n'u be kumana ɲɔgɔn fɛ, wotoro tasumalaman ni soo tasumalaman dɔw nana don u ni ɲɔgɔn cɛ k'u fara ɲɔgɔn na. Eli tara ka taga sankolo la fununfunun kɔnɔ.

¹² Elize tora k'a filɛ n'a be kulera k'a fɔ ko: «Ne faa, ne faa! Ele ni Isirayɛlidenw ka kɛlɛkɛwotorow n'u ka sotigiw bɛɛ ka kan.» O kɔ, a m'a ye tugu. A y'a yɛrɛ ka faniw bɔ k'o faran fila ye.

¹³Eli tun y'a ka dilekiba min bila ka ben, a y'o ta ka kɔsegi ka na lɔ Zurudɛn baji daa la.

¹⁴A ye dilekiba nin kɛ ka baji gosi n'a ye, k'a fɔ ko: «Masaba, Eli ka Ala be min?» A ye baji gosi tuma min na, jii tilanna fila, a tɛmɛna.

¹⁵Kira jɛnkulu min tun bɔra Zeriko, olu y'a ye k'a fɔ ko: «Eli ka sebagaya b'a fɛ.» U tagar'a kunbɛn k'u kunbiri gwan a ɲakɔrɔ.

¹⁶U y'a fɔ a ye ko: «Cɛfari mɔgɔ bi duuru be i ka baarakɛlaw fɛ. A to u be taga i kuntigi yɔrɔ ɲini. N'a sɔrɔ Masaba ka Nii y'a ta ka ta'a bila kulu dɔ kan, walima kɔkɛnɛ dɔ la.» Elize y'a fɔ u ye ko: «Ayi, aw kana u ci.»

¹⁷Nga u tora k'a daali fɔɔ a dɛsɛra k'a fɔ u ye ko u k'u bila ka taga. U y'u bila ka taga, olu ye Eli ɲini tile saba kɔnɔ, u m'a ye.

¹⁸Ka Elize to Zeriko, u kɔsegira ka na a fɛ tuma min na, a y'a fɔ u ye ko: «Ne tun m'a fɔ aw ye ko aw kana taga wa?»

¹⁹Zeriko dugu mɔgɔw y'a fɔ Elize ye ko: «Matigi, dugu nin kɔnɔ sigi ka di kosɔbɛ, i n'a fɔ i ɲaa b'a la cogo min na. Nga a jii ma ɲi, ani foyi te sɔrɔ jamana nin kɔnɔ.»

²⁰A y'a fɔ u ye k'u ka kɔgɔ kɛ dagakura la ka na n'a ye. U nan'a d'a ma.

²¹A tagara jii bɔyɔrɔ la, ka kɔgɔ nin fili a kɔnɔ, k'a fɔ ko: «Masaba ko ale be jii nin saniya, ko a tena fɛɛn si faga tugu, suman fana bena den.»

²²Jii nin saniyara o loon na fɔɔ ka na se bii ma, ka kɛɲɛ ni Elize ka fɔta ye.

²³Elize bɔra o yɔrɔ la n'a be tagara Betɛli. K'a to sira kan, kanbelennin dɔw bɔra dugu kɔnɔ n'u b'a la k'a lɔgɔbɔ. U tora k'a fɔ ko: «Taga ka bɔ yan, kuun wulannin! taga ka bɔ yan, kuun wulannin!»

²⁴A y'a ɲaa yɛlɛma k'u filɛ, k'u danga ni Masaba tɔgɔ ye. Waraba fila bɔra tuu kɔnɔ ka mɔgɔ bi naani ni fila minɛ kanbelennin nunu na.

²⁵A bɔra o yɔrɔ la ka taga Karimɛli kulu kan, ka bɔ o yɔrɔ la fana ka kɔsegi Samari dugu kɔnɔ.