Read dyu Masaw ka loon o loon kibaru kitabu fɔlɔ 11 Bible Online

Masaw ka loon o loon kibaru kitabu fɔlɔ 11 - dyu bible

Masaw ka loon o loon kibaru kitabu fɔlɔ 11

¹Isirayɛliden tɔw bɛɛ nana Dawuda fɛ Eburɔn k'a fɔ ko: «An ye joli kelen ye.

²Waati tɛmɛnin na, ka Sayuli to masaya la, ele lo tun be to ka bila Isirayɛlidenw ɲa ka taga kɛlɛyɔrɔ la. Masaba i ka Ala y'a fɔ i ye ko ele le ben'a ka jama Isirayɛli mara, ko e bena kɛ an kuntigi ye.»

³Isirayɛli cɛkɔrɔbaw bɛɛ wilila ka na masacɛ Dawuda fɛ Eburɔn. A bɛnna n'u ye Masaba ɲakɔrɔ. U ye tulu kɛ Dawuda kunna k'a kɛ u ka masacɛ ye ka kɛɲɛ ni Samuyɛli ka kuma ye Masaba tun ye min fɔ a ye.

⁴ Dawuda ni Isirayɛlidenw bɛɛ wilila ka taga Zeruzalɛmu kama. Min tun be wele ko Zebuzi. Zebuziw le tun siginin be mara nin kɔnɔ.

⁵Zebuziw y'a fɔ Dawuda ye ko: «I donyɔrɔ te yan.» O n'a ta bɛɛ, Dawuda sera ka *Siyɔn yɔrɔ barikaman kɛlɛ ka se a kɔrɔ. O le kɛra Dawuda ka ciin ye.

⁶A tun y'a fɔ ko ni mɔgɔ min sera ka zebuzi kelen faga, k'o tigi bena kɛ kɛlɛdenw kuntigiba ye. O la, a balimamuso Seruya dencɛ Zowabu kɔnna ka wili ka taga, ale lo kɛra kuntigi ye.

⁷O kɔ, Dawuda sigira o yɔrɔ barikaman nin na. O la, u ko Dawuda ka ciin.

⁸O kɔ, u ye dingɛ min fa ni bɔgɔ ye k'a wili, a ye lɔli wɛrɛ kɛ o yɔrɔ la dugu kɔnɔ fɔɔ ka taga se a laminikogo ma. A ye ciinw sigi k'o lamini. Zowabu tun b'a la ka dugu nin tɔɔ lalaga.

⁹Dawuda tun be barika sɔrɔla ka taga ten, bari Masaba, Setigi tun be n'a ye.

¹⁰Dawuda ka cɛfari minw ni Isirayɛlidenw bɛɛ tun jɛnna k'a kɛ masacɛ ye, ka kɛɲɛ ni Masaba ka fɔta ye Isirayɛlidenw kosɔn, olu minw fana tun y'a kɔɔ minɛ kosɔbɛ a ka masaya tile bɛɛ la, olu le ye nunu ye.

¹¹Dawuda ka cɛfariw filɛ: Yasobeyamu ka bɔ Akimoni ka fadenyabolo la, ale tun kɛra cɛfariw kuntigi saba la mɔgɔ fɔlɔ ye. A y'a ka taman kɛ ka mɔgɔ kɛmɛ saba faga kɛlɛ kelen na.

¹²Ale kɔ, Dodo dencɛ Eleyazari fana tun be yen. A mamacɛ bɔra Awowa. Ale fana tun kɛra cɛfariw kuntigi mɔgɔ saba nunu dɔ ye.

¹³Filisiw tun ye ɲɔgɔn lajɛn kɛlɛ kama, ale lo tun be n'a ye Pasidamimu. O y'a sɔrɔ sɔsɔforo dɔ tun be yen, jama tun bolila filisiw ɲa.

¹⁴Ale n'a kɔmɔgɔw lɔra foro nin cɛmancɛ la, k'a tanga cɛnni ma. U ye filisiw faga. Masaba ye see di u ma kosɔbɛ.

¹⁵Dawuda tun be Adulamu kuluwo kɔnɔ tuma min na, mɔgɔ saba bɔra cɛfari bi saba la ka ta'a fɛ farayɔrɔ la. O y'a sɔrɔ filisiw ka jɛnkulu dɔ tun siginin be erefaw ka kɔkɛnɛ na.

¹⁶Dawuda tun b'a ka dogoyɔrɔ la, filisiw ka kɛlɛden dɔw tun be Bɛtilehɛmu.

¹⁷Dawuda miirila k'a fɔ ko: «Kɔlɔn min be Bɛtilehɛmu dugu daa la, jɔn le bena taga jii bɔ ne ye o yɔrɔ la?»

¹⁸O mɔgɔ saba nunu tagara tɛmɛ filisiw ka kɛlɛdenw sigiyɔrɔ cɛma ka taga jii bɔ kɔlɔn nin kɔnɔ ka na n'a ye Dawuda fɛ, nga Dawuda ma sɔn k'a min. A y'a bɔn Masaba ye.

¹⁹A ko: «Ni ne y'o kɛ, n ka Ala kana n to. O tuma na, n bena sɔn ka mɔgɔ nunu joli min wa? U y'u yɛrɛ nii saraka jii nin kama! Bari, u y'u yɛrɛ nii di le, ka sɔrɔ ka jii nin sɔrɔ ka na n'a ye.» O la, a banna, a ma sɔn k'a min. O cɛfari mɔgɔ saba nunu ye fɛɛn min kɛ, o le y'o ye.

²⁰Zowabu baden Abisayi tun ye cɛfari bi saba [1] nunu kuntigi ye. A y'a ka taman kɛ ka mɔgɔ kɛmɛ saba faga. O la, a tɔgɔ bɔra u cɛma kosɔbɛ.

²¹A ye boɲa sɔrɔ kosɔbɛ u cɛma. Ale kɛra u kuntigi ye, nga a tun te cɛfariw kuntigi mɔgɔ saba nunu dɔ ye.

²²Yoyada dencɛ Benaya ka bɔ Kabiseyɛli tun ye kɛlɛdenŋana ye. A ye kobabaw kɛ. Ale lo ye mowabuw ka kɛlɛkɛwara fila faga. A tun jigira dingɛ kɔnɔ fana ka jara faga. *Sanji siminin tun benna o loon na yɛrɛ.

²³Ezipitika min jaɲa tun ye mɛtɛrɛ fila ni tilan ɲɔgɔn ye, ale Benaya fana le y'o faga. O Ezipitika nin tun be ni taman ye a bolo, min tun ka bon kosɔbɛ. Benaya tagar'a kama ni bere ye ka ta'a ka taman minɛ a fɛ, ka tila k'a faga n'a ye.

²⁴Yoyada dencɛ Benayawu ye fɛɛn min kɛ, o le ye o ye. A tɔgɔ bɔra kosɔbɛ cɛfari bi saba nunu cɛma.

²⁵U tun b'a jati kosɔbɛ mɔgɔ bi saba nunu cɛma, nga ale tun ma se mɔgɔ saba nunu fɛ. Kɛlɛden minw tun be ale masacɛ Dawuda kɔlɔsi, a y'a kɛ olu kuntigi ye.

²⁶Cɛfari tɔw filɛ: Zowabu baden Azayɛli, ni Bɛtilehɛmuka Dodo dencɛ Elanan,

²⁷ani Arorika Samɔti ni Pelɔnka Ɛlɛsi,

²⁸ani Tekowaka Ikɛsi dencɛ Ira, ni Anatɔtika Abiyezɛri,

²⁹ani Usaka Sibekayi, ni Awoyaka Ilayi,

³⁰ani Netofaka Marayi, ni Netofaka Baana dencɛ Elɛdi,

³¹ani Iribayi dencɛ Itayi ka bɔ Gibeya, Bɛnzamɛn ka mara la, ni Pireyatɔnka Benaya,

³²ani Urayi ka bɔ Gaasi wolonkoto daa la, ni Bɛtarabaka Abiyɛli,

³³ani Baarumika Azimawɛti, ni Salibimuka Eliyaba,

³⁴ani Gizɔnka Beneyasɛmu, ni Ararika Sage dencɛ Yonatan,

³⁵ani Ararika Sakari dencɛ Ayamu, ni Uri dencɛ Elifali,

³⁶ani Mekeraka Efɛri, ni Pelɔnka Aya,

³⁷ani Karimɛlika Ɛsiro, ni Ɛzibayi dencɛ Naarayi,

³⁸ani Natan balimacɛ Yowɛli, ni Agiri dencɛ Mibari,

³⁹ani amonicɛ Selɛki, ni Narayi ka bɔ Beerɔti, ale lo tun ye Seruya dencɛ Zowabu ka kɛlɛkɛminanw tabaga ye,

⁴⁰ani Ira ni Garɛbu ka bɔ Yetɛri ka soo,

⁴¹ani iticɛ Uri, ni Alayi dencɛ Zabadi,

⁴²ani Siza dencɛ Adina, Urubɛn kɔmɔgɔw kuntigi dɔ tun lo, mɔgɔ bi saba tun be n'ale ye,

⁴³ani Maaka dencɛ Anan, ni Mitinika Yosafati,

⁴⁴ani Asitarɔtika Uziya, ani Arowɛrika Otamu dencɛ Sama ni Yeyɛli,

⁴⁵ani Simiri dencɛ Yediyayɛli n'a balima Yowa ka bɔ Tisiti,

⁴⁶ani Maawimuka Eliyɛli, ani Ɛlinaamu dencɛ Yeribayi ni Yosawiya, ni mowabucɛ Yitima,

⁴⁷ani Eliyɛli ni Obɛdi, ani Yaasiyɛli ka bɔ Soba.