Read dyu Masacɛw ka kitabu filanan 21 Bible Online

Masacɛw ka kitabu filanan 21 - dyu bible

Masacɛw ka kitabu filanan 21

¹Manase tun ye saan tan ni fila sɔrɔ, a sigituma na masaya la. A ye saan bi duuru ni duuru kɛ masaya la Zeruzalɛmu. A bamuso tɔgɔ tun ko Ɛfisiba.

² Manase ye kojugu kɛ Masaba ɲakɔrɔ. Masaba tun ye siya minw gwɛn ka bɔ Isirayɛlidenw ɲa, a ye olu ka landajuguw le ɲɔgɔn kɛ.

³A facɛ Ezekiyasi tun ye sɔnnikɛyɔrɔ minw cɛn, a ye olu lalaga ka lɔ tugu, ka Baali sɔnyɔrɔ dɔw lɔ, ka Asera jaaw tutu i n'a fɔ Isirayɛli mara masacɛ Akabu tun y'a kɛ cogo min na, ani k'a kunbiri gwan lolow ni kalo, ani tile kɔrɔ k'u bato.

⁴ A ye sarakabɔyɔrɔ dɔ wɛrɛw lɔ Masaba ka soo kɔnɔ Zeruzalɛmu, Masaba tun kɔnna k'a fɔ ko ale bena sigi yɔrɔ min na.

⁵A ye sarakabɔyɔrɔw lɔ lolow ni kalo ani tile tɔgɔ la Masaba ka soo lukɛnɛ fila nunu kɔnɔ.

⁶A y'a dencɛ jɛni ka joo sɔn n'a ye, ani ka filɛli kɛ. A tagara sukɔrɔ welebagaw ni lagwɛlikɛlaw fɛ. A ye kojugu caaman kɛ Masaba ɲakɔrɔ k'a dimi.

⁷ Masaba tun y'a fɔ Dawuda n'a dencɛ Solomani ye ko ale bena sigi soo min kɔnɔ Zeruzalɛmu, ko ale ye yɔrɔ min woloma k'a kɛ a batoyɔrɔ ye tuma bɛɛ Isirayɛli kɔmɔgɔw bɛɛ cɛma, a tun ye Asera jaa min dilan, a nana o bila o soo nin kɔnɔ.

⁸Ko ni Isirayɛlidenw banbana k'ale ka fɔta bɛɛ bato ni sariya kɔnɔnakuma bɛɛ, ale ka baarakɛla Musa tun ye min di u ma, ko ale ten'a kɛ u be bɔ jamana nin kɔnɔ tugu, ale tun ye min di u faaw ma.

⁹Nga u ma mɛnni kɛ. Manase y'a kɛ u filila, ka kojugu kɛ. Masaba ye siya minw halaki ka bɔ u ɲa, olu yɛrɛ tun ma o kojugu nin ɲɔgɔn kɛ.

¹⁰O la, Masaba y'a ka baarakɛlaw, kiraw ci ka kuma u fɛ ko:

¹¹«Zuda mara masacɛ Manase ye kojugu nunu kɛ minkɛ, amoriw tun ma min ɲɔgɔn kɛ, ani k'a kɛ Zuda mara mɔgɔw ye kojugu kɛ a ka josɔnko la minkɛ,

¹²o la, Masaba, Isirayɛli ka Ala ko: ‹Ne ben'a to kojugu dɔ be se Zeruzalɛmu ni Zuda mara ma, fɔɔ o koo nin mɛnbagaw bɛɛ be sumaya.

¹³N ye Samari dugu ni Akabu ka soo halaki cogo min na, n bena Zeruzalɛmu halaki o cogo kelen na fana. Mɔgɔ be tasa kɔnɔ ko, k'a yɛlɛma cogo min na, ne bena Zeruzalɛmu kɛ ten.

¹⁴Mɔgɔ minw ye ne taw ye, ne bena u tɔɔ labila, k'u don u juguw bolo. U juguw bɛɛ bena se u kɔrɔ k'u bololafɛnw ta.

¹⁵Bari kabini u faaw bɔtuma Ezipiti fɔɔ ka na se bii ma, u b'a la ka kojugu kɛ ne ɲakɔrɔ ka n dusu dimi.› »

¹⁶Manase ye mɔgɔ caaman faga gwansan Zeruzalɛmu dugu kɔnɔ yɔrɔ bɛɛ. A ma dan o ma, a y'a kɛ Zuda mara mɔgɔw ye kojugu kɛ Masaba ɲakɔrɔ.

¹⁷Manase ka kɛwali tɔw, a ka baara bɛɛ, n'a ye hakɛ min kɛ, o be sɔrɔ Zuda mara masaw ka loon o loon kibaru sɛbɛ kɔnɔ.

¹⁸Manase sara, u y'a suu don a ka nankɔ la, min b'a ka soo gɛrɛfɛ, u be min wele ko Uza ka nankɔ. O kɔ, a dencɛ Amɔn sigir'a nɔɔ na masaya la.

¹⁹Amɔn tun ye saan mugan ni fila sɔrɔ, ka sɔrɔ ka sigi masaya la. A ye saan fila kɛ masaya la Zeruzalɛmu. A bamuso tɔgɔ tun ko Mesulɛmɛti, Arusi denmuso tun lo ka bɔ Yɔtiba.

²⁰Amɔn ye kojugu kɛ Masaba ɲakɔrɔ i n'a fɔ a facɛ Manase.

²¹A facɛ ye sira min ta, ale fana ye o sira kelen le ta fana tigitigi. A facɛ tun ye joo minw sɔn, a fana ye olu le sɔn k'a kunbiri gwan u kɔrɔ.

²²A banna Masaba, a faaw ka Ala la, a m'a ka sira taama.

²³A ka kɛlɛdenw kuntigiw ye janfa siri a la, k'a faga masaso kɔnɔ.

²⁴Nga jamana kɔnɔ mɔgɔw wilila k'a janfabaga nunu bɛɛ faga. O kɔ, u y'a dencɛ Zoziyasi kɛ masacɛ ye a nɔɔ na.

²⁵Amɔn ka kɛwali tɔw, a ye koo min kɛ, olu be sɔrɔ Zuda mara masaw ka loon o loon kibaru sɛbɛ kɔnɔ.

²⁶U y'a suu don a yɛrɛ ka kaburu kɔnɔ Uza ka nankɔ la. A dencɛ Zoziyasi sigir'a nɔɔ na masaya la.