Read dyu Masacɛw ka kitabu filanan 4 Bible Online

Masacɛw ka kitabu filanan 4 - dyu bible

Masacɛw ka kitabu filanan 4

¹Loon dɔ, kiraw jɛnkulu deen dɔ ka muso bɔra ka pɛrɛn k'a fɔ Elize ye ko: «Ne cɛɛ, i ka baarakɛla sara. I y'a lɔn ko a tun be siran Masaba ɲa. Jurutigi nana ko a be na n dencɛ fila minɛ ka taga u kɛ a ka jɔɔnw ye.»

²Elize y'a fɔ a ye ko ale be se ka mun le kɛ a ye. Ko mun le be sɔrɔ a fɛ soo kɔnɔ, ko a k'o fɔ ale ye. A y'a fɔ ko: «Foyi t'i ka baaraden fɛ soo kɔnɔ fɔɔ tulu dɔɔni, daga kɔnɔ.»

³Elize y'a fɔ ko: «Taga dagaw daali i sigiɲɔgɔnw bɛɛ fɛ, u lakolonw, u ka caya.

⁴I ka na don soo kɔnɔ ka daa tugu e yɛrɛ n'i dencɛw kan, ka to ka tulu nin yɛlɛma o daga nunu bɛɛ kɔnɔ. Min mana fa, e k'o bila gɛrɛfɛ.»

⁵A bɔra Elize kɔrɔ ka taga don soo kɔnɔ ka daa tugu a yɛrɛ n'a dencɛw kan. A deenw tora ka daga nunu ta ka na n'u ye a fɛ, n'a be tulu nin yɛlɛmana u kɔnɔ.

⁶Daga nunu bɛɛ fara tuma min na, a y'a fɔ a dencɛ dɔ ye ko a ka na ni dagalakolon dɔ ye tugu, ale y'a jaabi ko daga nunu bɛɛ banna. O tuma na, tulu lɔra.

⁷A tagara o fɔ Ala ka mɔgɔ nin ye. Ale y'a fɔ a ye ko: «Taga tulu nin feere k'i ka juru nin sara. O kɔ, aw ben'a tɔɔ kɛ aw ka balo ye, e n'i dencɛw.»

⁸Loon dɔ, Elize tun be tɛmɛna Sunamu dugu kɔnɔ. O y'a sɔrɔ muso nafolotigi dɔ tun be yen, ale y'a ɲini Elize fɛ ko a ka sabali ka na dumuni kɛ ale fɛ. O kɔ, a tun mana tɛmɛ yen tuma o tuma, a tun be to ka don ka dumuni kɛ a fɛ.

⁹Muso nin y'a fɔ a cɛɛ ye ko ale y'a lɔn ko cɛɛ min be to ka na u fɛ, ko Ala ka mɔgɔɲuman lo.

¹⁰Ko a k'a to u be sodennin dɔ lɔ a ye u ka boon sanfɛ ka dilan bila a kɔnɔ, ni tabali ani sigilan ni fitinɛ. Ko n'a nana u fɛ tuma min na, a be si o yɔrɔ la.

¹¹Loon dɔ, Elize nana Sunamu a yɛlɛla sangaso nin kɔnɔ ka la yen.

¹²O kɔ, a y'a fɔ a ka baaraden Geyazi ye ko a ka Sunamu muso nin wele. Geyazi y'a wele, muso nin nana lɔ Elize ɲakɔrɔ.

¹³Elize y'a fɔ Geyazi ye ko a k'a fɔ muso nin ye ko a y'a yɛrɛ sɛgɛn olu kosɔn kosɔbɛ, k'olu be se ka mun le kɛ a ye. A b'a fɛ olu k'a koo fɔ masacɛ ye wa, walima kɛlɛdenw kuntigi ye. Muso nin y'a fɔ ko ale be a ka siya le cɛma, ko baasi te yen.

¹⁴Elize y'a fɔ tugu ko: «An be se ka mun le kɛ a ye?» O la, Geyazi y'a fɔ ko: «Dencɛ t'a fɛ, a cɛɛ fana kɔrɔla.»

¹⁵Elize ko a k'a wele a ka na. Geyazi y'a wele, a nana lɔ daa la.

¹⁶ Elize y'a fɔ a ye ko: «Saan wɛrɛ, nin waati nin ɲɔgɔn na, i bena dencɛ minɛ i bolo.» A ko: «Ee ne matigi, Ala ka mɔgɔ, kana i ka baaraden nigɛ!»

¹⁷Muso nin ye kɔnɔ ta, ka dencɛ wolo o waati nin ɲɔgɔn na saan wɛrɛ, ka kɛɲɛ ni Elize ka fɔta ye a ye.

¹⁸Deen tora ka boɲa. Loon dɔ, a tagar'a facɛ kɔ sumantigɛlaw fɛ.

¹⁹A y'a fɔ a facɛ ye ko: «Ne kuun be dimi, ne kuun be dimi!» A facɛ y'a fɔ a ka baaraden dɔ ye ko ale k'a ta ka ta'a di a bamuso ma.

²⁰Baaraden nin y'a ta ka ta'a di a bamuso ma. Deen nin tor'a bamuso seen kan fɔɔ ka taga se tilegwan ma. O kɔ, a sara.

²¹Muso nin yɛlɛla ka deen nin suu la Ala ka mɔgɔ nin ka dilan kan, ka bɔ ka daa tugu a la,

²²ka ta'a cɛɛ wele ko ale b'a ɲini a fɛ a ka baaraden kelen bila ka na ale fɛ ni fali kelen ye, ko ale bena taga Ala ka mɔgɔ fɛ joona joona, ka sɔrɔ ka na.

²³A cɛɛ y'a ɲininga ko: «Mun na i b'a fɛ ka taga Ala ka mɔgɔ fɛ bii? Bii do te kalokura ɲanagwɛ loon ye, walima lafiɲɛlon.» Muso nin y'a jaabi ko foyi tɛ.

²⁴A ye fali labɛn. A y'a fɔ baaraden nin ye ko a ka sira minɛ u be taga, ko a kana lɔ sira kan n'ale m'a fɔ ko a ka lɔ.

²⁵A tagara se Ala ka mɔgɔ fɛ Karimɛli kulu kan. Ala ka mɔgɔ y'a ye tuma min na yɔrɔjan, a y'a fɔ a ka baaraden Geyazi ye ko: «Sunamu muso nin natɔ filɛ.

²⁶Boli ka ta'a kunbɛn k'a fɔ a ye ko: ‹I ka kɛnɛ wa? I cɛɛ do? I deen do?› » Muso nin y'a jaabi ko hɛrɛ dɔrɔn le be yen.

²⁷A sera kulu nin kan Ala ka mɔgɔ gɛrɛfɛ tuma min na, a ye Ala ka mɔgɔ nin seen minɛ. Geyazi gwɛrɛl'a la janko k'a ɲɔti ka bɔ yen. Nga Ala ka mɔgɔ y'a fɔ ko a k'a to yen, ko bari a dusu le kasinin be, ko Masaba fana ma o yira ale la k'a lasɔmi.

²⁸Muso nin y'a fɔ ko: «Ne tun ye dencɛ daali i fɛ wa, n matigi? N tun m'a fɔ i ye ko i kana ne nigɛ wa?»

²⁹Elize y'a fɔ Geyazi ye ko: «I cɛɛ siri ka ne ka bere ta i bolo ka taga. N'i ye mɔgɔ kunbɛn, i kan'a fo, ni min y'i fo, kan'a laminɛ. Taga ne ka bere la deen nin ɲaa kan.»

³⁰Deen nin bamuso y'a fɔ ko: «Masaba kosɔn, ani ka e Elize to sii la, ne tena bɔ e kɔrɔ.» O la, Elize wilila ka tugu a kɔ.

³¹Geyazi bilara u ɲa ka taga bere nin la deen nin ɲaa kan, nga mankan ma bɔ, foyi ma kɛ. O la, a kɔsegira ka na Elize kunbɛn, k'a fɔ a ye ko deen nin ma kunun.

³²Elize sera soo tuma min na, tiɲɛ na, deen nin tun sara, a suu tun lanin be Elize ka dilan kan.

³³Elize donna ka daa tugu ale ni deen suu la, ka Masaba daali.

³⁴ O kɔ, a lara deen nin suu kan, k'a daa la a daa kan, k'a ɲaa la a ɲaa fana kan, ani k'a bolow la a bolow kan. Ka to a kan ten, deen nin farisogo gwanna tugu.

³⁵A wilila ka to ka yaalayaala soo kɔnɔ, ka kɔsegi ka na la deen nin suu kan tugu. Deen nin tisora siɲɛ wolonwula, k'a ɲaa yɛlɛ.

³⁶Elize ye Geyazi wele, ko a ka Sunamuka muso nin wele. Geyazi y'a wele, a nana Elize fɛ. Ale y'a fɔ a ye ko a k'a deen ta.

³⁷Muso nin tagar'a kunbiri gwan Elize kɔrɔ k'a ɲaa biri duguma. O kɔ, a y'a deen minɛ ka bɔ.

³⁸Elize kɔsegira ka na Giligali, o y'a sɔrɔ kɔngɔ tun be jamana kɔnɔ. Kiraw ka jɛnkulu nana sigi a kɔrɔ. O la, a y'a fɔ a ka baaraden ye ko a ka dagaba sigi ka dumuni dɔ tobi u ye.

³⁹U dɔ bɔra ka taga kongo kɔnɔ ka furaburu ɲini. A ye suun dɔ woyonin ye kongo kɔnɔ. A y'o deen dɔw tigɛ k'a ka fani fa. A nana se soo tuma min na, a y'o tigɛtigɛ k'o don dumuni nin na daga kɔnɔ, u tun te yiriden nunu lɔn.

⁴⁰U ye dumuni nin bɔ k'a di u ma, u y'a nɛnɛ dɔrɔn, u kulera ko: «Ala ka mɔgɔ, mɔgɔfagafɛn be dumuni nin kɔnɔ!» U ma se k'a dumu.

⁴¹Elize y'a fɔ ko u ka na ni mugu ye. A ye mugu don a kɔnɔ, k'a fɔ ko u k'a bɔ k'a di mɔgɔw ma u ka dumuni kɛ. O tuma na, fɛnjugu nin tun te dumuni kɔnɔ tugu.

⁴²O kɔ, cɛɛ dɔ bɔra Baalisalisa ka na n'a ka suman fɔlɔ buru ye, k'o di Ala ka mɔgɔ ma, burukun mugan, ni sumankura kisɛ, bɔɔrɔ kɔnɔ. Elize y'a fɔ ko u k'o di mɔgɔ nunu ma u b'o dumu.

⁴³A ka baaraden y'a fɔ a ye ko ale bena se k'o tilan mɔgɔ kɛmɛ cɛ cogo di. Nga Elize y'a fɔ a ye ko a k'o di mɔgɔ nunu ma u b'o dumu, ko bari Masaba y'a fɔ ko u bena dumuni kɛ k'a tɔɔ to.

⁴⁴A ye buru nunu ta k'u tilan u cɛ, u ye dumuni kɛ. A tɔɔ tora i ko Masaba tun y'a fɔ cogo min na.