Read dyu Masaw ka loon o loon kibaru kitabu fɔlɔ 19 Bible Online

Masaw ka loon o loon kibaru kitabu fɔlɔ 19 - dyu bible

Masaw ka loon o loon kibaru kitabu fɔlɔ 19

¹Waati dɔ nana se, amoniw ka masacɛ Naasi sara, a dencɛ sigir'a nɔɔ na.

²Dawuda y'a fɔ ko ale bena koɲuman kɛ Naasi dencɛ Anun ye, i n'a fɔ a facɛ tun y'a kɛ ale ye cogo min na. O la, a ye cidenw ci k'u ka ta'a faa ka sangafoli kɛ. Dawuda ka cidenw ser'a fɛ a ka jamana na janko k'a jigi tugu.

³Amoniw ka ɲamɔgɔw y'a fɔ Anun ye ko a kana miiri ko Dawuda ye mɔgɔ nunu bila ka na a jigi tugu ka boɲa la a facɛ kan dɛ. Ko u nana janko ka jamana nin yaala k'a kɔlɔsi, o kɔ, u ben'a minɛ.

⁴O la, Anun ye Dawuda ka ciden nunu minɛ k'u bonbosi li, ka tila k'u ka faniw tigɛ u jukunan yɔrɔ la, ka sɔrɔ ka sira di u ma.

⁵Mɔgɔ dɔ tagara o kibaruya fɔ Dawuda ye. Dawuda ye mɔgɔw bila ka taga u kunbɛn, bari u tun maloyanin be kosɔbɛ. Masacɛ y'a fɔ ko u k'a fɔ u ye ko u ka to Zeriko yanni u bonbosi be falen, k'o kɔ, u be sɔrɔ ka na.

⁶Anun ni amoniw y'a ye ko Dawuda tun te se k'u ka koo nin muɲu minkɛ, u ye mɔgɔw ci ni warigwɛ tɔni bi saba ye Mezopotami jamana kɔgɔdugu ɲafan fɛ, ani Maaka, ni Soba, janko ka kɛlɛkɛwotorow ni sotigiw sara n'o ye.

⁷U sera ka wotoro waa bi saba ni fila (32 000) sɔrɔ, ani Maaka masacɛ n'a ka kɛlɛdenw. U wilila ka na sigi Madaba ɲafɛ. Amoniw bɔra u ka duguw kɔnɔ ka ɲɔgɔn lajɛn ka sira minɛ ka taga kɛlɛ la.

⁸Dawuda y'o mɛn dɔrɔn, a ye Zowabu ci u kama, ni kɛlɛdenŋanaw bɛɛ.

⁹Amoniw bɔra ka lɔ u ka dugu daa la kɛlɛ kama. Masacɛ minw tun bɔra yɔrɔ wɛrɛ, olu tora kongo kɔnɔ danna.

¹⁰Zowabu y'a ye ko a juguw bena to k'a kɛlɛ a ɲafɛ n'a kɔfɛ minkɛ, a ye kɛlɛden dɔw woloma ka bɔ Isirayɛliden ka kɛlɛdenŋanaw cɛma, ka olu ɲaa sin Sirikaw ma,

¹¹ka kɛlɛden tɔw di a dɔgɔcɛ Abisayi ma, olu y'u ɲaa sin amoniw ma.

¹²A y'a fɔ a ye ko: «N'a kɛra ko Sirikaw barika boɲana ne ma, i ka na n dɛmɛ. N'a fana sɔrɔla ko amoniw le ta boɲana i fana ta ye, ne bena na i dɛmɛ.

¹³Jija, an k'an ka jagwɛlɛya yira an ka siya kosɔn, ani an ka Ala ka duguw kosɔn. Fɛɛn min ka di Masaba ye, a bena o le kɛ.»

¹⁴Zowabu n'a ka mɔgɔw tagara k'u be Sirikaw kɛlɛ, u bolila Zowabu ɲa.

¹⁵Amoniw y'a ye ko Sirikaw be bolila minkɛ, olu fana bolila Zowabu dɔgɔcɛ Abisayi ɲa ka taga don dugu kɔnɔ. O la, Zowabu kɔsegira ka taga Zeruzalɛmu.

¹⁶Sirikaw y'a ye ko Isirayɛlidenw sera u kɔrɔ minkɛ, u ye mɔgɔw bila ka taga u tɔɲɔgɔnw wele Efarati baji kɔrɔn fɛ. Adadezɛri ka kɛlɛdenw kuntigi Sofaki le tun b'u ɲa.

¹⁷U nana o kibaruya fɔ Dawuda ye. A ye Isirayɛlidenw bɛɛ lajɛn ka taga Zurudɛn baji tigɛ, ka taga se u faan fɛ. A ye kɛlɛ labɛn u kama. Sirikaw ye kɛlɛ daminɛ.

¹⁸Nga Sirikaw bolila Isirayɛlidenw ɲa. Dawuda y'u ka wotorotigi waa wolonwula (7 000) faga, ani sennatigi waa bi naani (40 000). A y'u ka kɛlɛdenw kuntigi Sofaki faga fana.

¹⁹Adadezɛri ka baaradenw y'a ye ko Isirayɛlidenw sera olu kɔrɔ minkɛ, u bɛnna ni Dawuda ye, ani k'u yɛrɛ majigi ka baara kɛ a ye. O kɔ, Sirikaw ma sɔn ka amoniw dɛmɛ tugu.