Read dyu Masaw ka loon o loon kibaru kitabu fɔlɔ 10 Bible Online

Masaw ka loon o loon kibaru kitabu fɔlɔ 10 - dyu bible

Masaw ka loon o loon kibaru kitabu fɔlɔ 10

¹Filisiw ye kɛlɛ kɛ ni Isirayɛlidenw ye, u bolila filisiw ɲa, mɔgɔ caaman fagara Gilibowa kulu kan.

²U sera ka Sayuli n'a deenw dɛrɛ, ka Zonatan, ni Abinadabu, ani Malikisuwa faga.

³Kɛlɛ gwanna Sayuli kɔ, kalatigiw y'a ye, u y'a mandimi.

⁴Sayuli y'a fɔ a ka kɛlɛkɛminanw tabaga ye ko a ka murujan bɔ k'ale faga janko kɛnɛkɛnɛbali nunu kana tolon kɛ ale la. Nga cɛɛ nin ma sɔn, bari a tun siranna kosɔbɛ. O la, Sayuli ye murujan juu tutu k'a yɛrɛ bila ka ben a kan.

⁵A ka kɛlɛkɛminan tabaga nin y'a ye a sara, ale fana ye murujan juu tutu k'a yɛrɛ bila ka ben a kan, ale fana sara.

⁶Sayuli n'a dencɛ saba sara ten. Sayuli ka somɔgɔw bɛɛ sara waati kelen na.

⁷Isirayɛliden minw bɛɛ tun be kɔkɛnɛ na, olu ye Isirayɛli kɛlɛdenw bolitɔ ye, ani k'a ye ko Sayuli n'a deenw sara tuma min na, u bɔra u ka duguw kɔnɔ ka boli k'u ka duguw to yen. Filisiw nana sigi u kɔnɔ.

⁸O dugusagwɛ, filisiw nana ko u bena suu nunu ka minanw ta. U ye Sayuli n'a deen nunu suuw lanin ye Gilibowa kulu kan.

⁹U y'a ka kɛlɛkɛminanw ta k'a kuun tigɛ, ka mɔgɔw ci ka yaala Filisi jamana bɛɛ kɔnɔ k'o kibaruya fɔ u ka joow ye, ani jama ye.

¹⁰U tagar'a ka kɛlɛkɛminanw bila u ka joso kɔnɔ. U ka joo min tɔgɔ ko Dagɔn, u tagar'a kungolo gwengwen o soo kɔnɔ.

¹¹Filisiw ye fɛɛn min bɛɛ kɛ Sayuli la, Yabɛsi min be Galaadi mara la, o dugu mɔgɔw bɛɛ y'o mɛn tuma min na,

¹²u ka cɛfariw bɛɛ wilila ka taga Sayuli suu, n'a deenw taw ta ka na n'u ye Yabɛsi dugu kɔnɔ, k'u kolow don teribɛntiyiri kɔrɔ, ani ka suun don tile wolonwula.

¹³ Sayuli banna ka Masaba sago kɛ, a tora tilenbaliyako la, o le y'a to a sara, bari a ma Masaba ka kuma bato, a ye suu fana wele k'a ɲininga,

¹⁴yanni a be Masaba ɲininga. O la, Masaba y'a faga k'a ka masaya di Zese dencɛ Dawuda ma.