Read dyu Masacɛw ka kitabu filanan 6 Bible Online

Masacɛw ka kitabu filanan 6 - dyu bible

Masacɛw ka kitabu filanan 6

¹Kiraw jɛnkulu deenw y'a fɔ Elize ye ko: «An be to ka ɲɔgɔn lajɛn yɔrɔ min na n'i ye, o dɔgɔyara anw ma dɛ.

²An ka taga Zurudɛn baji daa la, an kelen kelen bɛɛ bena lɔgɔ kelen kelen ta, an bena boon dɔ kɛ an yɛrɛ ye yan yɔrɔ la.» Elize y'a fɔ u ye ko u ka taga.

³U kelen ko: «Sɔn ka taga n'i ka baaradenw ye.» A ko: «N bena taga n'aw ye.»

⁴A tagara n'u ye. U sera Zurudɛn baji daa la, k'a daminɛ ka yiriw tigɛ.

⁵K'u dɔ to yiritigɛ la, a ka jendeden bɔra ka ben jii kɔnɔ. A kulera ko: «Wayi, n matigi! Ne tun ye jende nin minɛ mɔgɔ dɔ lo fɛ.»

⁶Elize y'a ɲininga ko: «Jendeden nin benna min?» A y'a benyɔrɔ yira. Elize ye lɔgɔ dɔ tigɛ k'o fili a benyɔrɔ nin na, jendeden nin wilila ka yɛlɛ jii sanfɛ.

⁷O kɔ, Elize y'a fɔ a ye ko a k'a bɔ, a y'a bolo kɛ k'a bɔ.

⁸Siri masacɛ tun be kɛlɛla ni Isirayɛli mara masacɛ ye. A ye ɲɔgɔnye kɛ n'a ka kɛlɛkuntigiw ye, a y'a latigɛ ko ale ka kɛlɛdenw sigiyɔrɔ bena kɛ yanfɛ yen.

⁹Ala ka mɔgɔ ye cira bila Isirayɛli mara masacɛ fɛ ko a k'a yɛrɛ kɔlɔsi, ko a kana tɛmɛ o yɔrɔ nin na, ko bari Sirikaw bena bɔ yen.

¹⁰O la, Isirayɛli mara masacɛ ye mɔgɔ dɔw bila ka taga yɔrɔ nin kɔlɔsi. Ala ka mɔgɔ y'o ɲɔgɔn fɔ a ye siɲɛ caaman n'a be to k'a yɛrɛ minɛcogo lɔn.

¹¹O le ye Siri masacɛ hakili ɲagami. A y'a ka kɛlɛkuntigiw wele k'a fɔ u ye ko mɔgɔ min bɛnnin be ni Isirayɛli mara masacɛ ye u cɛma, k'u t'o tigi fɔ ale ye wa?

¹²Kɛlɛkuntigi nunu dɔ y'a fɔ ko: «O tigi te yan, masacɛ, ne matigi. Kira Elize min be Isirayɛli mara la, ni e ye koo min fɔ i ka layɔrɔ la, ale lo be to k'o kuma nin fɔ Isirayɛli mara masacɛ ye.»

¹³Masacɛ y'a fɔ ko: «Aw ye ta'a sigiyɔrɔ filɛ ka na. Ne bena mɔgɔw bila u b'a minɛ.» U nan'a fɔ ko a be Dotan dugu kɔnɔ.

¹⁴A ye soow ni wotorow ni kɛlɛden caaman ci yen. Olu tagara sufɛ ka dugu lamini.

¹⁵Ala ka mɔgɔ ka baaraden wilila sɔgɔma joona ka bɔ dugu kɔnɔ, a ye kɛlɛdenw ye, ani soow ni wotorow. A y'a fɔ Ala ka mɔgɔ ye ko: «An bena kɛ di, ne matigi?»

¹⁶Ala ka mɔgɔ nin y'a fɔ ko: «Kana siran, bari mɔgɔ minw be anw fɛ, o ka ca n'u ta ye.»

¹⁷Elize ye Masaba daali ko a ka baaraden nin ɲaa yɛlɛ, janko a ka yeli kɛ. Masaba y'a ɲaa yɛlɛ, a ye soow ni wotoro tasumalamanw ye, u fanin be kulu kan ka Elize lamini.

¹⁸Sirikaw tun be nana Elize fɛ. Elize ye Masaba daali ko a ka jama nin kɛ fiɲɛntɔw ye. Masaba y'u ɲaa fiɲɛn ka kɛɲɛ ni Elize ka kuma ye.

¹⁹O kɔ, Elize y'a fɔ u ye ko: «Aw filila sira ma, aw be taga dugu min na, yan tɛ. Aw be mɔgɔ min ɲinina, aw ye na ne bena aw bila sira a fɛ.» A kɛra ten, a bilara u ɲa ka taga Samari.

²⁰U donna Samari dugu kɔnɔ tuma min na, Elize y'a fɔ ko Masaba k'u ɲaa yɛlɛ janko u ka yeli kɛ. Masaba y'u ɲaa yɛlɛ, u y'a ye ko u be Samari dugu le kɔnɔ.

²¹Isirayɛli mara masacɛ y'u ye tuma min na, a ko Elize ma: «Ne faa, n k'u faga wa? N k'u faga wa?»

²²Elize y'a fɔ a ye ko: «Kan'u faga. O tuma na, i ye mɔgɔ minw kɛlɛ k'u minɛ ni murujan, walima kala ye, i be to k'olu faga wa? Dumuni ni jii di u ma, janko u ka dumuni kɛ ka minni kɛ, o kɔ, u ka taga u kuntigi fɛ.»

²³Isirayɛli mara masacɛ ye dumuniba labɛn k'a di u ma, u ye dumuni kɛ ka minni kɛ. O kɔ, a y'u bila ka taga. U kɔsegira u kuntigi fɛ. O la, Sirikaw ma segi ka na Isirayɛli mara la k'u be ben u kan tugu.

²⁴Waati dɔ tɛmɛnin kɔ, Siri masacɛ Bɛnadadi y'a ka kɛlɛdenw bɛɛ lajɛn ka taga Samari dugu datugu.

²⁵O la, kɔngɔ donna Samari dugu kɔnɔ, ka gwɛlɛya kosɔbɛ. U ye dugu datugu ka mɛn fɔɔ u tun be fali kungolo feere warigwɛ kuru bi seegi la, ani jɛnɛtuba ka boo [1] tun be falen warigwɛ kuru duuru la.

²⁶Loon dɔ, ka masacɛ to n'a be yaalayaala la kogo sanfɛ, muso dɔ kulera ko: «Masacɛ, ne matigi, n dɛmɛ!»

²⁷Masacɛ y'a jaabi ko: «Ni Masaba ma i dɛmɛ, ne bena se k'i dɛmɛ ni mun ye? Suman te yen, duvɛn fana te yen.»

²⁸O kɔ, masacɛ y'a ɲininga ko: «Mun le kɛra?» A y'a fɔ ko: «Muso nin tun y'a fɔ ne ye ko ne ka n dencɛ di an b'a ɲimi o loon na, ko sini an bena ale ta ɲimi fana.

²⁹ An ye ne ta tobi k'o ɲimi ka ban. Loon wɛrɛ, ne y'a fɔ ko a ka na n'a deen ye an b'o ɲimi, a y'a ta k'a dogo.»

³⁰Masacɛ y'o muso nin ka kuma mɛn dɔrɔn, a y'a ka faniw faran. A tun be tɛmɛna kogo nin kan minkɛ, jama ye dusukasifani ye a kannafani jukɔrɔ.

³¹A kalila ko ni ale ma Safati dencɛ Elize kungolo tigɛ bii, Ala kana ale to fewu.

³²O y'a sɔrɔ Elize tun siginin be a ka soo kɔnɔ, cɛkɔrɔbaw tun siginin be a gɛrɛfɛ. Masacɛ ye mɔgɔ dɔ bila ka ta'a fɛ. Nga sanni o ciden nin ka se, Elize y'a fɔ cɛkɔrɔba nunu ye ko: «Aw k'a filɛ dɛ, mɔgɔfagala nin ye mɔgɔ dɔ ci ka na ne kuun tigɛyɔrɔ. N'a nana se, aw ka daa tugu, aw kan'a to a be don. A kuntigi yɛrɛ seen mankan te nin ye n'a be nan'a kɔfɛ wa?»

³³Ka Elize to o kuma na u fɛ, ciden ni masacɛ ser'a fɛ, k'a fɔ ko: «Kojugu nin bɔra Masaba le fɛ. An ka kan ka mun le kɔnɔ Masaba fɛ tugu?»