Read dyu Masaw ka loon o loon kibaru kitabu fɔlɔ 18 Bible Online

Masaw ka loon o loon kibaru kitabu fɔlɔ 18 - dyu bible

Masaw ka loon o loon kibaru kitabu fɔlɔ 18

¹O kɔ, Dawuda ye filisiw kɛlɛ ka se u kɔrɔ fɔɔ u y'u yɛrɛ majigi a ye. A ye Gati n'a lamini duguw minɛ filisiw fɛ.

²A sera mowabuw kɔrɔ fana. U y'u yɛrɛ majigi a ye, u tun be to ka nisɔngɔ sara a ye.

³Soba masacɛ Adadezɛri tun tagara Efarati baji mara la ko a b'a minɛ tugu tuma min na, Dawuda y'a kɛlɛ Amati faan fɛ ka se a kɔrɔ fana.

⁴A ye wotoro waa kelen (1 000) bɔsi a fɛ, ni sotigi waa wolonwula (7 000), ani sennatigi mɔgɔ waa mugan (20 000). A ye wotoro samaso kɛmɛ to yen, ka tɔ nunu bɛɛ senfasaw tigɛtigɛ.

⁵Sirika minw be Damasi, olu nana k'u bena Soba masacɛ Adadezɛri dɛmɛ. Dawuda ye mɔgɔ waa mugan ni fila (22 000) faga olu la.

⁶A ye lasigidenw sigi Damasi mara la, Siri jamana na. O la, Sirikaw y'u yɛrɛ majigi Dawuda ye, ka nisɔngɔ sara a ye. Masaba tun be see di Dawuda ma a ka kɛlɛw bɛɛ la.

⁷Nigɛkunbɛnnan sanulaman minw tun be Adadezɛri ka kɛlɛdenw kuntigiw fɛ, Dawuda ye olu minɛ ka na n'u ye Zeruzalɛmu.

⁸ A ye zira caaman ta Adadezɛri ka duguba fila kɔnɔ, minw ye Tibati ni Kun ye. Solomani y'o le ta ka tasaba dilan, ani tutunanw, ni Alabatoso kɔnɔ minan dɔ wɛrɛw.

⁹Amati masacɛ Towu y'a mɛn ko Dawuda sera Soba masacɛ Adadezɛri ka kɛlɛdenw bɛɛ kɔrɔ.

¹⁰A y'a dencɛ Adoramu ci masacɛ Dawuda fɛ k'a fo, ani k'a waleɲuman lɔn Adadezɛri kɛlɛko la ka se a kɔrɔ, bari Towu ni Adadezɛri tun ye kɛlɛɲɔgɔnw ye. Adoramu tagara ni minanw sifa bɛɛ ye minw dilanna ni sanu ye, ni warigwɛ, ani zira ye.

¹¹Masacɛ Dawuda y'u di Masaba ma i n'a fɔ a tun ye warigwɛ ni sanu d'a ma cogo min na, a tun ye minw bɔsi siya nunu bɛɛ fɛ: edɔmuw, ni mowabuw, ani amoniw, ni filisiw ani amalɛkiw.

¹² Kɔgɔ be kɔkɛnɛ min na, Seruya dencɛ Abisayi ye edɔmuw kɛlɛ ka mɔgɔ waa tan ni seegi (18 000) faga o kɔnɔ.

¹³A ye lasigidenw sigi Edɔmu mara kɔnɔ. Edɔmuw bɛɛ y'u yɛrɛ majigi Dawuda ye. Masaba tun be see d'a ma a ka kɛlɛw bɛɛ la.

¹⁴Dawuda sigira Isirayɛlidenw bɛɛ kunna ka to k'u mara ni tilenninya ni tiɲɛ ye.

¹⁵Seruya dencɛ Zowabu le tun ye kɛlɛdenw kuntigi ye, Ayiludi dencɛ Yosafati le tun be sɛbɛko kunna.

¹⁶Ayitubi dencɛ Sadɔki ni Abiyatari dencɛ Ayimelɛki tun ye sarakalasebagaw ye. Sawusa tun ye sɛbɛnnikɛla ye.

¹⁷Yoyada dencɛ Benayawu le tun ye masacɛ kɔlɔsibagaw kuntigi ye. Dawuda deenw tun gunna ale Dawuda la baara la.