Read dyu Masaw ka loon o loon kibaru kitabu fɔlɔ 17 Bible Online

Masaw ka loon o loon kibaru kitabu fɔlɔ 17 - dyu bible

Masaw ka loon o loon kibaru kitabu fɔlɔ 17

¹Dawuda ye sigiyɔrɔ sɔrɔ a yɛrɛ ka soo tuma min na, a y'a fɔ kira Natan ye ko: «A filɛ, ne ka soo lɔnin be ni sɛdiriyiri ye, k'a sɔrɔ Masaba ka layidu taamasiɲɛ kɛsu be fanibugu le kɔnɔ.»

²Natan y'a fɔ a ye ko ni fɛɛn min b'a dusu la n'a b'a fɛ k'a kɛ, ko a k'a kɛ, ko bari Ala be n'a ye.

³O sufɛ yɛrɛ, Ala kumana Natan fɛ k'a fɔ a ye ko:

⁴«Ta'a fɔ ne ka baarakɛla Dawuda ye ko ne ko mɔgɔ min bena soo lɔ ne ye, janko n ka sigi a kɔnɔ, o te ale ye.

⁵Ko kabini loon min na ne ye Isirayɛlidenw bɔ Ezipiti jamana na fɔɔ ka na se bii ma, ne ma sigi ka ye soo kɔnɔ. N y'o waati kɛ fanibugu le kɔnɔ, o le tun ye n ka sigiyɔrɔ ye taama tuma na.

⁶Ka ne to ni Isirayɛlidenw bɛɛ ye u ka taama kɔnɔ, u kuntigiw ne tun ye minw bila ne ka jama ɲafɛ, ne y'a fɔ olu dɔ ye ka ye ko mun na a ma soo lɔ ne ye ni sɛdiriyiri ye wa?

⁷«Sisan, a fɔ ne ka baarakɛla Dawuda ye ko ne Masaba, Setigi le y'a fɔ ko ne le y'a minɛ ka bɔ kongo kɔnɔ sagadɛndɛyɔrɔ la, ka n'a kɛ ne ka jama Isirayɛli kuntigi ye.

⁸Ko ne tor'a fɛ a taayɔrɔw bɛɛ la, ne y'a juguw bɛɛ halaki ka bɔ a ɲafɛ. Ko ne ben'a kɛ a tɔgɔ be bɔ i n'a fɔ diɲɛ kɔnɔ mɔgɔbabaw ta.

⁹Ko ne bena sigiyɔrɔ di ne ka jama Isirayɛli ma k'u sigicogo ɲa, janko u ka se ka sigi u yɛrɛ ka yɔrɔ la ɲasuma na, mɔgɔjuguw kana u tɔɔrɔ tugu i n'a fɔ u tun b'a kɛ cogo min na fɔlɔ la,

¹⁰ani kabini ne tun ye kuntigiw sigi ne ka jama Isirayɛli kunna tuma min na. Ko n y'u juguw bɛɛ majigi u ye. Ko ne Masaba le ko n ben'a ka soo sabati.

¹¹Ko ale ka loon mana se, n'a sara, ne ben'a ka mɔgɔ dɔ wili a deenw cɛma, ka barika don a ka masaya la.

¹²Ko ale lo bena soo lɔ ne ye, ani ne ben'a ka masaya sabati kudayi.

¹³ Ko ne bena kɛ a faa ye, a bena kɛ ne deen ye. Ne ka makari tena ban a faan fɛ i n'a fɔ mɔgɔ min kɔnna ale Dawuda ɲa.

¹⁴Ko ne ben'a kɛ n ka jama ka masa ye tuma bɛɛ. Ko a ka masaya bena sabati kudayi.»

¹⁵Ala ye min bɛɛ fɔ Natan ye koo yetaw la, a y'o bɛɛ fɔ Dawuda ye.

¹⁶Masacɛ Dawuda tagara sigi Masaba ɲakɔrɔ k'a fɔ a ye ko: «Masa Ala, ne ye jɔn ye, ne ka soo ye mun ye, n'i y'a kɛ ne ye lɔyɔrɔ nin sɔrɔ?

¹⁷Halibi, o ma kɛ foyi ye i ɲana, Ala, fɔɔ i tagara ɲa ka waati nata layidu ta i ka baarakɛla ka soo ye. I ye ne jati mɔgɔbaba le ye, Masa Ala.

¹⁸Ne Dawuda be se ka mun le fɔ i ye tugu boɲako la, i be min lara ne, i ka baarakɛla kan? E b'i ka baarakɛla lɔn.

¹⁹Masaba, i ye koba nin bɛɛ kɛ k'i ka boɲa kabakoman yira i ka baarakɛla kosɔn, i sago la.

²⁰Masaba, e ɲɔgɔn te yen! Ka kɛɲɛ n'an ka mɛnta ye, Ala wɛrɛ te yen ni ele tɛ.

²¹Siya wɛrɛ be yen dugukolo kan tugu min be i n'a fɔ i ka jama Isirayɛli wa? Siyaw cɛma, ele, olu ka Ala dɔrɔn y'u kunmabɔ, k'u kɛ e yɛrɛ taw ye, janko i tɔgɔ ka se ka bɔ. O la, e ye kabakobabaw kɛ u ka jamana ye. Siya wɛrɛ be yen tugu min be i ka siya nin bɔ wa? I ye min bɔ Ezipiti jamana na, o yɔrɔ siya bolo.

²²I ye i ka jama Isirayɛli kɛ i ta ye tuma bɛɛ, ele Masaba kɛra u ka Ala ye.

²³Sisan Masaba, i ye kuma min fɔ i ka baarakɛla n'a ka somɔgɔw kosɔn, a to o ka kɛ ten tuma bɛɛ la. I ye min fɔ, i k'o kɛ.

²⁴A ka kɛ ten, janko boɲa ka la i kan tuma bɛɛ, mɔgɔw k'a fɔ ko: ‹Masaba, Setigi ye Isirayɛli ka Ala ye. I ka baarakɛla Dawuda ka soo ka barika sɔrɔ i ɲakɔrɔ.›

²⁵Ele, ne ka Ala, i yɛrɛ y'a yira ne la k'a fɔ ko i bena kɔmɔgɔw di ne ma. O le y'a to i ka baarakɛla ye jagwɛlɛya sɔrɔ k'i daali ten.

²⁶Masaba, i ye Ala ye, i y'o hɛrɛ koo fɔ i ka baarakɛla ye.

²⁷Masaba, sisan i ka barika don i ka baarakɛla ka soo la, janko a ka se ka to i ɲakɔrɔ tuma bɛɛ. Bari ele Masaba le ye ne ka soo dɛmɛ, i ka baarakɛla ka soo bena barika sɔrɔ tuma bɛɛ.»