Read dyu Masaw ka loon o loon kibaru kitabu fɔlɔ 22 Bible Online

Masaw ka loon o loon kibaru kitabu fɔlɔ 22 - dyu bible

Masaw ka loon o loon kibaru kitabu fɔlɔ 22

¹O la, Dawuda ko nin le ye Masaba Ala ka soo ye yan, Isirayɛlidenw ka saraka jɛnita bɔyɔrɔ ye nin ye.

²Lonan minw tun be Isirayɛli kɔnɔ, Dawuda ko u k'u lajɛn. A ye kabakurulɛsɛbagaw woloma olu cɛma, k'olu bila o baara la janko Ala ka soo ka lɔ.

³A ye nigɛ caaman fana labɛn k'o bila, min bena kɛ ka koonw gwengwen, ani u datugunanw. A ye zira caaman fana labɛn fɔɔ u yɛrɛ tun te se k'a kilo daa lɔn,

⁴ani sɛdirilɔgɔ caaman minw daa ma lɔn. Bari Sidɔnkaw ni Tirikaw tun nana ni sɛdirilɔgɔ caaman ye k'a di Dawuda ma.

⁵Dawuda y'a fɔ ko ale dencɛ Solomani ma kɛ mɔgɔkɔrɔba ye fɔlɔ, ko fanga t'a la, ko k'a sɔrɔ soo min ka kan ka lɔ Masaba ye, o tɔgɔ ka kan ka bɔ jamanaw bɛɛ la, a ka boɲa n'a ka ɲumanya kosɔn. O la, a ko ale bena labɛnni kɛ ka bila a koo la. O le y'a to sanni a ka sa, a ye labɛnniba kɛ k'a bila.

⁶Dawuda y'a dencɛ Solomani wele, k'a ɲini a fɛ ko a ka soo lɔ Masaba ye, Isirayɛli ka Ala.

⁷ A y'a fɔ Solomani ye ko: «N deen, n tun b'a fɛ ka soo lɔ Masaba n ka Ala tɔgɔ la.

⁸Nga Masaba y'a fɔ ne ye ko ne ye mɔgɔ caaman faga, ko n ye kɛlɛbaba kɛ. K'o la, n tena se ka soo lɔ ale tɔgɔ la, ko bari ne ye mɔgɔ caaman faga diɲɛ na ale ɲakɔrɔ.

⁹A y'a fɔ tugu ko ne bena dencɛ sɔrɔ, k'o deen nin bena kɛ hɛrɛmɔgɔ ye, ko ale bena ɲasuma sɔrɔ a juguw bɛɛ cɛma, minw b'a lamini, a tɔgɔ bena la Solomani. [1] Ale sababu la, Isirayɛlidenw bena hɛrɛ ni ɲasuma sɔrɔ a ka tile la.

¹⁰K'o deen nin le bena soo lɔ ale tɔgɔ la. Ko a bena kɛ ale deen ye, ale fana bena kɛ a Faa ye, ko a ben'a kɛ a ka masaya be sabati Isirayɛlidenw kunna tuma bɛɛ.

¹¹«Sisan ne deen, Masaba ka to i fɛ, janko i ka se ka soo nin lɔ Masaba i ka Ala ye, ka kɛɲɛ n'a ka fɔta ye i faan fɛ.

¹²Masaba bena i sigi tuma min na Isirayɛlidenw kunna, a daan ye ale Masaba i ka Ala ka faamuli ni hakilitigiya d'i ma janko ka se k'a ka sariya kɔlɔsi.

¹³ Masaba y'a ka sariya n'a ka cii minw di Musa ma Isirayɛlidenw kosɔn, i ka olu kɔlɔsi k'o bato, i bena se ka taga ɲa. O la, barika don i yɛrɛ la k'i jaa gwɛlɛya! Kana siran, i jaa kana tigɛ.

¹⁴«Ne ni n ka dɛsɛ bɛɛ, n sera ka sanu tɔni waa saba labɛn Masaba ka soo nin kama, ani warigwɛ tɔni waa bi saba ni kɔ. Zira ni nigɛ gwiliya te se ka lɔn u ka caya bolo. Ne ye lɔgɔw labɛn fana, ani kabakuruw, e yɛrɛ bena dɔ fara o kan.

¹⁵Baaraden caaman b'i fɛ: kabakurubɔbagaw, n'u lɛsɛbagaw, ani yirilɛsɛlaw, ni baara sifa bɛɛ lɔnbagaw.

¹⁶Sanu ni warigwɛ ani zira ni nigɛ, olu te se ka jati. E ka wili dɔrɔn ka baara kɛ. Masaba ka to i fɛ.»

¹⁷Dawuda y'a ɲini Isirayɛlidenw kuntigiw bɛɛ fɛ ko u k'a dencɛ Solomani dɛmɛ.

¹⁸A y'a fɔ u ye ko: «Masaba aw ka Ala te n'aw ye wa? A ma lafiya di aw ma faan bɛɛ la wa? Tiɲɛ na, a ye jamana nin mɔgɔkɔrɔw don ne bolo, olu y'u yɛrɛ majigi Masaba n'a ka jama ye.

¹⁹Sisan, aw ka jija ka Masaba aw ka Ala ɲini tigitigi. Aw ka wili ka Masaba Ala ka sigiyɔrɔ lɔ, k'a ka layidu taamasiɲɛ kɛsu ta ka n'a bila o yɔrɔ la, ani minan minw ye a ta ye. Aw ka na n'u ye a ka soo kɔnɔ.»