Read dyu Masacɛw ka kitabu filanan 24 Bible Online

Masacɛw ka kitabu filanan 24 - dyu bible

Masacɛw ka kitabu filanan 24

¹ Yoyakimu ka tile la, Babilɔni masacɛ Nabukodonozɔri nana don Zuda mara la. A sera Yoyakimu kɔrɔ, a tor'a bolo fɔɔ saan saba. Nga Yoyakimu murutir'a ma tugu.

²Masaba y'a to kɛlɛden dɔw bɔra Babilɔni jamana na, dɔw bɔra Siri jamana na, ani dɔw bɔra mowabuw fɛ ni amoniw fɛ ka na Yoyakimu kama, janko ka mara nin halaki, ka kɛɲɛ ni ale Masaba ka kuma ye, a ka baarakɛlaw, kiraw tun ye min fɔ.

³O koo nunu kɛra ka kɛɲɛ ni Masaba ka fɔta ye. A tun b'a fɛ Zuda mara mɔgɔw ka cɛ ka bɔ ale ɲakɔrɔ masacɛ Manase ka kojugu bɛɛ kama.

⁴Manase tun ye mɔgɔw faga gwansan ka Zeruzalɛmu dugu kɔnɔ bɛɛ fa kojugu la fɔɔ Masaba ma sɔn k'o yafa.

⁵Yoyakimu ka kɛwali tɔw, n'a ka baara bɛɛ, o be sɔrɔ Zuda mara masaw ka loon o loon kibaru sɛbɛ kɔnɔ.

⁶Yoyakimu sara, a dencɛ Yoyakin sigir'a nɔɔ na masaya la.

⁷Ezipiti masacɛ tun te sɔn ka bɔ a ka jamana kɔnɔ tugu, bari Babilɔni masacɛ tun y'a ka yɔrɔ bɛɛ minɛ, k'a ta Ezipiti kɔɔ ma fɔɔ ka taga se Efarati baji ma.

⁸ Yoyakin tun ye saan tan ni seegi sɔrɔ, ka sɔrɔ ka sigi masaya la. A ye kalo saba kɛ masaya la Zeruzalɛmu. A bamuso tɔgɔ tun ko Newusita, Ɛlinatan denmuso tun lo ka bɔ Zeruzalɛmu.

⁹A ye kojugu kɛ Masaba ɲakɔrɔ i n'a fɔ a facɛ tigitigi.

¹⁰O waati la, Babilɔni masacɛ Nabukodonozɔri ka kɛlɛkuntigiw wilila ka na Zeruzalɛmu datugu.

¹¹K'u t'o la, Nabukodonozɔri yɛrɛ nana fana dugu nin kama.

¹² O la, Zuda mara masacɛ Yoyakin bɔra dugu kɔnɔ n'a bamuso, n'a ka dakɔrɔsigiw, n'a ka ɲamɔgɔw, n'a ka kɛlɛkuntigiw, k'a yɛrɛ d'a ma. Babilɔni masacɛ y'a minɛ ale ka masaya saan seeginan na.

¹³Ka kɛɲɛ ni Masaba ka kuma ye, nafolo min bɛɛ tun be Masaba ka soo kɔnɔ, ni masacɛ ka soo kɔnɔ, Babilɔni masacɛ y'o bɛɛ cɛ ka bɔ n'a ye. Isirayɛli jamana masacɛ Solomani tun ye minan minw bɛɛ dilan ni sanu ye Masaba ka soo kama, a ye olu bɛɛ ci.

¹⁴A ye Zeruzalɛmu dugu mɔgɔw bɛɛ cɛ ka taga n'u ye, ɲamɔgɔw bɛɛ, ani mɔgɔbabaw bɛɛ. Mɔgɔ minw minɛna ka taga, olu tun be mɔgɔ waa tan (10 000) bɔ, bololabaarakɛlaw ni konnigɛdilanbagaw niin te o la. A tun ye jamana dɛsɛbagatɔw dama le to yen.

¹⁵ A ye masacɛ Yoyakin minɛ ka taga n'a ye Babilɔni. A ye masacɛ bamuso, n'a ka musow, n'a ka soo kɔnɔ baarakɛbagaw, ni jamana kɔnɔ mɔgɔbabaw fana minɛ ka bɔ n'u ye Zeruzalɛmu ka taga n'u ye Babilɔni.

¹⁶A ye mɔgɔbabaw bɛɛ minɛ ka taga n'u ye Babilɔni, u tun ye mɔgɔ waa wolonwula (7 000) ye, ani bololabaarakɛlaw, ni konnigɛdilanbagaw mɔgɔ waa kelen (1 000), bari barika tun be u bɛɛ la n'u be se kɛlɛ la.

¹⁷ A ye Yoyakin facɛfitini Mataniya sigi a nɔɔ na masaya la. A y'a tɔgɔ yɛlɛma ko Sedesiyasi.

¹⁸ Sedesiyasi tun ye saan mugan ni kelen sɔrɔ, ka sɔrɔ ka sigi masaya la. A ye saan tan ni kelen kɛ masaya la Zeruzalɛmu. A bamuso tɔgɔ tun ko Amutali, Yirimeyawu denmuso tun lo ka bɔ Libina.

¹⁹Sedesiyasi ye kojugu kɛ Masaba ɲakɔrɔ i n'a fɔ Yoyakimu tigitigi.

²⁰ O koo nunu tun kɛra Zeruzalɛmu ni Zuda mara la, Masaba ka dimi kosɔn fɔɔ a y'u bɔ a yɛrɛ ɲakɔrɔ pewu. Sedesiyasi murutira Babilɔni masacɛ ma.