Read dyu Masacɛw ka kitabu filanan 9 Bible Online

Masacɛw ka kitabu filanan 9 - dyu bible

Masacɛw ka kitabu filanan 9

¹Kira Elize ye kiraw jɛnkulu deen dɔ wele k'a fɔ a ye ko: «I cɛɛ siri ka tulubara nin ta, ka taga Aramɔti, Galaadi mara la.

²N'i sera, i ka cogo ɲini ka Nimusi deen Zozafati dencɛ Zewu ye. I k'a wele ka bɔ n'a ye a balimaw cɛma, ka don n'a ye soo dɔ kɔnɔ gɛrɛfɛ.

³I ka tulubara nin ta ka tulu bɔn a kuun na k'a fɔ a ye ko: ‹Masaba y'a fɔ ko ale b'i woloma ka kɛ masacɛ ye Isirayɛlidenw kunna.› N'i y'o kɛ ka ban, i be daa yɛlɛ ka bɔ ka boli joona!»

⁴Kira kanbelen nin tagara Aramɔti, Galaadi mara la.

⁵A tagara se dɔrɔn, a ye kɛlɛdenw kuntigiw ye, u tun be ɲɔgɔnye la. A y'a fɔ ko: «Kuntigi, ne mako b'i la ka kuma dɔɔni fɔ i ye.» Zewu y'a fɔ ko a kaan be mɔgɔ jumɛn le ma olu cɛma. A ko ale lo.

⁶ Zewu wilila ka don soo kɔnɔ. Kanbelen nin ye tulu bɔn a kuun na k'a fɔ ko: «Masaba, Isirayɛli ka Ala y'a fɔ ko ale y'i woloma k'i kɛ Isirayɛli mara masacɛ ye, ale Masaba ka jama kunna.

⁷Ko e bena i kuntigi Akabu ka soo halaki. Ko ale ben'a ka kiraw n'ale Masaba ka baarakɛla tɔw bɛɛ joli hakɛ bɔ Zezabɛli la, min tun y'u faga.

⁸Ko Akabu ka soo bɛɛ bena halaki. Ko ale ben'a ka somɔgɔ cɛmanw bɛɛ halaki ka bɔ Isirayɛlidenw cɛma, a jɔɔn fara hɔrɔn kan.

⁹Ko ale bena Akabu ka soo kɛ i n'a fɔ Nebati dencɛ Zerobowamu ta, ani Aya dencɛ Bayesa ka soo.

¹⁰ Ko wuluw le bena Zezabɛli suu ɲimi Zizireyɛli kongo kɔnɔ. Mɔgɔ tena sɔrɔ min ben'a suu don.» O kɔ, kanbelen nin ye boon daa yɛlɛ ka bɔ ka boli.

¹¹Zewu bɔr'a kuntigi ka kɛlɛkuntigiw fɛ tuma min na, olu y'a ɲininga ko: «Hɛrɛ lo wa? Mun na fatɔcɛ nin nana i fɛ?» Zewu y'u jaabi ko: «Aw be cɛɛ nin n'a ka fɔta lɔn sa.»

¹²Nga u y'a jaabi ko: «Galon lo, a fɔ an ye.» O la, a y'a fɔ u ye ko: «Masaba y'a fɔ ko ale ye ne woloma ka kɛ Isirayɛli mara masacɛ ye.»

¹³O yɔrɔnin kelen, u kelen kelen bɛɛ y'u ka faniw ta k'u bila bonda yɛlɛyɛlɛnan kan janko Zewu ka sigi. U ye buru fiyɛ ko Zewu kɛra masacɛ ye.

¹⁴Nimusi deen Zozafati dencɛ Zewu ye janfa siri Zoramu na. O waati nin na, Zoramu ni Isirayɛli mara kɛlɛdenw bɛɛ tun be Siri masacɛ Azayɛli kɛlɛla Aramɔti kama, Galaadi mara la.

¹⁵Nga o tun y'a sɔrɔ Sirikaw tun ye Zoramu mandimi Siri masacɛ Azayɛli kɛlɛyɔrɔ la, n'a kɔsegira Zizireyɛli o mandiminɔ nin furakɛyɔrɔ la. Zewu y'a fɔ a tɔɲɔgɔnw ye ko n'a diyara u ye, ko mɔgɔ si kana bɔ dugu kɔnɔ ka taga o kibaru nin fɔ Zizireyɛli.

¹⁶O kɔ, Zewu yɛlɛl'a ka wotoro kɔnɔ ka taga Zizireyɛli. Bari Zoramu tun lanin be yen, Zuda mara masacɛ Akaziyasi tun tagar'a filɛyɔrɔ la.

¹⁷Kɔlɔsilikɛbaga min tun be Zizireyɛli, sangaso kɔnɔ, ale ye Zewu ka kɛlɛdenw natɔ ye, k'a fɔ ko ale ɲaa be kɛlɛden dɔw natɔ la. Zoramu y'a fɔ a ye ko a ka sotigi dɔ ci a ka taga u kunbɛn k'u ɲininga ni hɛrɛ lo.

¹⁸O sotigi nin tagara Zewu kunbɛn k'a fɔ a ye ko: «Masacɛ ko hɛrɛ lo wa?» Zewu y'a jaabi ko hɛrɛko b'a ka sira la wa? Ko a ka tɛmɛ ka tugu ale kɔ. Kɔlɔsilikɛbaga nin y'a fɔ ko: «Ciden nin tagara se u fɛ, nga a te segira ka na.»

¹⁹Masacɛ ye sotigi filanan ci tugu, ale fana sera u fɛ k'a fɔ ko: «Masacɛ ko hɛrɛ lo wa?» Zewu y'a jaabi ko: «Hɛrɛko b'i ka sira la wa? Tɛmɛ ka tugu ne kɔ.»

²⁰Kɔlɔsilikɛbaga nin y'a fɔ ko: «Sotigi nin tagara se u fɛ, nga ale fana te segira ka na. A bolicogo be i n'a fɔ Nimusi dencɛ Zewu ta, ale be boli i n'a fɔ fatɔ.»

²¹O la, Zoramu y'a fɔ ko u k'ale ka wotoro labɛn, u y'a labɛn. Isirayɛli mara masacɛ Zoramu, ni Zuda mara masacɛ Akaziyasi bɔra n'u ka wotorow ye k'u be taga Zewu kunbɛn. U y'a kunbɛn Zizireyɛlika Nabɔti ka foro kɔnɔ.

²²Zoramu ye Zewu ye tuma min na, a y'a fɔ ko: «Hɛrɛ lo wa, Zewu?» Zewu y'a jaabi ko: «O ye mun hɛrɛ ye, k'i bamuso Zezabɛli ka josɔnko n'a ka subagaya to yen?»

²³Zoramu y'a ka wotoro ɲaa yɛlɛma ka boli ta. A y'a fɔ Akaziyasi ye ko: «Janfa lo, Akaziyasi!»

²⁴Zewu y'a ka kala ta ka Zoramu bon k'a sɔrɔ a kɔɔ la a gaman cɛma, fɔɔ biɲɛ nin donna k'a dusukun sɔgɔ ka bɔ. A benna ka sa a ka wotoro kɔnɔ.

²⁵Zewu y'a fɔ a ka kɛlɛdenw kuntigi Bidikari ye ko: «A suu bɔ k'a fili Zizireyɛlika Nabɔti ka foro kɔnɔ. I hakili jigi Masaba ka fɔta la a facɛ Akabu kosɔn, tuma min na an tun be wotoro kɔnɔ Akabu kɔfɛ.

²⁶ Masaba tun ko: ‹N ye Nabɔti n'a dencɛw joli bɔnnin ye kunun. Ne bena o hakɛ bɔ i la foro kelen kelen nin kɔnɔ. Ne Masaba ko ten.› » Zewu ko u ka Zoramu suu bɔ k'a fili foro nin kɔnɔ ka kɛɲɛ ni Masaba ka fɔta ye.

²⁷Zuda mara masacɛ Akaziyasi y'o ye minkɛ, a ye boli ta ka Bɛtigan sira minɛ. Zewu y'a kɔgwɛn, a k'u k'ale fana faga. U y'a mandimi a ka wotoro kɔnɔ Guru sira kan, Yibileyamu masurun na. A bolila ka taga don Megido dugu kɔnɔ, ka sa o yɔrɔ la.

²⁸A ka baaradenw y'a suu ta ka taga n'a ye Zeruzalɛmu, wotoro kɔnɔ. U y'a suu don Dawuda ka ciin na, a faaw ka kaburu kɔnɔ.

²⁹Akaziyasi tun kɛra masacɛ ye Zuda mara la, Akabu dencɛ Zoramu ka masaya saan tan ni kelennan na.

³⁰Zewu tun be donna Zizireyɛli dugu kɔnɔ tuma min na, Zezabɛli y'o mɛn. A ye kale la, k'a kuun lalaga ka taga lɔ fenɛtiri la ka to ka filɛli kɛ.

³¹Ka Zewu to n'a be donna dugu donda la dɔrɔn, muso nin y'a fɔ a ye ko: «Hɛrɛ lo wa Zimuri, [1] kuntigi fagabaga?»

³²Zewu y'a kuun kɔrɔta ka filɛli kɛ fenɛtiri la. A y'a fɔ ko jɔn le be ale kɔ, ko jɔn. Masaso ɲamɔgɔ fila, walima saba nana lɔ fenɛtiri nin na.

³³A y'a fɔ k'olu k'a ɲɔti k'a fili duguma. U y'a ɲɔti ka ben duguma, a joli dɔ serila kogo kan, ani soow kan. Zewu yɛlɛl'a kan n'a ka wotoro ye.

³⁴O kɔ, Zewu tagara don ka dumuni kɛ ka minni kɛ, ka sɔrɔ k'a fɔ ko u ka taga muso danganin nin filɛ k'a suu don, ko bari masacɛ denmuso lo.

³⁵U tagara ko u b'a suu don, u tagar'a kungolo n'a tigɛw n'a sentigɛw dama le ye.

³⁶ U kɔsegira ka na o fɔ Zewu ye. Ale y'a fɔ ko: «Masaba tun ye o le fɔ a ka baarakɛla Tisibika Eli barika la, ko wuluw le bena Zezabɛli suu ɲimi Zizireyɛli foro kɔnɔ,

³⁷ani ko a suu bena kɛ nɔgɔ ye o foro kɔnɔ, fɔɔ mɔgɔ si te se k'a fɔ ko nin le ye Zezabɛli ye.»