Read dyu Masaw ka loon o loon kibaru kitabu fɔlɔ 21 Bible Online

Masaw ka loon o loon kibaru kitabu fɔlɔ 21 - dyu bible

Masaw ka loon o loon kibaru kitabu fɔlɔ 21

¹Sutana wilila Isirayɛlidenw kama. A y'a kɛ Dawuda ye Isirayɛlidenw jati.

²Dawuda y'a fɔ Zowabu ni kɛlɛdenw kuntigi tɔw ye ko u ka taga Isirayɛlidenw jati k'a ta Bɛriseba, worodugu faan fɛ fɔɔ ka ta'a bila Dan mara la kɔgɔdugu faan fɛ, k'u daa lɔn ka na o fɔ ale ye, janko ale ka se k'u lɔn.

³Zowabu y'a fɔ a ye ko: «Masaba k'a kɛ a ka jama ka buguya siɲɛ kɛmɛ! Masacɛ ne matigi, u bɛɛ te i ka baaradenw ye wa? Mun na i b'a fɛ ka nin kɛ? Mun na Isirayɛlidenw bena lɔ n'o kunko ye?»

⁴Nga masacɛ tor'a ka kuma kan a tun ye min fɔ Zowabu ye. O la, ale tagara Isirayɛli jamana bɛɛ yaala, ka sɔrɔ ka segi ka na Zeruzalɛmu.

⁵Zowabu nana jama daa fɔ Dawuda ye. Mɔgɔ miliyɔn kelen ni waa kɛmɛ (1 100 000) le tun be Isirayɛli mara la minw be se kɛlɛ la, ka fara mɔgɔ waa kɛmɛ naani ni bi wolonwula (470 000) kan Zuda mara la.

⁶Zowabu tun ma Levi kɔmɔgɔw ni Bɛnzamɛn taw jati, bari masacɛ ka cira nin tun man diya ye fewu.

⁷O koo nin ma diya Ala ye, a ye Isirayɛlidenw ɲaa gwan.

⁸Dawuda y'a fɔ Ala ye ko ale ye kojuguba kɛ. Ko a ka sabali ka yafa a ka baarakɛla ma sisan, ko bari ale ye fatɔyabaara kɛ.

⁹Masaba kumana Dawuda ladibaga kira Gadi fɛ ko:

¹⁰«Ta'a fɔ Dawuda ye ko ne Masaba ko n be koo saba latigɛ a ye, ko a ka kelen woloma u la n bena min kɛ a la.»

¹¹O la, Gadi tagara Dawuda sɔrɔ k'a fɔ a ye ko: «Masaba ko a be i ma ka wolomani kɛ,

¹²saan saba kɔngɔ, walima i juguw ka se i kɔrɔ kalo saba, k'aw halaki ni murujan ye, walima Masaba ka murujan k'aw halaki, banajugu ka don jamana nin kɔnɔ tile saba, Masaba ka nibɔmɛlɛkɛ bena tɛmɛ Isirayɛlidenw ka jamana yɔrɔ bɛɛ. Ne ka kan ka kɔsegi ka taga min fɔ n cibaga ye, o fɔ sisan.»

¹³Dawuda y'a fɔ a ye ko: «Ne dusu kasinin lo kosɔbɛ. Ne ka ben Masaba bolo, bari a be makari kosɔbɛ, ne kana ben adamadenw bolo.»

¹⁴O la, Masaba y'a kɛ banajugu donna Isirayɛli jamana kɔnɔ, mɔgɔ waa bi wolonwula (70 000) sara Isirayɛlidenw cɛma.

¹⁵Ala ye mɛlɛkɛ dɔ ci ko a ka taga Zeruzalɛmu halaki. K'o mɛlɛkɛ to cɛnni na, Masaba y'a ye, a nimisara. O la, a y'a fɔ nibɔmɛlɛkɛ nin ye k'o b'a bɔ, ko a k'a dabila. O y'a sɔrɔ Masaba ka mɛlɛkɛ nin tun lɔnin be zebuzicɛ Ɔrinan ka sumangosikɛnɛ na.

¹⁶Dawuda ye Masaba ka mɛlɛkɛ nin ye, a tun ye murujan bɔ a foroko la ka lɔ sanfɛ, k'a ɲaa sin Zeruzalɛmu faan fɛ. Ka dusukasifaniw to Dawuda ni cɛkɔrɔbaw kaan na, u y'u kunbiri gwan k'u ɲaa biri duguma.

¹⁷A y'a fɔ Ala ye ko: «Ne le y'a fɔ k'u ka jama jati. Ne le ye kojugu kɛ, ne le filila, mɔgɔ nunu ma foyi kɛ. Masaba ne ka Ala, ne bugɔ, ani n ka somɔgɔw, kana foyi kɛ i ka jama na.»

¹⁸Masaba ka mɛlɛkɛ y'a fɔ Gadi ye ko a k'a fɔ Dawuda ye ko a ka taga sarakabɔyɔrɔ lɔ Masaba ye zebuzicɛ Ɔrinan ka sumangosikɛnɛ na.

¹⁹Dawuda wilila ka taga ka kɛɲɛ ni Gadi ka fɔta ye Masaba tɔgɔ la.

²⁰Ɔrinan tun be suman gosira n'a deen mɔgɔ naani ye. A ko a be filɛli kɛ, a ye mɛlɛkɛ nin ye, a deen nunu dogora.

²¹Dawuda tagara Ɔrinan fɛ. Ɔrinan y'a ye dɔrɔn, a bɔra sumangosikɛnɛ la k'a kunbiri gwan a ɲafɛ k'a ɲaa biri duguma.

²²Dawuda y'a fɔ Ɔrinan ye ko a k'a ka sumangosikɛnɛ nin di ale ma, a be sarakabɔyɔrɔ lɔ Masaba ye, ko a k'a feere ale ma a sɔngɔ yɛrɛ yɛrɛ la janko banajugu nin ka ban ka bɔ jama cɛma.

²³Ɔrinan y'a fɔ Dawuda ye ko: «Masacɛ, ne matigi, a ta k'i diyanako kɛ yen. Ne yɛrɛ bena misiw di o ka kɛ saraka jɛnitaw ye, ka sumangosinanw di u ka kɛ lɔgɔ ye, ani ka suman di o ka kɛ suman saraka ye. Ne bena o bɛɛ di.»

²⁴Nga masacɛ Dawuda y'a fɔ a ye ko: «Ne bena o san u sɔngɔ yɛrɛ yɛrɛ la. Fɛɛn min y'i ta ye, ne tena o ta i fɛ ka saraka bɔ Masaba ye, ne wasiji te min na.»

²⁵Dawuda ye sumangosikɛnɛ nin san Ɔrinan fɛ sanu kuru kɛmɛ wɔɔrɔ la.

²⁶A ye sarakabɔyɔrɔ lɔ Masaba ye o yɔrɔ la, ka saraka jɛnitaw ni jɛnɲɔgɔnya sarakaw bɔ. A ye Masaba daali, ale y'a jaabi, tasuma bɔra sanfɛ ka jigi sarakabɔyɔrɔ ni saraka nunu kan.

²⁷O kɔ, Masaba y'a fɔ mɛlɛkɛ nin ye ko a k'a ka murujan nin don a foroko la.

²⁸Dawuda y'a ye ko Ala y'ale jaabi zebuzicɛ Ɔrinan ka sumangosikɛnɛ na minkɛ, a ye sarakaw bɔ yen.

²⁹Musa tun ye fanibugu min dilan Masaba ye kongokolon kɔnɔ, ani saraka jɛnita bɔyɔrɔ tun be Gabaŋɔn batolikɛyɔrɔ la o tuma na.

³⁰Dawuda tun te se ka taga o yɔrɔ la ka Ala ɲininga, bari a tun siranna kosɔbɛ Masaba ka mɛlɛkɛ ka murujan nin ɲa.